Read kumam Jeremías 49 Bible Online

Jeremías 49 - kumam bible

Jeremías 49

¹Atzun tqanil lu tu'n Qman kyi'j aj Amón. ¿Minti'petzun kyk'wa'l aj Israel? ¿Minti'petzun kyk'wa'l te etzal kytx'otx'? ¿Tiqu'ntzun ma che ok qeju in che k'ulun twitz tilb'ilal Milcom, te tajwil kytx'otx' qe tiyjil Gad? ¿Tiqu'ntzun ma che najan aj Amón tuj kytanmi aj Israel?

²Kyja'tzun aqine Dios kxel nma'ne jlu: Tzul tq'ijlalil ok kyb'i' aj Amón, aqeju najl tuj tnam Rabá, tq'ajq'ajel kywi soldad in che sch'in ok kypon q'ojlel kyi'j, ex aju tnam b'i'x kb'el xitj ex k'okel q'o'n kyq'aq'al tnam ate' ti'jele. Ex che elex kylajo'n aj Israel qe aj Amón ex che okel juntl maj tajwil kytanmi, aju otoq tz'el kyi'n aj Amón tnejel. Aqine Dios in chin q'mante jlu.

³Che oq'e aqeye aj Hesbón, porke ma kub' xitj tnam Hai. Che oq'e aqeye xu'j aj Rabá. Kyq'on oke kyxb'alune ch'i'x twitz ex che wuyine, kyjaw qeline ik tza'n jun xjal lok, ex kxel q'i'n tilb'ilal dios Milcom tuj juntl nasyon, kyuk'ix qe pal in che ajb'en te ex qe xjal ma' kyoklen.

⁴¿Tiqu'n in jaw kyniman kyib'e tu'nju at kytx'otx'e chq'ajlaj tb'anilxix wen? Aqeye xjal mib'an che b'ine, o'kx nno'k qe' kyk'u'je ti'j kyq'inumab'le ma b'aj kychmo'ne ex in kyma'ne: ¿Alkye b'a'n tok tzoqpaj q'ojlel qi'j?

⁵Kyja'tzun tuj tkyaqil part ktzajel nsama'ne xob'ajil kyi'je. Aqine Dios Tajaw Tkyaqil in chin q'mante jlu. Teylex te junjun kxel ti'n tb'e ok kyel oq ex mi a'l jun k'okel chmonte kye.

⁶Ex te tib'ajxi che ajetz wi'ne juntl maj aj Amón tu'n kyul tuj kytanmi. Aqine Dios in chin q'mante jlu.

⁷Atzun tqanil lu kyi'j aj Edom, tu'n Qman aju Tajaw Tkyaqil. ¿Minti'tlpetzun xjal at kynab'l tuj tnam Temán? ¿Minti'tlpetzun jun consej kyu'n qe xjal at kynab'l? ¿Mapetzun naj tkyaqil kyojtzqib'l?

⁸Aqeye najl tuj Dedán kyex oqe, kyxi'ye ewal kyib'e kyuj toy' jul ma' kyxe', porke kb'el nxitune kytanmi qe tiyjil Esaú ok tpon tq'ijlalil ok tkub' kycastiw wu'ne.

⁹Ok in jaw chmet twitz uva, in kyaj ten junjun pnuj twitz, ok in che pon qe eleq' qonik'an, o'kx in xi kyi'n aju at tajb'en kye,

¹⁰atzun weye k'elel wi'ne tkyaqilju at kye tiyjil Esaú, kyjel q'ancha'lin kyewb'il wu'ne ex mlayx b'ant txi kyewan kyib', che b'ajel naj kykyaqil kyk'wa'l, kyuk'ix kyerman ex kyvesin, ex mi jun kyjel ten.

¹¹Che kyq'onkje qe meb'a k'wa'l wuk'ile, jaku che ok nkwentine, ex b'a'n tu'n tok qe' kyk'u'j meb'a xu'j wi'je.

¹²Chi Qman: Aqeju minti'toq tkub'il kycastiw, ma kub' kycastiw, yajtzun kyeye, ¿Mi'npetzun kub' kycastiwoye? Il ti'j kb'el kycastiwoye, mlay tzik'x ti'j.

