Read kumam Jeremías 51 Bible Online

Jeremías 51 - kumam bible

Jeremías 51

¹Chi Qman kyja': Ktzajel nsama'ne jun kyq'iq' kyuwxix wen te xitb'il te tnam Babilonia, ex tu'n kynaj qe xjal najl tuj, aqeju aj q'oj wi'je.

²Che tzajel nsama'ne xjal te najchaq, tu'n t-xi kyi'n tkyaqil ju at tuj tnam Babilonia ik tza'n in xi tiqan kyq'iq' ttxk'omil triw, ex minti' xjal mi ti'xti kyjel ten tuj. Ok tpon tq'ijlalil tu'n kynaj, che okel tzoqpaj aj q'oj kyi'j tuj tkyaqil part.

³Kyxqinin ele xob'l plech, aqeye b'a'n che xo'ne plech, kyq'o'nke k'uxb'il kyi'je aju in ajb'en tuj q'oj. Mi'n tzaj q'aq'an kyk'u'je kyi'j qe ku'xun ate' tuj Babilonia, kyb'yonkuye kykyaqil qe soldad.

⁴Kyuj kykyaqil tnam kye aj Caldeo che b'ajel xayu'n xjal tu'n lans ex che kyjel pale' kyuj cay kyimni qe.

⁵Na'nx kykyaj nkoline aj Israel ex aj Judá, aqine Dios aju Tajaw Tkyaqil, maske ma noj tuj kytanmi tu'n il ex maske o che b'inchan il nwitze, aqine Dios Xjan kye aj Israel.

⁶Kyex oqe tuj Babilonia, kyklom kyib'e alkye jaku b'ant tklonte tib', tu'ntzun mi'n kykyime tu'n tlaj kyil aj Babilonia. Ma pon tq'ijlalil tu'n t-xelin tu'n Qman ti'j kyb'inchb'en mya b'a'n ex tu'n tkub' kycastiw ik tza'nx kyb'inchb'en.

⁷Ik tten Babilonia tuj nq'ab'e ik tza'n jun tal copa q'an pwaq ttx'otx'il tku'x vin tuj, in chyo'n kywi' kykyaqil xjal twitz tx'otx' tu'n, kyja'tzun b'i'x tzakj kynab'l xjal najl kyuj kykyaqil nasyon, aqeju xi kyk'a'n vin lu.

⁸Te jurat naj ma kub' tz'aq tnam Babilonia ex b'i'x ma b'aj xitj. Kyok tene oq'el ti'j, kyi'ntze remey te q'anb'il te ẍil ti'j, qa jaku b'anix.

⁹Ma tz'ok qq'o'ne remey ti'j Babilonia ex minti' ma b'anix, kykolin kyaje, qo ex tzalu, ku taj teylex te junjun tuj ttanmi, porke ma'xix ju tcastiw ma kub' ex b'i'x ma naj te jumajx.

¹⁰Ma txi tb'incha'n Qman qi'j; chux qeye, qo' q'malte tuj tnam Sión aju ma tb'incha Qman aju Qdios.

¹¹Ma kub' t-ximan Qman tu'n tkub' t-xitun tnam Babilonia, ex ma txi tma'n kye qe rey te tnam Media tu'n kyq'ojin ti'j tu'ntzun t-xelin tu'n Qman kyi'j, ex tu'n t-xelin tu'n ti'j ju o kyb'incha ti'j tja. Kyjaqu'n b'aje kywi' qe plech ex kytzyume qe maqb'il in che ajb'en tuj q'oj,

¹²Kyyek'un jawe bander tu'n kyok tzoqpaje ti'j muro tok ti'jele tnam Babilonia, kyq'onkuye mas nim kyajlal soldad, kyq'onkuye txqan soldad te xq'uqil, ex e kykub' ten txqantl tuj ewaj noq list kyten, porke kb'antel tu'n Qman aju o kub' t-ximan tu'n tb'inchante kyi'j qe xjal najl tuj tnam Babilonia.

¹³Aya tnam Babilonia tkub'a kyxol qe nima matijxix ex nimxix tq'inumab'la at, ya ma pon q'ij tu'n tnaja, ma pon b'aj q'ij tu'n ttena.

¹⁴Ate Qman aju Tajaw Tkyaqil ma txi tma'n jun yol axix tok tu'nx tib': Che ul nim aj q'oj ti'ja wu'ne ik tza'n kyb'aj ẍplon, ex kxel kyb'itzan b'itz te kamb'ab'l ti'ja.

¹⁵Tu'n tipumal Qman o b'ant tx'otx', tu'n tnab'l kub' tq'o'n tq'uqb'il ex tu'n tojtzqib'l xi tlik'pu'n kya'j.

