Read kumam Lamentaciones 4 Bible Online

Lamentaciones 4 - kumam bible

Lamentaciones 4

¹Aju tb'anil q'an pwaq, q'eq ma tz'ok ke'yin. Aju q'an pwaq tb'anilxix, minti'tl in qoptz'aj. Qe ab'j ti'j tja Dios ma che b'aj sputj tuj tkyaqil t-skyin cay.

²Qe xjal najl tuj Jerusalén, aqeju k'ujla'nxix nej mas twitz q'an pwaq tb'anilxix, atzun ja'lo ik in che ok q'o'n ik tza'n k'il b'inchamaj ti'j tx'otx' tu'n jun xjal b'a'n b'inchan k'il.

³Tzinlpe in xi kyq'o'n ttxu' xo'j kych'u' kyal, atzun qe nxjalile jawni qe, ik tza'n jun chyu'j avestrúz najl tuj tzqij tx'otx'.

⁴Aju kyaq' qe tal ne' kukx kych'u'n nno'kx tlak'on tib' tuj kyk'o'n tu'n tlaj txqetle'n. In che qanin tal k'wa'l ti'j kywa ex mi a'l jun b'a'n t-xi q'onte kywa.

⁵Qe xjal tb'anil kywa nej, atzun ja'lo in che kyim tu'n ta'w we'yaj kyuj cay. Qeju ma che ch'iy tuj tb'anil ja, atzun ja'lo najlqe tuj ttxa tz'is.

⁶Porke aju kyil qe nxjalile mas nim twitz ju il kyb'incha aj Sodoma aju kub' xitj tuj junx rat, ex mi a'ltoq jun xjal otoq tz'ok tzoqpaj ti'j.

⁷Qe nejenel at kyxol, mas saq che ke'yin ik tza'n ttxa che'w ex mas saq ik tza'n lech; aju kyximlal mas kyaq ke'yin ik tza'n tal ab'j coral; tb'anilxix che ke'yin ik tza'n tal ab'j zafiro.

⁸Atzun ja'lo jumajx q'eq ke'yin kywitz, ok kyex b'etel mi a'l jun jaku tz'el tnik' kyi'j. Aju ttz'umal kyximlal ma tz'ok tzqij ti'j kyb'aqil, ma tzqij ik tza'n si'.

⁹Mas txub'txaj o tz'el kye qeju e kyim tuj q'oj kywitz qeju e kyim tu'n we'yaj, porke aqe jlu cheb'a e kyim tej minti'tl tzaj knet kywa.

¹⁰Qe xu'j mejorxix kyanmi, tu'nx kyq'ab' jax kytzq'ajsa'n kyal ex xi kychyo'n tej ttzaj xitb'il kyi'j nxjalile.

¹¹Atzun ja'lo ma jatz b'aj tq'oj Dios, ma tzaj nimxix ttx'u'jil; ma tz'ok tq'o'n tq'aq'al tnam Sión, ex tkyaqil ma kub' tz'e'y tu'n, ex kyuk'ix qe t-simyentil tnam ma che kub' tz'e'y.

¹²Qe rey ex qe xjal tuj tkyaqil twitz tx'otx' minti' xi kyniman qa jaku che oktz aj q'oj tuj tnam Jerusalén.

¹³O tzaj tkyaqil jlu kyi'j tu'n tlaj ju il kyb'incha qe t-sanjel Dios, ex tu'n tlaj ju mya b'a'n o kyb'incha qe pal, tu'nju kub' kyb'yo'n qe xjal tz'aqlxix ax tuj tnam.

¹⁴Ja'lo ax qe xjal lu in che ẍokje' kyuj cay ik tza'n moẍ qe, nojni kyi'j tu'n chik' ex kyja'tzun mi a'l jun jaku tz'ok makonte kyxb'alun.

¹⁵Kyel laq'eye, tz'il qeye, kyel laq'eye, kyel laq'eye; mi'n qo ok kymako'ne, che chi xjal kye. Qe xjal lu e je'l oq ex b'aj kysputun kyib', atzun qe xjal kyuj txqantl nasyon kyma: Mya b'a'n tu'n kynajan xjal lu qxol, che chi.

¹⁶Ax te Qman b'aj sputunte kye ex minti'tl e ok tkwentin. Mya xo'n qe pal kyu'n xjal ex minti' tzaj q'aq'an kyk'u'j kyi'j qe tij xjal.

¹⁷Ma che sikt qe tb'aq' qwitz tu'nju nim ma qo ayon ti'j jun onb'il, ex noqx gan jlu. Aju tnam in qo ayon ti'j tu'n tul onil qe, mlayx qo kolpet tu'n.

¹⁸Tok kywitz aj q'oj qi'j noq jatum in qo ex b'etel, tu'n jlu mlayx qo b'et tuj cay. Aju b'ajsb'il tuj qq'ij ch'ix tul ex ma tzul kanun q'ij tu'n qnaj.

¹⁹Qe aj q'oj qi'j mas kyuw che ojqelan kywitz qe t'iw in che lipan twitz kya'j; ma che ok lpe' qi'j kywi' qe witz tu'ntzun qtzyet kyu'n, ex ma che kub' ten xq'uqil qi'j tuj tzqij tx'otx'.

²⁰Aju rey sk'o'maj tu'n Qman ma tz'okx presin, aju b'a'ntoq in qo anq'in tu'n, ex tuj qwitz tu'n qanq'in segurxix tjaq' tkawb'il kyxol qe nasyon.

²¹Kyjaw tze'ne ex che tzalajxe aqeye aj Edom; aqeye najl tuj tx'otx' Uz. Ax ikx kyeye kb'el kycastiwoye kyuwxix wen; ok che ẍokjeb'ile ex che kyjel tene minti' kyxb'alune tok.

²²Aqeye aj Sión ma japun b'aj kycastiwoye ex mlay che ex lajo'ntle tu'n Qman tu'n kyxi q'i'ntle pres tuj juntl tnam. Atzun kyeye aj Edom, kb'el kycastiwoye tu'n tlaj kyb'inchb'ene mya b'a'n, ex qe kyile che elel tuj q'ancha'l tu'n Qman.