Read kumam Jeremías 48 Bible Online

Jeremías 48 - kumam bible

Jeremías 48

¹Atzun tqanil lu ti'j tnam Moab tu'n Qman aju Tajaw Tkyaqil ex Kydios aj Israel: Ay b'ek'b'il twitz tnam Nebo, porke b'i'x kb'ajel xitj, kb'el ti'j tnam Quiriataim ex kb'el kych'ixwi xjal najl tuj; ax ikx qe ja ma' kywa'l te kykolb'il kyib' che b'el xitj.

²Knajel toklen Moab. Tuj tnam Hesbón kb'antel ti'j kyu'n aj q'oj tu'n tkub' naj ex tu'n mi'n toktl Moab te nasyon. Ikx kyeye aqeye aj Madmena, kb'el xitun kytanmiye ex che q'ojl xjal kyi'je.

³Tuj tnam Horonaim kb'injtzel tq'ajq'ajel kywi xjal kyja': Ma qo naj ex ma kub' xitun qtanmi.

⁴B'i'x kb'el xitj tnam Moab, ex che jawil sch'in qe tal kyk'wa'l tu'n ta'w k'ixk'oj.

⁵Che oq'el ok kyjax tk'u'j witz Luhit ex kb'injtzel tq'ajq'ajel kywi' in che sch'in wen tu'n ta'w k'ixk'oj ok kyku'x tib'aj tnam Horonaim.

⁶Kyel oqe, kyklom kyib'e, kyoke ik tza'n jun wi' tal tze' retama tb'i at tuj tzqij tx'otx'.

⁷Tu'nju ok qe' kyk'u'je ti'j kyipune ex ti'j kyq'inumab'le, ax ikx kyeye kb'el kyi'je kyu'n aj q'oj. Kxel q'i'n kydiose Quemós tuj juntl nasyon, kyuk'ix qe pal in che ajb'en te ex txqantl xjal ma' kyoklen.

⁸Kykyaqil tnam che b'el xitj ex mi jun kyjel ten; ax ikx kb'ajel naj mlaj tx'otx' ex tiwitz tx'otx'. Aqine Dios in chin q'mante jlu.

⁹Kyq'onxe kyxik' aj Moab tu'ntzun kyel lipan; che b'el xitun kytanmi ex mi jun xjal ktel kyuj.

¹⁰Tzajxwit mya b'a'n tib'aj ju xjal minti' in tb'incha'n tu'n tkyaqil tanmi aju aq'untl ktzajel tma'n Qman te. Tzajxwit mya b'a'n tib'aj ju xjal tk'i' b'iyan tu'n spad.

¹¹Tuj txub'txaj ma che anq'in aj Moab atxix ttzajlen ojtxi, na'nx tkanun jun maj tu'n kyxi q'i'n pres tuj juntl tnam. Ik kyten ik tza'n ta'l twitz uva in kyaj q'o'n tuj jun tkub'il ex minti' in b'aj ch'expu'n tkub'il, kyja'tzun, minti' in b'aj tchya'l ex tk'ok'jal.

¹²Ex chi Qman kyja': Kpol tq'ijlalil tu'n kyxi nsama'ne xjal tu'n tku'x kyqo'n ta'l twitz uva lu kyuj junxitl tkub'il ex tu'n tkub' kyb'uchin tnejel tkub'il.

¹³Ex ktzajel kych'ixwi aj Moab ti'j kydios Quemós tb'i, ik tza'n tzaj kych'ixwi aj Israel tej tok qe' kyk'u'j ti'j Betel.

¹⁴¿Tza'ntzun tten in kyma'n aj Moab kyja': At qipune ex kyuw qk'u'je tuj q'oj?

¹⁵Kb'el xitj Moab kyuk'ix qe tnam ate' tuj tkwent, ex che kymel qe ku'xun tb'anilxix at kyxol, chi Rey aju tok tb'i Qman Tajaw Tkyaqil.

¹⁶Ch'ix tul laq'e' tq'ijlalil tu'n kynaj aj Moab ex noq tu'n tulku kanun mya b'a'n ktzajel kyi'j.