¹⁶Ok tq'ajt Dios in tzaj julin a' twitz kya'j, in tzaj ti'n muj tuj ttxa'npun enter tx'otx' tu'n tjapun twitz kya'j, in tzaj qoptz'aj tqan q'ankyoq tu'n tuj tmijil tqan jb'al ex nne'tz ti'n kyq'iq' jatum k'u'n tu'n.

¹⁷Kykyaqil xjal minti' kynab'l ex minti' nne'l kynik' ti'j. Ktzajel kych'ixwi qeju in che kub' b'inchante tilb'ilal tu'n tok kydiosin, tu'nju puro sb'ul qe tilb'ilal ex mya itz' qe.

¹⁸Noqx gan qe ex minti' kyajb'en; ok tpon tq'ijlalil tu'n ttzaj jwisi tu'n Qman, che najel.

¹⁹Mya ik tten aju Tdios Jacob, aju b'inchante tkyaqil aju at. Aku jaw sk'onte kye aj Israel te jun tetzb'il, ex atzun tb'i jlu, Qman Tajaw Tkyaqil.

²⁰Aya tnam Babilonia ik ttena tuj nq'ab'e ik tza'n jun martiy, ex ik tza'n qe nmakb'ile in che ajb'en tuj q'oj, ajb'ena wu'ne tu'n kykub' xitj qe nasyon ex qe kawb'il.

²¹Ajb'ena wu'ne tu'n kynaj qe chej, kyuk'ix qe xjal kyjax kyib'aj, kyuk'ix qe carwaj ex qe yukul kye.

²²Ajb'ena wu'ne tu'n kynaj qe xinaq ex qe xu'j, qe tij xjal ex qe q'a, qe ku'xun ex qe q'apoj,

²³ajb'ena wu'ne tu'n kynaj qe pastor kyuk'ix qe kyẍne'l, qe ch'okil tx'otx' kyuk'ix qe kywakẍ, qe kawil ex qe xjal at kyoklen kytxlaj.

²⁴Ex kywitzxe kb'el nq'o'ne tcastiw tnam Babilonia ex kykyaqil aj Caldeo, tu'n tlaj tkyaqil mya b'a'n kyb'incha ti'j tnam Sión. Aqine Dios in chin q'mante jlu.

²⁵Aj q'oj qine ti'ja aya tnam Babilonia. Ik ttena ik tza'n jun witz xitul tkyaqil. Ma b'aj t-xituna tkyaqil twitz tx'otx'. Aqine Dios kxel nma'ne jlu: Kxel nnuqpi'ne nq'ab'e tu'n tkub' tcastiwoya wu'ne, ktzajel ntolina twitz jun pik ma' twa'l ex k'okela wu'ne ik tza'n jun witz otoq b'aj tz'e'y.

²⁶Mi jun ab'j ktzajel q'i'n ti'j ttx'aqan tnam Babilonia tu'n kyjaw b'inchet qe ja juntl maj tzalu, te jumajx k'okel tnam te tzqij tx'otx'. Aqine Dios in chin q'mante jlu.

²⁷Kyyek'un jawe bander twitz kya'j, kyq'ajtzan oke chun kyuj qe nasyon, kyb'inchame kyten qe nasyon tu'n kyok tzoqpaj q'ojlel ti'j tnam Babilonia, kychmon oke qe nasyon Ararat, Mini ex Asquenaz tu'n kyok tzoqpaj ti'j, kyq'o'nke jun nejenel tu'n tkub' nej tuj q'oj. Che ojqelinx qe chej kyu'ne ik tza'n in che'x lipan qe ẍplon nimxix kyajlal.

²⁸Kyb'inchame kyten qe nasyon tu'n kyok tzoqpaj ti'j; aqeju rey te Media kyuk'ix qe gobernador ex qe nejenel at kyxol ex kykyaqil qe xjal jatum in che kawin.

²⁹Ma tzaj lu'lun tx'otx' ex in yukch wen, porke ma japun tu'n Qman aju ximamaj tu'n ti'j Babilonia, tu'n tok te jun lugar tzqij tx'otx' minti' xjal tuj.

³⁰Qe soldad te Babilonia ma txi kykolin tu'n kyq'ojin ex ma tz'okx kylamon kyib' kyuj qe ja te kykolb'il kyib', ya minti'tl kyipun, ma che ok ik tza'n qe xu'j. Ma tz'ok q'o'n tq'aq'al kyja ex ma che b'aj piẍj qe pasador tok kyi'j tlamel tnam.

³¹Tkyaqil ttxa'nile tnam in che tzaj qe sanjel q'malte tqanil te rey te Babilonia qa otoq kub' ti'j enter tnam.

