Read kumam Jeremías 6 Bible Online

Jeremías 6 - kumam bible

Jeremías 6

¹Kyex oqe tuj Jerusalén aqeye aj Benjamín, ex kyjyome jun lugar jatum tu'n kyklete. Kyq'ajtzanke chun tuj tnam Tecoa, kyyek'un jawe jun techal tuj Bet-haquerem, tu'nju at jun mya b'a'n ex jun matij xitb'il ktzajel tuj tx'otx' tuj tb'anq'ab' q'ij.

²Tb'anilxix ke'yin aju tnam Sión, ex kb'el nxitune.

³Che ul qe rey kyuk'ix qe kysoldad q'ojlel ti'j, kb'el kyq'o'n kyja xb'alun ja ti'jele tnam, ex teyle junjun kb'el ten noq jatum taj.

⁴Che chi aj q'oj in kyma'n: Qb'incham qten tu'n qok tzoqpaj q'ojlel ti'j tnam lu. Chux qeye, e qok tzoqpaj kyi'j ok tpon chilkuq'ij, ya ma tz'ok qax ex nib'an qok yupj.

⁵Kyja'tzun, qonik'an e qok tzoqpaj ti'j ex e tb'aj qxitun qe kyja ma' kywa'l te kykolb'il kyib'.

⁶Ate Qman aju Tajaw Tkyaqil ma tzaj tma'n kyja': Kytx'emin jawe qe tze' ex kyb'incha'n jawe kyxwetzb'ile tu'n kyok tzoqpaje ti'j tnam Jerusalén. Ya b'anin ti'j tu'n tkub' tcastiw, porke tuj tnam lu nim mya b'a'n in kyb'incha'n xjal kyi'j txqantl.

⁷Ik tza'n jun twi a' kukx in b'et wen, ax ikxtzun kukx in kyb'incha'n xjal mya b'a'n tuj tnam Jerusalén; o'kx in b'injtz tqanil ti'j in che elq'an xjal ex in kub' kyb'yo'n kyuk'il. Kukx in wile ẍil kyi'j xjal ex nim in che k'ixb'isanjtz.

⁸Tz'elx kynik'e ti'j aqeye aj Jerusalén, qa minti' ma txi kyb'i'ne nyole, k'elel npa'n wib'e kyi'je, ex aju kytanmiye k'okel te jun tzqij tx'otx' minti' xjal kyjel ten tuj.

⁹Ate Qman aju Tajaw Tkyaqil chi in tma'n kyja': Qe aj Israel otoq che kyaj ten, che xel b'aj q'i'n tuj juntl tnam ik tza'n in ku'tz sukwi'n twitz uva otoq kyaj ten, tu'ntzun mi jun tu'n tkyaj.

¹⁰Atzun weye xi ntzaq'we'ne: Nman, ¿al e kxel nma'ne tqanil tu'ntzun kyb'inte? Qa ma txi nma'ne tqanil kye, mer ik tza'n lamo'n tuj kyẍkyin ex mlayx txi kyb'i'n; in che xmayin ti'j tyola ex mlayx che tzalaj ti'j.

¹¹Nimxix nq'oje ma tzaj kyi'j, ik tza'n teya tq'oj. Ex mlay b'ant tu'n mi'n t-xi nma'ne. Chi Qman in tma'n: Kxel nchitune nq'oje kyib'aj qe k'wa'l ate' tuj cay ex kyib'aj qe ku'xun junx kychmon kyib'. Qe chmilb'aj che xel q'i'n pres kyuk'ix kyxu'jil, ax ikx qe xjal ma che tijin wen.

¹²Qe kyja tuk'ix kytx'otx' ex qe kyxu'jil, junxitl kyajaw k'okel, porke kb'el nq'o'ne kycastiw qe xjal najl tuj tnam lu, aqine Dios in chin q'mante jlu.

¹³Kykyaqil xjal, tza'nx qeju ma' kyoklen ax ikx qeju ch'in kyoklen, o'kx tok kyk'u'j ti'j tu'n tknet kyq'inumab'l mya tuj tumel, tza'nx qe t-sanjel Dios ax ikx qe pal, kykyaqil b'a'n che sb'un.

¹⁴Noq ch'in remey nno'k kyq'o'n kyi'j qe ẍil tok kyi'j qe xjal etzan wu'ne, in kyma'n qa tkyaqil b'a'n ta' ex mya b'a'n ta'.

¹⁵¿Ope tzaj kych'ixwi tu'n tlaj kyb'inchb'en mya b'a'n? Minti' o tzaj kych'ixwi, minti' in japun kykyaqal tu'n tlaj kych'ixwi. Kyja'tzun, ok tkub' kycastiw wu'ne, che b'el tz'aq ex che najel ik tza'n o che naj txqan. Aqine Dios in chin q'mante jlu.

