Read kumam Lamentaciones 1 Bible Online

Lamentaciones 1 - kumam bible

Lamentaciones 1

¹Aju tnam nojni kyu'n xjal nej, ma kyaj ten tjunalx minti' xjal tuj. Aju tnam ma' toklen kyxol txqantl nasyon nej, ma tz'ok mer ik tza'n jun meb'a xu'j. Aju tnam in kawin kyib'aj txqantl nasyon nej, ja'lo ma kyaj ten tjaq' tkawb'il juntl nasyon.

²In xjiq'b'an tu'n oq'el tkyaqil qonik'an; in ku'tz ta'l twitz ti'j tq'o'tx. Kyxol kykyaqil qeju e k'ujlante te mi a'l jun kye in tzaj q'uqb'ante tk'u'j. Kykyaqil qe tamiw ate' nej, ma che ok meltz'aj ti'j ex ma che ok te aj q'oj ti'j.

³Nimxix in che k'ixb'isanjtz qe aj Judá ex ma che okx q'o'n tjaq' aq'untl kyuwxix, ax ikx ma che'x q'i'n tuj juntl nasyon najchaq. Qe tnam xjal lu ma che pon najal kyxol txqantl nasyon, ex minti' in knet ch'in ojlab'l te kye. Ma che pon knet kyu'n qe xjal e ok lpe' kyi'j tu'n kytzyet, ex ma b'aj kytxolb'an kyib' kyi'jele tu'n mi'n kytzoqpaj.

⁴B'isb'ajilxix kyke'yinx qe b'e in che pon tuj tnam Sión, ex mi jun kyja' t-xi' kyuj qe ninq'ij. Minti'tl xjal in che b'et kytzi' tlamel tnam, in che oq' qe pal, in b'aj kyk'u'j qe q'apoj ate' tuj, ex nim k'ixk'oj nnik'x kyu'n aj Jerusalén.

⁵Qe aj q'oj kyi'j in che kawin kyib'aj, aqeju ik'ul kye in che tzalaj wen tu'nju ate Qman ma b'aj k'ixb'isante kye, tu'nju nim il o kyb'incha. Qe kyk'wa'l ma che'x tzyu'n ex ma che'x q'i'n kyu'n aj q'oj tuj juntl nasyon najchaq.

⁶Tkyaqilju tb'anil ke'yin at tuj tnam Sión ma kub' naj; qe nejenel kyxol ik kyten ik tza'n qe masat, in che jyon k'ul te kywa ex minti' in knet kyu'n; ya minti'tl kyipun tu'n kyel oq kywitz qeju lajol kye.

⁷In tzaj kyna'n aj Jerusalén aju b'is ex k'ixk'oj otoq tzaj kyi'j ex in tzaj kyna'n tkyaqilju kyq'inumab'l o ten ojtxi; ex in tzaj kyna'n tej tkub' kyi'j kyu'n aj q'oj ex minti' jun o tz'onin kyi'j. Tej tok kyke'yin qe aj q'oj otoq kub' xitj tnam e xmayin ti'j.

⁸Nimxix il ma kyb'incha aj Jerusalén, kyja'tzun ma che ok ik tza'n jun ti'xti puro tz'il. Aqeju in che niman kye nej, atzun qe in che el ik'unte kye ja'lo, porke ma kyil in che ch'ixwi ik tza'n jun xjal minti' t-xb'alun tok. Kyja'tzun in che oq' ex nne'l kyewan kywitz tuk'il nim kych'ixwi.

⁹Q'ancha'l tz'il ti'jxi kyxb'alun; ik kyten ik tza'n jun xu'j in tz'ilix tu'n ẍwo'j, ex minti' e ximan ti'j qa te mankb'il at tu'n tkub' kycastiw. Atzun ja'lo minab'en ma che kub' tz'aq ex mi a'l jun b'a'n tq'uqb'ante kyk'u'j, ex in kyma'n kyja': Qman Dios, ke'yintza aju yajb'il qeye, qe aj q'oj qi'je ma jaw kyniman kyib', che chi.

¹⁰Qe aj q'oj kyi'j ma tz'el kyetzan tkyaqil kyq'inumab'l at tuj Jerusalén. Qe xjal mya nimal Dios qe e ilwaj tej kyokx tzoqpaj tuj tjaya, aqeju tzaj tma'na kye minti' tu'n kyokx tuj ju lugar jatum in kub' kyb'uyin kyib' qe xjal etzan tu'na.

¹¹Kykyaqil xjal najl tuj tnam in che oq' ex in che jyon ti'j kywa; xi kyq'o'n kyq'inumab'l tu'n tknet kywa tu'ntzun kyanq'in ch'intl. Qman, ke'yintza, nimxix in qo el ik'une kyu'n xjal.

