Read kumam Lamentaciones 3 Bible Online

Lamentaciones 3 - kumam bible

Lamentaciones 3

¹Aqine ma tzik'x k'ixb'isab'l wu'ne, ex ma chin b'aj asyaline tej ttzaj tq'oj Qman.

²Ma chinx ti'n kyuj qe lugar puro qlolj, ex tu'n ma chinx ti'n tuj b'e jatum minti' spik'un;

³kukx in chin ok tk'ixb'isa'n tkyaqil q'ij.

⁴Ma tijin nchib'jale tu'n ax ikx aju ttz'umal nximlale, ma b'aj ttoqin qe nb'aqile;

⁵ma tz'ok tpe'nin wi'jele tu'n b'is ex tu'n k'ixk'oj;

⁶ma chin kyaj tq'o'n tu'n wanq'ine tuj qlolj ik tza'n qeju e kyim ojtxi.

⁷Pe'nin wi'je tu'n ex minti' jatum tu'n wexe; ma chin kub' tk'alo'n kyu'n caden alxix;

⁸maske in jaw sch'ine tu'n nqanine onb'il, pero minti' tzaj tb'i'n aju nkub'sb'ile;

⁹ma kub' tmaqo'n nb'eye kyu'n qe ab'j nmaqxix qe, ma b'aj t-ẍokin kyi'j qe nb'eye.

¹⁰Ma tz'ok Qman te weye ik tza'n jun txkup oso b'anin tten tu'n tok tzoqpaj wi'je, ex ik tza'n jun b'alun tewan tib'.

¹¹Ma chin el ttzpet-sa'n ti'j nb'eye, ma chin b'aj tliẍan, ex ma tzaj tq'o'n nim xob'ajil wi'je.

¹²Ma tz'el t-xqinin xob'l tplech ex ma b'ant tten tu'n ttzaj t-xo'n qe tplech wi'je.

¹³Qe plech in che tzaj t-xo'n Qman wi'je nimxix ma che'x xu'yl tuj nchib'jale.

¹⁴In che xmayin kykyaqil nxjalile wi'je; tkyaqil or o'kx aqine in chin ajb'en te kyxmayb'il.

¹⁵Ma tzaj tq'o'n Qman nimxix k'ixk'oj wi'je, ex ma tzaj tq'o'n nk'a'ye puro k'a wen.

¹⁶Ma b'aj tb'uchin qe twitz we'ye tu'n ttxa' ab'j; ma noj wi'je tu'n tza'j tu'n.

¹⁷Minti'tl in chin tene tuj txub'txaj, ex ma tzik' tna'njtz wu'ne aju tzalajb'il.

¹⁸Ex ma kub' nximane kyja': Ma b'aj wipune ex ma naj aju in chin ayone ti'j, aju at tu'n ttzaj tq'o'n Qman weye.

¹⁹Na'ntza aju yajb'il, aju b'is, ex aju ta'w ma tzaj wi'je.

²⁰Ok in chin kub' tene ximal ti'j jlu, b'i'x in tzaj b'aj nk'u'je.

²¹Ex at jun kukx tu'n nximane ti'j, ex atzun tu'n tok qe' nk'u'je ti'j jlu.

²²Aju tk'ujlalil Qman minti' b'ajsb'il te, kyja'tzun noq tu'nju tq'aq'b'il tk'u'j, te jumajx na'nx qnaj tu'n.

²³Tkyaqil prim ak'aj ta' tq'aq'b'il tk'u'j; tz'aqlxix te Qman, ex in japun tkyaqil tyol.

²⁴Ex in xi nma'ne: Ate Qman wetzb'ile; kyja'tzun o'kx ti'j q'uql nk'u'je.

²⁵B'a'n te Qman kyuk'il qeju nno'k qe' kyk'u'j ti'j ex kyuk'il qeju in che jyon ti'j.

²⁶B'a'n tu'n qkub' txule' ex tu'n qayon ti'j ju kolb'il qe tu'n Qman.

²⁷Mas b'a'n te te xjal tu'n tokx tq'on tib' tjaq' tkawb'il Qman atxix tuj tku'xumal.

²⁸Qa ma tzaj yajb'il ti'j xjal tu'n Dios, b'a'n tu'n tkyaj ten tjunal ex mi'n q'ajt;

²⁹ex b'a'n tu'n tkub' tmansin tib' twitz Qman, b'alo atx ch'intl oyb'il te;

³⁰b'a'n tu'n t-xi tq'o'n tq'o'tx tu'n tok b'ju'n kyu'n qe xjal kyaj tu'n kyk'ixb'isante te, ex tzik'xwit tu'n aju yasb'il te kyu'n xjal.

³¹Ex mlay qo kyaj tkolin Qman te jumajx.

³²Maske in tzaj tq'o'n Dios k'ixb'isab'l qi'j, ax ikx in tzaj q'aq'an tk'u'j qi'j, ex nimxix aju tk'ujlalil.

