Read kumam Lamentaciones 5 Bible Online

Lamentaciones 5 - kumam bible

Lamentaciones 5

¹Nman, na'ntza aju ma b'aj qi'je, ke'yintza aju nim mya b'a'n ma tzaj qi'je, ma kub' qch'ixwiye tu'n.

²Aju qetzb'ile atzun ta' ja'lo tuj kyq'ab' stranjer xjal; qe qjaye ma tz'el kyetzan qe xjal minti' ojtzqi'n kywitz qu'ne.

³Ma qo kyaje meb'a, o che kyim qmane; atzun qtxu'ye ma che kyaj ten meb'a xu'j.

⁴Aju a' etzantoq qu'ne nej, atzun ja'lo loq'aj nne'l qu'ne; aju si' etzantoq qu'ne nej, atzun ja'lo in xi qchjo'ne twi'.

⁵Kukx in qo yajlanjtze kyu'n, in qo sikte ex minti' in tzaj kyq'o'n ch'in amb'il tu'n qojlane.

⁶Okx qq'on qib'e tjaq' kykawb'il aj Egipto ex tjaq' kykawb'il aj Asiria tu'n ttzaj kyq'o'n qwaye.

⁷Qe qxe'chele o che b'inchan il ex o che kyim, ex aqo'ye ma kub' qcastiwoye tu'n kylaj.

⁸In che kawin qe majen qi'je, ex mi a'l jun b'a'n tklonte qeye tuj kyq'ab'.

⁹Xi qoyin qchwinqlale tu'n tknet qwaye, tu'nju atzun ate' qe eleq' tuj lugar minti' kynajb'il xjal tuj.

¹⁰In julin qtz'umale tu'n kyaq ik tza'n tuj jun jorni, tu'n tlaj kyaq in tzaj qi'je tu'n we'yaj.

¹¹Ma che kub' ipan qe xu'j najl tuj tnam Sión, ax ikx qe q'apoj najl kyuj qe tnam tuj Judá.

¹²Qe nejenel qxole ma che jaw yob'in ti'j kyq'ab', qe tij xjal minti' in che'x niman.

¹³Qe ku'xun ma che ok q'o'n te che'l triw; atzun qe tal q'a ma che kub' tz'aq tjaq' talil si'.

¹⁴Minti'tl in che kub' qe' qe tij xjal ttzi tlamel tnam; minti'tl in b'injtz kyb'itz qe ku'xun.

¹⁵Minti'tl tzalajb'il tuj qanmiye; aju qb'ixb'ile te tzalajb'il ma tz'ok te b'is.

¹⁶Ma tz'el q'i'n qoklene; b'ek'b'il qwitze, ma qo b'inchane il.

¹⁷Tu'n tlaj jlu at b'is tuj qanmiye; ex kyja'tzun ma tz'ok muj ti'j tb'aq' qwitze.

¹⁸Aju tnam Sión ma kub' xitj ex mi a'l xjal at tuj; o'kx qe wech in che b'et tuj.

¹⁹Atzun teya Nman, kukx ktemb'ila te jumajx; kukx kkawila tuj tkyaqil tab'q'iyil te jumajx.

²⁰¿Tiqu'n ma tzik' qna'njtze tu'na te jumajx? ¿Tiqu'n ma qo kyaj tkolina nimku q'ij?

²¹Nman, qo ti'n aja tuk'ila, ex jakutzun qo aj meltz'aje. Q'ontza tzalajb'il qeye ik tza'n o qo tzalaje nej.

²²Atzun teya ma qo el tik'una te jumajx; nimxix tq'oja ma tzaj qi'je.