Read kumam Lamentaciones 2 Bible Online

Lamentaciones 2 - kumam bible

Lamentaciones 2

¹Nimxix te Dios tq'oj ma tzaj ex b'i'x ma kub' qlolj tuj tnam Jerusalén tu'n. Ma naj kyajwalil aj Israel tu'n Qman, mer ik tza'n twitz kya'j ma tzaj tz'aq tu'n tkub'il twitz tx'otx'; tuj q'ij tej ttzaj tq'oj minti' tzaj q'aq'an tk'u'j ti'j tja at tuj Jerusalén.

²Ma kub' t-xitun Qman kyja kykyaqil aj Israel ex minti' ma tzaj q'aq'an tk'u'j kyi'j; tej ttzaj tq'oj e kub' t-xitun kykyaqil qe ja te kykolb'il kyib' aj Judá, aju kawb'il kyuk'ix qeju in che kawin tuj ma che kub' t-xitun Qman, ex ma tzaj kych'ixwi tu'n.

³Ma kub' naj tkyaqil kyipumal aj Israel tu'n tq'oj Dios. Ma tz'el tlaq'b'a'n tq'ab' aju in kolin qi'j kywitz qe aj q'oj qi'j; ma tz'ok tq'o'n tq'aq'al kytanmi tiyjil Jacob, ex ma b'aj tz'e'y tkyaqil tu'n noq jatum in pon kanun.

⁴Ate Qman ik tten ik tza'n jun aj q'oj ma tz'el t-xqinin t-xob'l plech ex ma txi tb'incha'n tten tb'anq'ab'; ik tten ik tza'n jun aj q'oj ma b'aj t-xitun tkyaqil ju tb'anilxix ke'yin, ex aju tq'oj ik tten ik tza'n jun q'aq' tzaj tq'o'n tib'aj kyja aj Jerusalén.

⁵Ik ma tb'incha Qman ik tza'n in tb'incha'n jun aj q'oj; b'i'x ma kub' t-xitun tkyaqil kytanmi aj Israel; ma kub' t-xitun tkyaqil kyja qe rey, ma kub' t-xitun qe ja ma' kywa'l jatum in che okx ten qeju xq'uqil tnam, ex ma tzaj tq'o'n nim b'is ex oq'el tuj Judá.

⁶Jurat naj ma kub' t-xitun tja ik tza'n jun tal ja t-xaq tze'yin twi' at tuj tqan awal, ma kub' t-xitun ju ja jatum in kub' kyb'uyin kyib' xjal tu'n kyk'ulun te. Ma tb'incha Qman tu'n tik' kyna'njtz qe ninq'ij tuj Jerusalén ex qe q'ij te ojlab'l. Tu'nju tq'oj ma tzaj ma che el tik'un qe rey ex qe pal.

⁷Ma tz'el tik'un Qman t-altar ex ju tja xjan; aju muro tok ti'jele tja ma txi tq'o'n tuj kyq'ab' qe aj q'oj. In che sch'in qe aj q'oj tuj tja Dios mer ik tza'n tuj ninq'ij.

⁸Kub' t-ximan Qman tu'n tkub' t-xitun qe muro tok ti'jele tnam Sión. Xi techan tu'n tkub' t-xitun tnam ex o b'inchet tu'n jurat naj. Aju tnejel muro ex aju tkab'in muro, tu'n Dios ma che ok tuj b'is, ex te junx tyemp ma che kub' xitj.

⁹Palch qe tlamel tnam twitz tx'otx' ex qe pasador ma che b'aj piẍj. Qe rey ex qe nejenel ate' tuj Jerusalén o che'x q'i'n pres kyxol xjal mya nimal Dios qe ex minti'tl tley Dios kyuk'il. Ex mi qe t-sanjel Dios minti'tl in kyk'mo'n aju tu'n ttzaj tma'n Dios kye.

¹⁰Qe tij xjal ate' tuj tnam Sión minti' in che q'ajt, in che kub' qe' twitz tx'otx', in jax kyjato'n quq tuj kywi' ex nno'k kyq'o'n kyxb'alun ch'i'x twitz. Qe q'apoj ate' tuj Jerusalén in kub' mok'e' kywi' ex in pon takl max twitz tx'otx'.

¹¹Ma che naj qe tb'aq' nwitze tu'nju in chin oq'e, ex nna'ne mer ik tza'n kjawitz oq wanmiye; b'i'x ma tz'el wipune tej twile otoq b'aj xitj aju kytanmi qe nxjalile, ex tej kywile qe k'wa'l kyuk'ix qe tal k'wa'l kukx kych'u'n in che kyimtoq tu'n we'yaj tuj cay.