³²Ma che tzyet qe xajb'il a' kyu'n aj q'oj, ma tz'ok kyq'o'n tq'aq'al tqan ajlaj in ch'iy tuj sob'an ex ma tzaj nim kyxob'il qe soldad te Babilonia.

³³Porke ate Qman aju Tajaw Tkyaqil ex Kydios aj Israel in tma'n kyja': Ik tten Babilonia ik tza'n jun pe'n jatum in kub' wab'at triw tu'n tel ttxk'omil, ex ch'ix tul kanun tq'ijlalil tu'n tok chmet twitz awal.

³⁴Che chi aj Jerusalén, aqeju najl tuj tnam Sión: Ma qo b'aj tpaẍu'n Nabucodonosor aju rey te Babilonia, ex ma qo'x tchyo'n; ma qo kyaj tq'o'n ik tza'n jun laq minti' tuj. Ik tten ik tza'n jun nintz txkup, ma qo'x tb'alq'u'n, ma noj tk'u'j tu'n qq'inumab'l ma tz'el ti'n qe ex ma qo etz tlajo'n tuj qtanmi. E t-xi kychjo'n aj Babilonia aju mya b'a'n o kyb'incha qi'j ex e t-xi kychjo'n aj Caldeo tu'nju nim xjal kub' kyb'yo'n.

³⁵

³⁶Chi Qman kyja': Aqine chin xel b'inchante kyi'je, kxelil wu'ne kyi'j aj q'oj kyi'je, b'i'x che ajel tzqij qe nima wu'ne ex qe twi a' at tuj Babilonia.

³⁷Noq ttx'aqan tnam Babilonia kyjel ten; te kynajb'il xo'j k'okel ex minti' xjal knajal tuj. Kykyaqil xjal che jawil sek'paj ti'j ex che xmayil ti'j.

³⁸Kykyaqil aj Babilonia che jawil wuyin ik tza'n qe b'alun, ex che jawil tzanun ik tza'n qe tal b'alun.

³⁹Oktzun ttzaj el kyk'u'j wen, kb'el nq'o'ne jun nintz wa'n kywitz tuk'ix kyk'a vin tu'ntzun kytzalaj ex tu'n tchyo'n kywi'; ex ktzajel kywatl ex mi'n tzul kynab'l te jumajx. Aqine Dios in chin q'mante jlu.

⁴⁰Che xel wi'ne ik tza'n in che'x q'i'n qe tal ẍne'l, qe tman chip ex qe tman ẍne'l tuj b'iyb'il kye.

⁴¹Ma kub' xitj ex ma kub' ti'j tnam Babilonia aju puro b'a'n yolb'ilte tuj tkyaqil twitz tx'otx'. B'i'x in che jaw sek'paj qe nasyon ok kylonte aju otoq b'aj ti'j.

⁴²Ma tz'okx mar tuj tnam Babilonia ex ma kyaj mulq'aj tjaq' a'.

⁴³Qe tnam at tuj tkwent ma che ok te jun tzqij tx'otx' xob'ajilxix, jun tx'otx' jumajx tzqij jatum mi jun xjal knajal tuj, ex milpe jun xjal tu'n tten noq ch'in tuj.

⁴⁴Kb'el tcastiw Bel wu'ne, aju tilb'ilal kydios xjal at tuj Babilonia, k'elel wi'ne te tkyaqilju otoq tz'el ti'n kye xjal nej, ex mlayx che pon juntl maj qe xjal te txqantl nasyon tuj. Kb'el xitj muro tok ti'jele tnam Babilonia.

⁴⁵Kyetze tuj tnam Babilonia aqeye xjal etzan wu'ne, ex teylex te junjun klom tib' tu'n mi'n tkyim, ex nimxix ntx'u'jile ma tzaj.

⁴⁶Mi'n che jaw sek'paje ex mi'n tzaj kyxob'ile tu'nju yol in b'et kyxol xjal tuj tx'otx' lu; junxitl tten yol in b'et kyxol xjal junjun ab'q'i, at yol qa in che q'ojin xjal tuj tnam ex qa in che q'ojin qe kawil kyxolx.

⁴⁷Kyja'tzun tzul tq'ijlalil che b'ajel nxitune qe tilb'ilal ate' tuj Babilonia. Ktzajel tch'ixwi tkyaqil tx'otx' Babilonia ex kykyaqil kyimni che b'el pale' tuj tnam.

⁴⁸Che tzalajel kya'j ex tx'otx' tuk'ix tkyaqilju at kywitz ok tkub' xitj tnam Babilonia, porke tuj tx'otx' tuj tb'anq'ab' q'ij che tzajel aj q'oj xitul te. Aqine Dios in chin q'mante jlu.