³³Ex ax tok minti' in tzalaj Qman ti'j tu'n kyk'ixb'isanjtz qe xjal tu'n ex tu'n tik'x yajb'il kyu'n.

³⁴Qa ma che b'aj k'ixb'isa'n qe pres tuj jun tnam,

³⁵ex qa minti' ma txi b'incha'n kyi'j xjal tuj tumelxix twitz Dios,

³⁶ex qa ma b'aj yajla'n xjal ok tpon xtisil, tkyaqil jlu minti' in kub' tuj twitz Dios.

³⁷¿Jakupe b'ant jun ti'xti kyu'n xjal qa mya a Dios q'malte?

³⁸Tza'nx ju b'is ax ikx tzalajb'il; in che tzaj jlu tu'nju in tma'n Dios aju najl tuj kya'j tu'n tb'ant ikju.

³⁹¿Tiqu'n in che oq' xjal tzalu twitz tx'otx'? B'a'n tu'n kyjaw oq' xjal tu'n tlaj kyil.

⁴⁰Qo ximan kyi'j qe qb'inchb'en ex qo aj meltz'aj juntl maj tuk'il Qman.

⁴¹Qo ximan ti'j Dios aju at tuj kya'j ex qo kub'san twitz, ex qq'manx kyja':

⁴²Ma qo b'inchane il ex minti' ma txi qnimane tyola, ex minti' ma kub' tnajsa'na qile.

⁴³Ma tzaj nimxix tq'oja qi'je, ma tz'ok lpe'ya qi'je tu'n qtzyete tu'na, ma qo kub' tb'yo'na ex minti' ma tzaj q'aq'an tk'u'ja qi'je.

⁴⁴Ma tz'okx tewan tib'a tuj jun muj, tu'ntzun mi'n tokx qna'j Diose tuk'ila.

⁴⁵Tu'na ma qo el ik'une kyu'n txqantl nasyon, ex in che xmayin qi'je.

⁴⁶Kykyaqil aj q'oj qi'je ma che yolin mya b'a'n qi'je;

⁴⁷ma qo naje tu'n xob'ajil, tu'n k'ob'il ex tu'n xitb'il; atzun jlu ma tzaj qi'je.

⁴⁸Nimxix ta'l nwitze nne'l tu'n oq'el tu'nju ma che naj qe nxjalile.

⁴⁹In chin oq'e, minti' ojlab'l kye tb'aq' nwitze, minti'x tu'n kyq'ajen,

⁵⁰maxlo chin q'ajele okxi qtzaj tke'yin Qman aju at tuj kya'j.

⁵¹Ma tzaj ta'w tuj wanmiye tu'nju ma tz'ok nke'yine aju ma tzaj kyi'j qe xu'j ate' tuj ntanmiye.

⁵²Minti' jun mya b'a'n ma nb'inchaye, noqx gan ma chin tzyete kyu'n aj q'oj wi'je ik tza'n in tzyet jun chyu'j;

⁵³In ku'x q'o'ne kyu'n tuj jun jul tu'n nnaje, ex ku'x kyxo'n ab'j wib'aje.

⁵⁴In kyaj mulq'aje tjaq' a', ex o nmaye: Ma chin najxe.

⁵⁵Nman, max t-xe'pun jul o chin kub'sane twitza;

⁵⁶ex o chin tzaj tb'i'na; mi'n tz'ok tmaqsi'na t-ẍkyina tu'n mi'n tb'inteya aju nkub'sb'ile.

⁵⁷Tej nkub'sane twitza, ul laq'e'ya wi'je ex tzaj tma'na weye kyja': Mi'n xob'a.

⁵⁸O kolina wi'je Nman, ex o chin kolpete tu'na tu'n mi'n nkyime.

⁵⁹Nman, maske minti' wile, pero ma tila aju mya b'a'n ma b'inchanjtz wi'je, b'inchanxtzuna wi'je.

⁶⁰Ma tila aju kyq'oj wi'je ex aju mya b'a'n in b'aj kyximan wi'je.

⁶¹Ma tb'iya qe yasb'il weye kyu'n, ex tkyaqilju kyximb'etz mya b'a'n in b'aj kyximan wi'je;

⁶²qe aj q'oj wi'je noq in che yolin wi'je tkyaqil q'ij, ex tuj ewaj in b'aj kyximan mya b'a'n wi'je.

⁶³Ke'yintza noq alkyexku in kyb'incha'n, o'kx in che xmayin wi'je.

⁶⁴Nman, q'on kub'a kycastiw ik tza'nx kyb'inchb'en mya b'a'n.

⁶⁵Maqsima kynab'l ex q'onkuya mya b'a'n kyib'aj.

⁶⁶Nman, lpe'ka kyi'j tuk'il tq'oja, ex tu'n kykub' naj tu'na tzalu twitz tx'otx'.