Read kumam Ezequiel 14 Bible Online

Ezequiel 14 - kumam bible

Ezequiel 14

¹At junjun tij xjal kyxol aj Israel e ul wuk'ile ex e kub' qe' nwitze.

²Tzaj yolin Qman wuk'ile ex tma kyja':

³Qe xinaq lu jumajx kyq'on kyib' tu'n kyk'ulun kywitz qe tilb'ilal, ex o'kx tok kywitz ti'j aju in xi q'inte kye tu'n kykub' tz'aq tuj il, ¿kxe'lpetzun nq'o'ne amb'il kye tu'n ttzaj kyqanin jun yol weye?

⁴Yolina kyuk'il ex q'manxa kye kyja': Atzun jlu in tma'n Qman: Qa at jun aj Israel ma txi tq'on tib' tu'n tk'ulun kywitz qe tilb'ilal, ex qa ma tz'ok tq'o'n twitz ti'j ju in xi q'inte te tu'n tkub' tz'aq tuj il, ex qa ma tzul qanil jun yol tuk'il nsanjele, wu'nxe kxel nq'o'ne tzaq'web'l te ik tza'nx tb'inchb'en, tu'nju in k'ulun kywitz nimku tilb'ilal.

⁵Chin yolile tuj kyanmi kykyaqil aj Israel tu'n kyajtz meltz'aj juntl maj wuk'ile, aqeju ma tz'el kypa'n kyib' wi'je tu'n kylaj qe tilb'ilal.

⁶Kyja'tzun, q'manxa kye aj Israel kyja': Atzun jlu in tma'n Qman: Tajtz ti'j kyanmiye, kypa'mil kyib'e kyi'j qe tilb'ilal in che k'ulune kywitz, ex kykolin kyaje qe kyb'inchb'ene ik'b'ilxix.

⁷Qa at jun aj Israel ex qa jun stranjer xjal ax najl kyxol aj Israel ma tz'el tpa'n tib' wi'je, ex ma txi tq'on tib' tu'n tk'ulun kywitz qe tilb'ilal, ex qa tok twitz ti'j ju in xi q'inte te tu'n tkub' tz'aq tuj il, ex qa ma tzul qanil jun yol tuk'il nsanjele, wu'nxe kxel nq'o'ne tzaq'web'l te.

⁸Ktzajel nq'oje ti'j xjal lu ex kb'el nq'o'ne tcastiw te jun yek'b'il kywitz txqantl xjal, ex kukx ktzajel kyna'n, ex knajel wu'ne kyxol qe xjal etzan wu'ne. K'eleltzun kynik'e ti'j, aqine Dios.

⁹Qa at jun xjal nno'k tq'on tib' te nsanjele, ex ok t-xi tma'n tqanil mya ax tok, axtzun qine otoq chin kub' sb'u'nte te, kb'el nq'o'ne tcastiw, ex knajel wu'ne kyxol qe xjal etzan wu'ne.

¹⁰Aju xjal in qanin xjel, ax ikx aju nno'k tq'on tib' te nsanjele, kykab'il kb'el kycastiw tu'n tlaj kyil.

¹¹Tu'ntzun mi'n tel kypa'n kyib' aj Israel wi'je juntl maj, ex tu'n mi tb'aj kytz'ilsan kyib' tu'nju kyb'inchb'en mya b'a'n. Che okeltzun te jun tnam etzan wu'ne ex atzun weye chin okele te Kydios. Aqine Dios in chin q'mante ju yol lu.

¹²Tzaj yolin Qman wuk'ile ex tma kyja':

¹³Qa at jun nasyon ma b'inchan il nwitze, ex qa ma tz'el kypa'n kyib' xjal wi'je, kb'el kycastiw wu'ne, ex k'elel wi'ne kywa; ktzajel we'yaj kyib'aj wu'ne, ex che kymel qe xjal ex qe alumaj wu'ne.

¹⁴Ex noqwit a najl Noé, Daniel tuk'ix Job tuj tx'otx' lu, o'kxwitlo ox xjal lu jaku che klet, tu'nju tz'aqlxix qe. Aqine Dios in chin q'mante ju yol lu.

¹⁵Ex qa ma che'x nsama'ne qe txkup te tjaq' k'ul tuj jun nasyon tu'n tkub' kyb'yo'n qe xjal najl tuj, ex tu'n tok te jun lugar minti' xjal najl tuj, jatum mi jun xjal jaku tnimari tib' tu'n tik' b'et tu'nju in xob' tu'n kylaj qe txkup,

¹⁶noqwit a najl qe ox xinaq tuj nasyon lu, mlaywitlo che klet kyky'ajal kyu'n, mi qe kyme'jel, o'kxwitlo aqe jaku che klet, ex aju kytanmi jakulo kyaj ten te jun lugar minti' xjal tuj. Ax tok aqine Dios in chin q'mante ju yol lu.

¹⁷Ex qa ma che tzaj nsama'ne qe xjal q'ojlel ti'j nasyon lu ex qa ma txi nma'ne tu'n kykyim qe xjal ex qe alumaj,

¹⁸noqwit a najl qe ox xinaq lu tuj ju nasyon lu, mlaywitlo che klet qe kyky'ajal kyu'n, mi qe kyme'jel; o'kxwitlo aqe jaku che klet tu'nju tz'aqlxix qe. Ax tok aqine Dios in chin q'mante jlu.

¹⁹Ex qa ma txi nsama'ne tx'u'j yab'il tuj nasyon lu, ex qa ma tzaj nim ntx'u'jile ti'j tu'ntzun kykyim qe xjal ex qe alumaj,

²⁰noqwit a najl Noé, Daniel ex Job tuj nasyon lu, mlaywitlo che klet qe kyky'ajal kyu'n mi qe kyme'jel; o'kxwitlo aqe jaku che klet tu'nju tz'aqlxix qe. Ax tok aqine Dios in chin q'mante jlu.

²¹Atzun jlu in tma'n Qman: Pyorlo ok ttzaj nsama'ne qe kyaje castiw xob'ajilxix tib'aj tnam Jerusalén, atzun qe jlu: Q'oj, we'yaj, qe txkup te tjaq' k'ul, ex tx'u'j yab'il, tu'n kykyim qe xjal ex qe alumaj.

²²Nik'xi junjun che kyjel anq'in ex che eletz q'i'n ti'jtze tnam kyuk'il kyky'ajal ex kyme'jel. Oktzun kyul kyuk'ile, ok kyila'ye kymod ex kyb'inchb'en mya b'a'n ex kqeb'el kyk'u'je tu'nju castiw otoq kub' nq'o'ne tuj tnam Jerusalén.

²³Kqeb'el kyk'u'je ok kylonteye tza'n tten kymod ex alkye kyb'inchb'en. K'eleltzun kynik'e ti'j mya noqx gan ju castiw kub' nq'o'ne tib'aj tnam Jerusalén. Aqine Dios in chin q'mante jlu.