¹³Aqine Dios kxel nma'ne jun yol axix tok wu'nx wib'e: Kb'el xitj tnam Bosra ex k'okel te jun tzqij tx'otx', che okel ten xjal xmayil kyi'j ex ktzajel kyqanin mya b'a'n kyib'aj, ax ikx kykyaqil txqantl tnam ate' tuj tkwent, noq ttx'aqan che kyjel ten te jumajx, chi Qman.

¹⁴Ma tzul jun tqanil wuk'ile tu'n Qman. At jun t-sanjel Dios ma tzul t-sma'n q'malte kye nasyon kyja': Kychmon ok kyib'e tu'n kyok tzoqpaje ti'j tnam Edom. Kyb'incham kytene tu'n tok q'oj, chi t-sanjel Dios.

¹⁵Aqeye aj Edom che okel nq'o'ne te jun nasyon mas ch'in kywitz txqantl nasyon ex che elel ik'une kyu'n xjal.

¹⁶Aju kynimb'il kyib'e ma kub' sb'unte kyeye porke in che xob'tzane kyi'j txqantl tnam. Najl qeye kyxol qe toy' pik ex kywi' qe witz ma' kywa'l, ex maske kub' kyq'o'ne kyjaye kywi' qe nmaq witz ik tza'n qe t'iw, maxtzun che tzajel tz'aqe wu'ne. Aqine Dios in chin q'mante jlu.

¹⁷Tzul xitb'il xob'ajilxix tib'aj tnam Edom. Kykyaqil qeju che ik'el b'et ttxlaj che jawil sek'paj ex che okel ten xmayil ti'j ok kylonte aju otoq b'aj ti'j.

¹⁸Ik k'okel ik tza'n tej kynaj tnam Sodoma ex Gomorra ex qe txqantl tnam kyvesin kyib' kyuk'il; mi jun xjal knajal tuj ex milpe jun xjal kpol tu'n tten noq ch'in tuj. Aqine Dios ma chin q'mante jlu.

¹⁹Noq minab'en chin tzajele ti'j, ik tza'n jun b'alun nne'tz tjaq' chk'ul ttzi nima Jordán ex in tzaj ojqelan tuj cha'x k'ul jatum in che wa'n alumaj. B'i'x che elel oq qe aj Edom wu'ne, ex wu'ne kjawil nsk'o'ne jun xjal tu'n tb'ant jlu tu'n, ex ¿alkye jun jaku pon ik tza'n weye? ¿Alkye jun jaku chin oke tuj xtis tu'n? ¿Alkye jun pastor ẍne'l jaku kub' we' nwitze tu'n tq'ojin wuk'ile?

²⁰Kyb'intze aju ma b'aj nnak'u'ne ti'j tu'n nb'inchanteye ti'j Edom, ex aju ma b'aj nximane tu'n tb'ant kyi'j qe xjal najl tuj tnam Temán: Twitz tx'otx' che xel jawo'n ik tza'n qe ẍne'l minti' kyipun, ex che b'ajel xitun xjal aj Edom kyuk'il qe kyja.

²¹Ok tkub' xitj tnam Edom, kq'ajtel kyuwxix wen, b'i'x ktzajel lu'lun tx'otx' tu'n, ex aju tq'ajq'ajel kywi xjal kb'injtzel max ttzi mar Kyaq Ke'yin.

²²Che okel tzoqpaj aj q'oj ti'j tnam Bosra ik tza'n in tzaj lipan jun t'iw kyuk'il qe tq'ab' lik'un kyten, ex tuj q'ij lu, aqeju soldad kyuw kyk'u'j tuj q'oj te Edom, ik che okel ik tza'n jun xu'j ok nnu'l itz'j tal, chi Dios.

²³Atzun tqanil lu ti'j tnam Damasco: Ma tzaj kych'ixwi xjal najl tuj tnam Amat ex Arfad, porke ma pon jun tqanil mya b'a'n kyuk'il, ma tzaj kyxob'il ex minti'tl tumel tu'n kyten tuj txub'txaj.

