Read kumam Jeremías 47 Bible Online

Jeremías 47 - kumam bible

Jeremías 47

¹Atzun tqanil lu tzaj tma'n Qman te Jeremías aju t-sanjel, kyi'j aj Filisteo, tej na'nxtoq tok tzoqpaj Faraón q'ojlel ti'j tnam Gaza.

²Chi Qman kyja': Ik tza'n jun nima in ch'iy, nne'x pax ex in kyaj mulq'aj tkyaqil tjaq', iktzun che tzajel nim soldad tuj tx'otx' tuj tb'anq'ab' q'ij, ex kb'ajel naj tkyaqil kyu'n, kyuk'ix qe tnam ex qe xjal najl kyuj. Kykyaqil xjal che jawil sch'in ex che oq'el.

³Ok tb'injtz tq'ajq'ajel kyqan chej in che ojqelan wen, tuk'ix kyq'ajq'ajel carwaj ex tq'ajq'ajel kyrwed, b'i'x che b'el numj qe mamb'aj ex kyjel kykolin kyk'wa'l.

⁴Porke ma pon q'ij tu'n kynaj aj Filisteo, aqeju mankb'il onil kyi'j tnam Tiro ex Sidón. Ate Qman kb'el xitunte kye aj Filisteo, aqeju e tzaj ojtxi tuj tx'otx' Creta.

⁵Qe xjal najl tuj tnam Gaza k'elel kymatzo'n ttzmal kywi' tu'n kyb'is ex minti'tl in che q'ajt xjal tuj tnam Ascalón. ¿Jtoj b'an t-xi kykoline tu'n tb'aj kyqesine ti'j kyximlale tu'n kyb'ise, aqeye ch'intl xjal aj Filisteo?

⁶¿Jtoj b'an t-xi tkolina tu'n tb'iyana aya t-spad Qman? Taja tuj tjayila, chewix tk'u'ja ex txulekuya.

⁷Pero, ¿tza'n tten tu'n t-xi tkolin spad tu'n tb'iyan? Porke ate Qman ma tzaj q'mante te tu'n tok tzoqpaj ti'j tnam Ascalón ex kyi'j kykyaqil tnam ate' ttzi'yile mar.