¹²Aqeye in che b'et tuj b'e, ¿minti'pe in tzaj q'aq'an kyk'u'je qi'je? Che tenkuye ximal ti'j qa at jun in k'ixb'isanjtz ik tza'n qeye, nimxix in qo k'ixb'isanjtze wen. Ma tzaj t-sama'n Qman aju k'ixb'isab'l lu qib'aje tej saj tq'oj qi'je.

¹³Max twitz kya'j ma tzaj t-xo'n Qman jun q'aq' qi'je ex b'i'x ma che tz'e'y qb'aqile tu'n; ma kub' tq'o'n jun k'ob'il tuj qb'eye ex b'i'x ma qo aj pak'chaje tu'n; ma qo kyaj koline tu'n ex tuj enter q'ij ato'ye tuj k'ixk'oj.

¹⁴Ma til Dios ju qile ex ma kub' tk'alo'n tu'n tq'ab' ex ma jax tq'o'n tib'aj qqule ik tza'n jun yuw; tu'ntzun jlu ma b'aj qipune. Ma qo'x q'o'ne tuj kyq'ab' aj q'oj, aqeju mlay qo xkye'ye kyi'j.

¹⁵Najchaq ma che el tlaq'b'a'n Qman ti'j ju tnam Jerusalén kykyaqil qe xjal kyuwxix kyk'u'j, aqeju in che kolintoq qi'je. Tzaj tchmo'n txqan soldad q'ojlel qi'je tu'ntzun kykub' b'yo'n qe xinaq kyuwxix kyk'u'j ate' quk'ile. Aju tnam Judá ma b'aj wab'an tu'n Qman ik tza'n in b'aj wab'an twitz uva tu'n tel ta'l.

¹⁶Tu'ntzun jlu in qo oq'e wen. Nne'l txutin ta'l qwitze, mi a'l jun b'a'n ttzaj q'uqb'ante qk'u'je, mi a'l jun b'a'n ttzaj q'onte qipune. Tuj meb'ayil ma che kyaj qe qxjalile, porke aju aj q'oj qi'je masxix tipun qwitze.

¹⁷Qe aj Jerusalén in xi kynuqpi'n kyq'ab' tu'ntzun kytzaj onin, ex mi jun in tzaj q'uqb'ante kyk'u'j. Ma tzaj tma'n Dios tu'n tb'aj kytxolb'an kyib' qe aj q'oj kyi'j qe tiyjil Jacob; aju tnam Jerusalén ma tz'ok kyq'o'n ik tza'n jun ti'xti puro ik'b'ilxix.

¹⁸Tuj ttxolil ma tb'incha Dios jlu qi'je, porke minti' o txi qnimane qe tmandamyent. Qo kyb'intze kykyaqile aqeye tnam ex kyke'yin oke aju k'ixk'oj qi'je. Qe ku'xun ex qe q'apoj ate' qxole ma che'x q'i'n pres tuj juntl nasyon najchaq.

¹⁹Xi qqanine onb'il kye qeju mojl qyole kyuk'il nej, ex noq ma qo kub' sb'u'ne kyu'n. Qe pal ex qe tij xjal ate' qxole ma che kyim tuj tnam tej in che jyontoq kywa tu'n kyanq'in ch'intl.

²⁰Qman, ke'yintza aju ta'w b'is qi'je. In qna'ne mer ik tza'n kjawitz oq qanmiye. Ok in qo ok tene ximal ti'j tu'nju minti' ma txi qnimane tmandamyenta, in tzaj ta'w tuj qanmiye. Ti'jxi tnam nim xjal in che kub' b'yo'n tu'n spad, atzun tuj tnam nim xjal in che kyim tu'n tx'u'j yab'il.

²¹In kyb'i'n xjal in qo oq'e, ex mi a'l jun in tzaj q'uqb'ante qk'u'je. Kykyaqil aj q'oj qi'je b'a'n kyu'n aju mya b'a'n ma tzaj qi'je, ex ma che jaw tzalaj tu'nju ma tb'inchaya jlu qi'je. Nman, kuchiwt tu'n tul naj tq'ijlalil castiw aju b'anin ti'j tu'na, tu'ntzun tkub' kycastiw ik tza'n qeye ma kub' tq'o'na qcastiwoye.

²²Ke'yintza tkyaqil kyb'inchb'en mya b'a'n; b'inchama kyi'j ik tza'n ma tb'inchaya qi'je tu'n tlaj qile, ex nimxix in qo oq'e ex ma b'aj tipun qanmiye.