¹⁷Aqeye tnam kyvesin kyib' tuk'il Moab, ex kykyaqil qeju b'i'n tqanil kyu'n ti'j, che oq'e ti'j ex kymanxe kyja': Kyke'yinxe tza'n tten ma naj tkawb'il aju at nimxix tipun ex ma' toklen.

¹⁸Kyku'tze tuj kyq'uqb'ile aqeye in jaw kyniman kyib'e tuj tnam Dibón, ex che qe'kuye twitz tzqij tx'otx', porke aju ma kub' xitunte Moab, lu in ojqelan ttzaj tu'n tok tzoqpaj kyi'je ex ma b'aj t-xitun qe ja ma' kywa'l te kykolb'il kyib'e.

¹⁹Aqeye najl tuj tnam Aroer, che we'kuye ttxlaj b'e ex kyke'yinxe, kyqaninxe kye qeju ma che el oq ex ma che tzoqpaj: ¿ti ma b'aj? Che chikuye.

²⁰Ma kub' kych'ixwi aj Moab tu'nju ma kub' xitj kytanmi. Che oq'e ex che ayayane ti'j tnam; kymanxe tqanil lu kye qeju najl ttzi nima Arnón: Ma kub' xitj tnam Moab, che chikuye.

²¹Ma tzaj jwisi kyib'aj tnam ate' tuj tiwitz tx'otx', ex atzun qe jlu: Holón, Jahaza, Mefaat,

²²Dibón, Nebo, Bet-diblataim,

²³Quiriataim, Bet-gamul, Bet-meón,

²⁴Queriot, Bosra ex kykyaqil qe tnam te Moab, aqeju ate' niqayin ex najchaq.

²⁵Ma naj tipumal Moab ex ma b'aj xitj tkawb'il, chi Qman.

²⁶E tchyo'n twi' Moab kyu'ne, porke ma jaw tniman tib' twitz Qman. Tol k'ik'el Moab tuj t-xa'w, ex kykyaqil xjal che xmayil ti'j.

²⁷Aqeye aj Moab: ¿Minti'petzun o che xmayine kyi'j aj Israel ex kykyaqil maj e yoline kyi'j tuk'il ik'b'il mer ik tza'n eleq' qe'?

²⁸Kykolin kyaje kytanmiye aqeye aj Moab, kyxi'ye najal kyuj qe toy' pik ik tza'n qe paloma in b'ant kyq'u' twitz pik.

²⁹Ojtzqi'n qe aj Moab qu'ne, nim in jaw kyniman kyib', tx'u'j kywi' ex jawni kywitz.

³⁰Chi Qman: Ojtzqi'n wu'ne tx'u'j kywi' aj Moab, in jaw kyniman kyib' ex noqx gan jlu.

³¹Kyja'tzun, chin oq'ele ex chin b'isule kyi'j kykyaqil aj Moab ex kyi'j qe xjal te tnam Kir-hares.

³²Mas nim chin oq'ele ti'j tqan uva te tnam Sibna, ik tza'n in oq'e kyi'j aj Jazer. Aju twi ttxa'n uva ponin b'aj max ti'jxi mar ex ponin qe max tuj tnam Jazer. Atzun ja'lo ma naj twitz ky-uvaye q'an kyu'n qe xitul te.

³³Ya minti'tl in che sch'in xjal tuk'il tzalajb'il kyuj qe tqan awal tb'anilxix kye aj Moab. Wu'ne ya minti'tl ta'l twitz uva jatum nne'l yatz'et ta'l, ya mi a'l jun in b'itzan tuk'il tzalajb'il ok tkub' twab'an twitz uva tjaq' tqan tu'n tel yatz'et ta'l. Aju tq'ajq'ajel kywi xjal in b'injtz ya mya b'itz te tzalajb'il, noq o'kx te q'oj.

³⁴Qe xjal najl tuj tnam Hesbón in che sch'in tu'n ta'w, ex max in pon tq'ajq'ajel kywi' tuj tnam Eleale ex tuj tnam Jahaza, in xi tq'ajq'ajel kywi' tuj tnam Zoar, in pon max tuj tnam Horonaim ex tuj tnam Eglat-selisiya, porke qe twi a' in che b'et tuj tq'ab' xaq Nimrim ma che aj tzqij.