⁴⁹Kb'el xitj tnam Babilonia tu'n tlaj tkub'len kyb'yo'n aj Babilonia qe aj Israel ex tu'n kylaj qe xjal kub' kyb'yo'n tuj enter twitz tx'otx'.

⁵⁰Kyel oqe ex mi'n che we'ye aqeye ma che tzoqpaj ex minti' ma che kyime; che ximane ti'j Qman ok kylaq'e'ye najchaq ex kyna'ntze tnam Jerusalén.

⁵¹Kyeye in kyma'ne kyja': Ma tzaj qch'ixwiye tu'nju in che yasun xjal qi'je, nimxix qch'ixwiye ma tzaj, porke ma che okx stranjer xjal kyuj Lugar Xjan te tja Qman, che chiye.

⁵²Kyja'tzun chi Qman kyja': Tzul tq'ijlalil che b'ajel nxitune qe tilb'ilal ate' tuj Babilonia, ex tuj tkyaqil tx'otx' te Babilonia che ayayal xjal tu'n ẍil tok kyi'j.

⁵³Maske che jax aj Babilonia max twitz kya'j tu'n tjaw kyb'incha'n qe ja ma' kywa'l te kykolb'il kyib', pero che xel nsama'ne aj q'oj kyi'j tu'n kyb'aj xitun. Aqine Dios in chin q'mante jlu.

⁵⁴Kyb'inxe tq'ajq'ajel kywi xjal tuj Babilonia in che sch'in tu'n ta'w k'ixk'oj ex in che wuyin tuj tx'otx' kye aj Caldeo,

⁵⁵porke ma kub' xitun tnam Babilonia tu'n Qman ex b'i'x ma we' tq'ajq'ajel kywi xjal tuj tnam. Ik kyten aj q'oj kyi'j ik tza'n mar in pulin wen.

⁵⁶Ma che ul aj q'oj xitulte tnam Babilonia, ma che tzyet qe soldad kyu'n ex ma b'aj kytoqin qe kyxob'l plech. Porke in kub' tq'o'n Qman Dios kycastiw xjal ik tza'nx kyb'inchb'en.

⁵⁷Ate Rey, aju tok tb'i Qman Tajaw Tkyaqil, in tma'n kyja': Kchyo'l kywi' qe nejenel te Babilonia wu'ne, ikx qe aj nab'l ex qe kawil at kyxol, kyuk'ix qe xjal ma' kyoklen ex qe soldad, ex ok ttzaj kywatl, ya mi'n tzul kynab'l te jumajx.

⁵⁸Aqine Dios aju Tajaw Tkyaqil in nma'ne jlu: Che b'el xitj kykyaqil muro ma' kywitz tok ti'j tnam Babilonia ex k'okel kyq'aq'al qe tlamel tnam ma' kywa'l; noqx gan otoq che aq'nan tnam xjal ex otoq che sikt qe nasyon ti'j aq'untl lu, noq tu'n tajb'en te twa q'aq'.

⁵⁹Tuj tkyajin ab'q'i ttzyetlen tkawin Sedequías aju rey te Judá, xi t-sama'n Jeremías jun tqanil tu'n t-xi ti'n Seraías aju tky'ajal Nerías ex tal tchman Maasías, tej t-xi' tuj Babilonia tuk'il rey Sedequías, tu'nju atzun Seraías b'inchalte ti'j jatum tu'n ttan rey Sedequías.

⁶⁰Ku'xtzun ttz'ib'an Jeremías tuj jun libro tkyaqil tqanil ti'j k'ixb'isab'l attoq ttzajel tib'aj tnam Babilonia ex tkyaqilju q'mamaj ti'j tnam lu.

⁶¹Ex xi tma'n Jeremías te Seraías kyja': Ok tpona tuj tnam Babilonia, noq tzik' tna'l tu'na tu'n tjaw t-sch'i'na tkyaqil tqanil lu.

⁶²Ex kxel tma'na kyja': Aya Nman, o tmaya tu'n tkub' t-xituna lugar lu ex mi jun kyjel anq'in tuj, mi qe xjal ex mi qe alumaj, porke k'okel tu'na te tzqij tx'otx' te jumajx.

⁶³Oktzun tb'aj t-sch'i'na libro lu, k'alo'nka ti'j jun ab'j ex xo'nxa tuj nima Éufrates,

⁶⁴ex b'ix txi tma'na kyja': Kyja'xtzun kyjel mulq'aj tnam Babilonia tjaq' a', ex mlay jaw b'inchet juntl maj tuj xitb'ilte ktzajel t-sama'n Qman. Qe xjal najl tuj b'i'x che najel. Atzun in pon b'aj qe tyol Jeremías tzalu.