Read kumam Ezequiel 10 Bible Online

Ezequiel 10 - kumam bible

Ezequiel 10

¹Ex wile jun ti'xti ik ke'yin ik tza'n jun q'uqb'il te kawb'il, ex mer tal ab'j tb'anilxix zafiro tb'i tkub'sa'n tib'aj ju wa'lb'il, aju tkub'sa'n tib'ajxi kywi' qe querubín.

²Xi tma'n Qman te xinaq tok t-xb'alun saq ke'yin: Tokxa kyxol qe rwed kyjaq' qe querubín, ex q'intza jun yub' xq'a'l in k'ant tu'n q'aq', aju tokx kyxol qe querubín, ex sputinxa tib'aj tnam. Ex o wile tej tokx ju xinaq.

³Otoq che pon we' qe querubín ttxlaj tja Dios tuj b'anq'ab'aj, ex aju ttxa'n pe'n tkub' twitz tja Dios b'i'x noj tu'n muj.

⁴Jaw laq'e' tajwalil Qman kyib'aj qe querubín, ex kyja' xi' tu'n tpon ttzi ja; ex b'i'x noj tuj tja Qman tu'n muj, ex b'i'x ul qoptz'aj ttxa'n pe'n tu'n t-spik'umal tajwalil Qman.

⁵Aju tq'ajq'ajel kyxik' qe querubín o b'injtz max ttxa'n pe'n ti'jxi twitz tja Dios. Mer aku tq'ajq'ajel ok tyolin Dios aju at tipumal tu'n tb'ant tkyaqil tu'n.

⁶Xi tma'n Qman teju xinaq, aju tok t-xb'alun saq ke'yin, tu'n tetz ti'n q'aq' kyxol qe rwed ex kyxol qe querubín. Okxtzun ju xinaq ex kub' we' kytxlaj qe rwed.

⁷Jun kye qeju querubín xi tnuqpi'n tq'ab' tib'aj q'aq' in k'ant kyxol, tzaj ttzyu'n ch'in xq'a'l in k'ant q'aq' ti'j, ex kub' tq'o'n tuj tq'ab' ju xinaq tok t-xb'alun saq ke'yin. Tzajtzun ttzyu'n xinaq aju xq'a'l lu ex ex tuja.

⁸Tjaq' kyxik' qe querubín q'ancha'l jun tilb'ilal ik ke'yin ik tza'n tq'ab' xinaq.

⁹Junx kyuk'il qe querubín o wile kyaje rwed, jun rwed tkub'sa'n ttxlaj junjun kye. Ex qe rwed lu in qoptz'aj kyi'j, mer ik tza'n qe tal ab'j topacio kyb'i.

¹⁰Qe kyaje rwed lu junx ta' ke'yb'il kye, ex aju ke'yb'il kye mer ik tza'n q'e'l tex juntl rwed tujxi juntl.

¹¹Oktzun kyxi b'et qe querubín noq jatum, qa kub'ni, qa jawni, qa elni ex qa okni, minti' in q'on welt kyximlal, o'kx in che'x lpe' ti'j jun nejni kywitz.

¹²Nim tb'aq' witzb'aj tok kyi'jele kyximlal, ex ti'j ttzal kyi'j, ex ti'j kyq'ab' ex ti'j kyxik', ax ikx kyi'j qe kyaje rwed.

¹³O nb'iye tej t-xi q'ma'n kye rwed kyja': Che sutine.

¹⁴Teylex te junjun querubín at kyaje kywitz: Aju tnejel kywitz ik ke'yin ik tza'n twitz jun tor; aju tkab'in kywitz ik ke'yin ik tza'n twitz jun xinaq; aju toxin kywitz ik ke'yin ik tza'n twitz jun b'alun; aju tkyajin kywitz ik ke'yin ik tza'n twitz jun t'iw.

¹⁵Ax qe querubín lu otoq che ok nke'yine ttzi nima Quebar. Ex e jaw lipan twitz kya'j,

¹⁶ok kyb'et qe querubín ax ikx qe rwed in che b'et kytxlaj, ex ok kyjaw lipan twitz kya'j minti' nne'l kypa'n kyib' qe rwed kyi'j.

¹⁷Ok kywe' qe querubín ax ikx qe rwed b'i'x in che we'; ex ok kyjaw lipan twitz kya'j ax ikx qe rwed in che jaw twitz kya'j junx kyuk'il, ex ax kychwinqlal qe querubín at kyuj qe rwed lu.

¹⁸El tpa'n tib' tajwalil Qman tib'aj ttzi ja, ex kub' ten kyib'aj qe querubín.

¹⁹Xitzun kylik'un querubín kyxik' ex e jaw lipan twitz kya'j. O wile tej kyjaw lipan kyuk'ix qe rwed ate' kytxlaj, ex o wile tej kywe' ttzi tja Qman, aju xi'yni twitz tuj tumlal tjawitz q'ij. Ex tkub'toq tajwalil Kydios aj Israel kyib'aj.

²⁰Ax qe querubín lu otoq che ok nke'yine ttzi nima Quebar, aqeju tkub'sa'n Dios kyib'aj. Eltzun nnik'e kyi'j, atzun qe jlu querubín kyb'i.

²¹Teylex te junjun attoq kyaje kywitz ex kyaje kyxik', ex tjaq' kyxik' q'ancha'l qe tilb'ilal ik che ke'yin ik tza'n tilb'ilal tq'ab' jun xinaq.

²²Qe kywitz ikx che ke'yin ik tza'n che ke'yin kywitz qe querubín otoq che ok nke'yine ttzi nima Quebar. Teylex te junjun xi b'et tumlal jatum in xi kyke'yin.