³⁵Chi Qman: Che najel aj Moab wu'ne, aqeju in che jax kywi' qe witz tu'n t-xi kyq'o'n chojb'il kye qe tilb'ilal nno'k kydiosin ex tu'n tkub' kypatun storak kywitz.

³⁶Kyja'tzun, ik tza'n in q'ajt chqitz' ok in kyim jun xjal, iktzun in b'isun wanmiye kyi'j aj Moab ex kyi'j xjal te tnam Kir-hares, porke ma b'aj naj kyq'inumab'l otoq b'aj kychmo'n.

³⁷Kykyaqil xjal ma tz'el kymatzo'n ttzmal kywi' ex kyxmatz, ex kykyaqil ma b'aj kyqesin tuj kyq'ab', ex ma tz'ok kyq'o'n kyxb'alun ch'i'x twitz.

³⁸In b'injtz oq'el kywi' kykyaqil kyja aj Moab ex kyuj kykyaqil cay, porke ma che b'aj naj aj Moab ik tza'n in b'aj b'uchit jun tal ẍoq' minti' tajb'en. Aqine Dios in chin q'mante jlu.

³⁹Che oq'e kyi'j aj Moab porke ma che b'aj naj. Ma tz'ajtz kyq'o'n ttzal kyi'j tu'n kych'ixwi. Ma che ok te kyxmayb'il xjal kyvesin kyib' kyuk'il, ex ma tzaj kyxob'il xjal tu'n tlaj aju ma b'aj kyi'j aj Moab.

⁴⁰Chi Qman kyja': Ma che ok tzoqpaj aj q'oj kyi'j aj Moab ik tza'n jun t'iw in tzaj lipan kyuk'il tq'ab' lik'un tten.

⁴¹Che tzyetel qe tnam ex qe ja ma' kywa'l te kykolb'il kyib' kyu'n aj q'oj. Tuj tq'ijlalil lu, aqeju kysoldad aj Moab kyuw kyk'u'j tuj q'oj che tzajel lu'lun tu'n kyxob'il, ik tza'n jun xu'j ok nnu'l itz'j tal.

⁴²B'i'x kb'el xitj tnam Moab ex k'elel q'i'n toklen te nasyon, porke ma jaw tniman tib' twitz Qman.

⁴³Kyja'tzun aqine Dios kxel nma'ne jlu: Qe xjal najl tuj tnam Moab che okel ik tza'n qe jil lajo'n kyu'n qe kamb'al, in che xob' tu'n kyku'x tz'aq tuj jun toy' jul ex qa tu'n kytzyet tu'n jun k'ob'il.

⁴⁴Aju xjal nne'l oq twitz xob'ajil, kb'elex tz'aq tuj toy' jul, ex alkye ma jatz tuj toy' jul, ktzyetel tu'n k'ob'il, porke tzul tq'ijlalil tu'n tkub' kycastiw aj Moab wu'ne. Aqine Dios in chin q'mante jlu.

⁴⁵Qe xjal ma b'aj kyipun ma che el oq tu'n tpon kyklon kyib' tuj tnam Hesbón jatum o kawin rey Sehón, ex ma tz'ok tq'aq'al tnam Hesbón, ex aju q'aq' ma tz'el laq'e' ex ma che b'aj tz'e'y qe witz te Moab tu'n, jatum najl qe xjal jawni kywitz.

⁴⁶Ay b'ek'b'il kywitze aqeye aj Moab. Aqeye in che k'ulune twitz tilb'ilal Quemós ma che najxe, qe kyky'ajale ex qe kyme'jele ma che'x q'i'n pres tuj juntl nasyon.

⁴⁷Ex tuj tq'ijlalil tzul, che ajetz wi'ne juntl maj aj Moab tu'n kyul tuj kytanmi. Aqine Dios in chin q'mante jlu. O'kxtzun jlu in yolin ti'j kysentens aj Moab kub' tu'n Qman.