²⁴Minti'tl kyipun aj Damasco, ma kub' kyximan tu'n kyel oq. Ma tzaj nim kyxob'il, ma tzaj ta'w kyi'j ik tza'n jun xu'j ok nnu'l itz'j tal.

²⁵Ma kyaj kolin aju tnam b'a'n yolb'il te, jatum in che tzalaj xjal wen.

²⁶Ax tok, tuj q'ij lu aqeju ku'xun at kyxol che kyjel pale' kyuj qe cay, ex kykyaqil xinaq kyuw kyk'u'j tuj q'oj che kymel. Aqine Dios Tajaw Tkyaqil in chin q'mante jlu.

²⁷K'okel nq'o'ne tq'aq'al muro tok ti'jele tnam Damasco, ex aju q'aq' lu che b'el tz'e'y qe tja rey Ben-adad tu'n.

²⁸Atzun tqanil lu tu'n Qman kyi'j qe tiyjil Cedar ex kyi'j qe kawb'il tuj tx'otx' Hazor, aqeju kub' kyi'j tu'n Nabucodonosor aju rey te Babilonia: Kyxi'ye tu'n kyok tzoqpaje kyi'j qe tiyjil Cedar ex kyb'yo'n b'aje qe xjal najl tuj tjawitz q'ij.

²⁹Kyetzan ele kyja ex kyoke te tajwil kyalun, kyetzan ele kykyaqil kymakb'il ex qe xb'alun in che ajb'en te maqb'il ttzi kyja, kyi'n ele qe kychej camey, ex che sch'ine kyja': At xob'ajil tuj tkyaqil part.

³⁰Kyex oqe aqeye najl tuj tnam Hazor, kyxi'ye ewal kyib'e, chi Qman, porke ma b'ant ti'j tu'n Nabucodonosor aju rey te Babilonia tu'n tok tzoqpaj kyi'je.

³¹Aqine Dios kxel nma'ne kye: Kyxi'ye ex kyok tzoqpaje ti'j tnam lu aju najl tuj txub'txaj ex minti' in b'aj tk'u'j, minti' tlamel tok ex minti' pasador ti'j, tjunalx tkub'.

³²Kyelq'a'mele qe kychej camey ex kykyaqil qe kyalun. Tuj tkyaqil part che b'ajel nsputune qe xjal lu ex tuj tkyaqil part ktzajel wi'ne mya b'a'n kyib'aj. Aqine Dios in chin q'mante jlu.

³³Te jumajx k'okel tx'otx' Hazor te tzqij tx'otx' ex te kynajb'il xo'j. Mi jun kpol najal juntl maj tuj tx'otx' lu ex milpe jun xjal kpol tu'n tten noq ch'in tuj.

³⁴Tej ttzyet tkawin Sedequías tuj tnam Judá, tzaj tma'n Qman tqanil lu te Jeremías, ti'j nasyon Elam:

³⁵Aqine Dios aju Tajaw Tkyaqil kxel nma'ne jlu: Kb'el ntoqine kyxob'l plech aj Elam, aju kyq'ojb'il nimxix in ajb'en.

³⁶Tuj tkyajil pak' t-xe kya'j ktzajel wi'ne kyq'iq' kyuwxix wen ti'j tnam lu, tu'ntzun kyb'aj sputj aj Elam tuj tkyaqil part, ex kyuj kykyaqil nasyon che pol klolte kyib'.

³⁷Che tzajel lu'lun aj Elam wu'ne kywitz aj q'oj kyi'j, aqeju nno'k tilil kyu'n tu'n kykub' b'yonte kye, ktzajel nsama'ne nimxix ntx'u'jile ex k'ixb'isab'l kyib'aj, ex che xel nsama'ne soldad q'ojlel kyi'j okxi kynaj kykyaqil. Aqine Dios in chin q'mante jlu.

³⁸Kymel kyrey wu'ne, kyuk'ix qe nejenel ate' kyxol, ex kb'el nq'o'ne nq'uqb'ile te kawb'il tuj tnam Elam. Aqine Dios in chin q'mante jlu.

³⁹Ex te tib'ajxi che ajetz wi'ne juntl maj aj Elam tu'n kyul tuj kytanmi. Aqine Dios in chin q'mante jlu.