¹⁶Chi Qman in tma'n: Che we'kuye kyuj qe b'e ex kyke'yinxe, kyqaninxe jatum ta' ojtxi b'e, aju tb'anil b'e; che b'ete tuj ex knetel ojlab'l kyu'ne, chi Qman. Atzun kye in kyma'n: Mi'n qaje tu'n qb'ete tuj.

¹⁷E kub' nq'o'ne qe xq'uqil tnam tu'n t-xi kyma'n kye xjal kyja': Kyb'inxe tq'ajq'ajel chun te q'ojb'il. Atzun kye xjal kyma: Mi'n, mi'n qaje tu'n t-xi qb'i'ne.

¹⁸Kyja'tzun kyb'intze aqeye nasyon, b'ix kyb'iye ti kb'ajel kyi'j qe xjal etzan wu'ne.

¹⁹Kyb'intze aqeye xjal ate' tuj tkyaqil twitz tx'otx': Tzul nsama'ne jun yajb'il tib'aj tnam lu, tu'nju ma kub' kyximan tu'n kyb'inchante mya b'a'n, minti' ma txi kyniman nyole ex ma tz'el kyik'un qe nleye.

²⁰¿Ti tajb'en weye aju storak in kub' kypatune, tzajni tuj tx'otx' Sabá, tuk'ix juntl wiq awal at nim tk'ok'jal tzajni tuj juntl tnam najchaq? Minti' in chin tzalaje ti'j kyoyaje in kub' kypatune, ex mi ti'j chojb'il in tzaj kyq'o'ne weye.

²¹Tu'ntzun jlu, chi Qman in tma'n kyja': Kb'el nq'o'ne jun tolsab'l tuj tnam lu, tu'ntzun kykub' tz'aq qe mamb'aj ex qe k'wa'lb'aj tuj; qe vesin ex qe amiw, kykyaqil che kymel.

²²Chi Qman in tma'n: Max najchaq, tuj tx'otx' tuj tb'anq'ab' q'ij in b'ant tten tu'n ttzaj jun nasyon matijxix.

²³Ma b'ant kyten tuk'il kyxob'l plech ex kylans; puro jawniqe, minti' ch'in in tzaj q'aq'an kyk'u'j; aju tq'ajq'ajel kyqan ik tten ik tza'n tq'ajq'ajel mar in julin. Kyjaxsa'n qe kyib'aj chej, ya txolin kyten tu'n kyok tzoqpaj q'ojlel ti'j tnam Sión, chi Qman.

²⁴Che chi xjal tuj tnam Jerusalén kyja': Ma qb'iye tqanil ex ma tz'el b'aqchaj qq'ab'e, ma tzaj nim qb'ise ex ma qna'ye ta'w ik tza'n jun xu'j nnu'l itz'j tal.

²⁵Mi'n che exe tuj kojb'il, mi'n che b'ete kyuj qe b'e, porke ate' aj q'oj q'i'n spad kyu'n, ex tuj tkyaqil part at xob'ajil.

²⁶Aqeye nxjalile, kyq'o'nke kyxb'alune ch'i'x twitz te jun techal kyb'ise, ex kyb'alq'inx kyib'e tuj tza'j, che b'isune wen ex che oq'e kyuwxix, ik tza'n in kyb'incha'ne ok tkyim o'kxku jun kyk'wa'le, ex ch'ix tul naj aju kb'el xitunte qtanmi.

²⁷Chi Qman tzaj tma'n weye: Kxel nma'ne teya tu'n kyok tq'o'na tuj malb'il qe xjal etzan wu'ne. Che tke'yin b'aja tu'ntzun tel tnik'a ti'j tza'n in che b'et.

²⁸Kykyaqil xjal lu mib'an che b'in; noq in che si'min yol kyi'j xjal ex puro b'inchal mya b'a'n qe; ik kyten ik tza'n q'an k'uxb'il ex ik tza'n k'uxb'il, porke puro kyuw kyanmi.

²⁹In xupin xupb'il q'aq' kyuw wen, aju in ajb'en kyu'n qe tx'inol k'uxb'il, ex noq o'kx a plom in kub' ulj tu'n q'aq', minti' in kyaj ten tb'anil saq pwaq tjunalte, noqx gan nno'kx q'ot tuj q'aq' tu'n tel ttz'ilil ti'j, porke mlayx tz'el b'aj ttz'ilil. Iktzun qe xjal b'inchal mya b'a'n mlay che kub' naj.

³⁰Kyja'tzun k'okel q'o'n kyb'i “Ttx'aqan saq pwaq minti' tajb'en” porke ma che el ik'un tu'n Qman.