¹²In kyma'ntoq qe tal k'wa'l te kytxu': Qaje qwaye ex qaje qk'a'ye, che chi. Ex in che kub' tz'aq kyuj cay te tnam mer ik tza'n at ẍil kyi'j, ax in jaw b'aj kyxew tuj tq'ab' kytxu'.

¹³¿Atpe jun k'ixk'oj tuj tkyaqil twitz tx'otx' o b'aj ik tza'n jlu, aqeye aj Jerusalén? ¿Al uk'il b'a'n nmojb'anteye aju k'ixk'oj kyi'je? ¿Alkye jaku tz'ajb'en wu'ne tu'n tq'uqb'anjtz kyk'u'je, aqeye aj Sión? Porke ma'xix aju k'ixk'oj ma tzaj kyi'je ik tza'n mar ma' t-xe'; ¿alkye b'a'n tok q'anante kyeye?

¹⁴Qeju nno'k kyq'on kyib' te t-sanjel Dios ate' kyxole, o tzaj kyma'n nimku kywitzik' kyeye ex mya ax toklen qe jlu ex noqx gan. Ex minti' kub' kychik'b'a'n kywitze aju kyile, tu'ntzun tb'ant kytene tu'n mi'n kyxi q'i'ne pres; tzaj kyma'n qe witzik' kyeye mya ax toklen ex te sb'ub'l.

¹⁵Ok tilwaj tnam Jerusalén kyu'n xjal in che b'et tuj b'e, nno'k kypoq'cha'n kyq'ab' te xmayb'il; in che ẍut'in ex in xi kyyukun kywi' te xmayb'il, ex in kyma'n ti'j tnam Jerusalén: ¿Maj atzunju tnam lu aju nno'k q'o'n tb'i aju mas tb'anilxix ke'yin tuj enter twitz tx'otx'? Che chi.

¹⁶Kykyaqil qe aj q'oj ti'j tnam Jerusalén in che ok ten xmayil. In che ẍut'in, in qitx'itx'in t-xe kye' ex in kyma'n: Ma b'aj qxitun tkyaqil. Atzun q'ij lu aju nimxix in qo ayon ti'j, matzun ma qil ja'lo, che chi.

¹⁷Ma japun tu'n Qman aju o b'aj t-ximan, ma japun b'aj aju tyol aju kub' t-ximan atxix ojtxi. Ma kub' t-xitun ju tnam ex minti' ma tzaj q'aq'an tk'u'j ti'j; ma txi tq'o'n amb'il tu'n kyjaw tze'n qe aj q'oj kyi'je, ex ma txi tq'o'n kyipun qe aj q'oj kyi'je.

¹⁸Qe xjal aj Jerusalén in che kub'san twitz Qman. Aqeye aj Sión, mi'n txi kykoline tu'n kyoq'e q'ijl ex qonik'an, e tb'et ta'l kywitze ik tza'n jun nima. Mi'n txi kykoline tu'n kyoq'e ex mi'n txi kyq'o'ne amb'il tu'n kyojlan qe tb'aq' kywitze.

¹⁹Che we'ktze, che sch'ine qonik'an, kukx che sch'ine tkyaqil or; tkyaqil b'is at tuj kyanmiye kyq'manxe te Qman; kyq'on jaw kyq'ab'e twitz kya'j te kub'sb'il ex kub'san kywitze kyi'j kyk'wa'le tu'n kyanq'in, aqeju ch'ix kykyim tu'n we'yaj kyuj kykyaqil cay.

²⁰Ke'yintza Nman ex ximana ti'j aju ma tb'inchaya, ax kyi'j qe xjal etzan tu'na ma tzaj tq'o'na k'ixb'isab'l lu. ¿B'a'npe tu'n t-xi kychyo'n qe txub'aj kyal aqeju ma in che ch'u'n? ¿B'a'npetzun tu'n kykub' b'yo'n qe pal ex qe t-sanjela tujx tjaya?

²¹Qe k'wa'l ex qe tij xjal palch qe tuj cay; qe ku'xun ex qe q'apoj ate' tuj Jerusalén ma che kub' b'yo'n tu'n spad. Tuj q'ij tej ttzaj tq'oja, ma b'iyuna, ma che kub' tb'yo'na qe xjal ex minti' ma tzaj q'aq'an tk'u'ja kyi'j.

²²Tu'na ma tzaj xob'ajil tuj tkyaqil part, mer ik tza'n ok in che tzaj xjal tuj jun ninq'ij. Nman, tuj q'ij tej ttzaj tq'oja, mi a'l jun o tzoqpaj. Aqeju ẍe ch'iy wu'ne ex e ok nk'a'chane, ma che kub' b'yo'n kyu'n aj q'oj.