Read kumam Ezequiel 17 Bible Online

Ezequiel 17 - kumam bible

Ezequiel 17

¹Tzaj yolin Qman wuk'ile ex tma kyja':

²Aya xjal, q'manxa jun techal kye aj Israel.

³Q'manxa kye kyja': Atzun jlu in tma'n Qman: At jun t'iw matij pon twi witz Líbano; nmaqxix qe t-xik' ex lik'un kyten, junxilchaq che ke'yin tilb'ilal ttzmal. Tzyet tunen jun tze' wi'ten tu'n,

⁴ex jaw tk'uẍin aju tunen ex xi' awalte te tuj jun tx'otx' jatum najltoq qe comersyant, tuj jun tnam jatum at nim k'aẍjel.

⁵Ax ikx tzaj ti'n jun iyaj tuj tx'otx' kye aj Israel ex ku'x tawa'n tuj jun tx'otx' aq'namaj, ttzi' jun tq'ab' xaq jatum in b'et nim a'. Ku'x tawa'n ik tza'n jun wi' chjaj.

⁶Ja'wil poq'l iyaj ex ok te jun tqan uva nimxix tq'ab', ch'in ok twa'l, kyja' e je'x qe tq'ab' tumlal t'iw, atzun qe tlok' kyja' e ku'x tuj tx'otx'. Ok te jun tqan uva; tzaj nim t-xul ex el nim tq'ab'.

⁷Ex attoq juntl t'iw matij ex matijxix qe t-xik' ex nim ttzmal. Atzun qe tlok' uva kyuk'ix qe tq'ab' kyja' e je'x tumlal ju t'iw lu, tu'n t-alinjtz tu'n jatum awa'ntoq.

⁸Ex otoq ku'x awa'n tuj jun tx'otx' tb'anil, junx ttxlaj jatum in b'ettoq nimxix a', jatum tu'n ttzaj nim tq'ab' ex tu'n tok nim twitz ex tu'n tok te jun wi' uva tb'anilxix ke'yin.

⁹Q'manxa kye: Chitzun Qman ma tma kyja': Aju tqan uva lu mlay ch'iy. Aju tnejel t'iw kjawitz b'aqonte te, ex che tzajel tz'aq qe twitz tu'n; noq nik'xi xjal ex mya nim kyipun k'okel ti'j ok tjatz kyb'aqo'n, ex che tzqijel kykyaqil qe t-xul otoq che tzaj.

¹⁰Maske ku'x kyawa'n juntl maj, mlay tzaj t-xul; ktzqijel tu'n kyq'iq' ktzajel tuj tjawitz q'ij; ktzqijel ax jatum kb'elex awa'n.

¹¹Tzaj yolin Qman wuk'ile ex tma kyja':

¹²Qaninxa kye xjal lu, aqeju kyk'i' che b'in, qa b'a'n kyu'n ti t-xilen ju techal lu. Q'manxa kye kyja': Pon rey te Babilonia tuj Jerusalén ex tzyet ju rey te Judá tu'n, kyuk'ix qe xjal ma' kyoklen ttxlaj, ex e ul ti'n max tuj Babilonia.

¹³Kyaj tq'o'n toklen jun tiyjil rey ex o b'ant ti'j jun tyol tuk'il, ex ok tq'o'n il ti'j tu'n t-xi ttziyan tu'n tniman te rey te Babilonia, ax ikx e tzaj ti'n tuk'il qe xjal ma' kyoklen tuj tnam,

¹⁴tu'ntzun tel tipun kykawb'il aj Judá, ex tu'n mi'n tjaw kyi'n kyib' tu'n kyq'ojin, noq o'kx tu'n kukx kyten ok tjapun kyu'n aju yol kyaj b'ant ti'j tu'n rey kyuk'il.

¹⁵Atzunte tiyjil rey lu jaw ti'n tib' tu'n tq'ojin ti'j rey te Babilonia ex e je'x t-sama'n sanjel tuj Egipto qanil nimku kyajlal soldad ex chej tu'n kyajb'en tuj q'oj. ¿B'a'npe k'elel jlu te te, jakupe tzoqpaj tu'n mi'n tkyim? ¿Jakupe tzoqpaj tu'n mi'n tkyim jun xjal minti' ma japun tu'n aju yol otoq txi ttziyan?

¹⁶Aqine Dios in xi nma'ne jun yol axix tok: Aju xjal lu kymel tuj Babilonia tu'nju otoq tz'ok tq'o'n te minti' tajb'en aju yol otoq txi ttziyan, ex minti' ma japun tu'n aju yol otoq txi ttziyan te rey aju otoq tz'ok q'onte toklen tu'n tok te rey.

¹⁷Ok tok tzoqpaj rey te Babilonia q'ojlel ti'j, ex ok tjaw tb'incha'n t-xwe'tzb'il ti'jele tnam, ex ok kykub' tb'yo'n nimku xjal, mlayx tzaj t-sama'n rey Faraón txqan soldad ex mi txqan xjal te onil te,

¹⁸tu'nju otoq tz'ok tq'o'n te minti' tajb'en aju yol otoq txi ttziyan ex minti' ma japun tu'n aju yol kyaj b'ant ti'j tu'n tuk'il rey; otoq txi tq'on tib' tu'n tjapun tu'n, ex minti' ma tb'incha tkyaqil jlu. Kyja'tzun mlayx tzoqpaj tu'n mi'n tkyim.

¹⁹Aqine Dios in xi nma'ne jun yol axix tok: Aju xjal lu ma tz'ok tq'o'n te minti' tajb'en aju yol axix tok tzaj ttziyan weye ex minti' ma japun tu'n aju yol otoq kyaj b'ant ti'j wu'ne tuk'il; kyja'tzun kb'el tcastiw wu'ne.

²⁰Kxel nxo'ne nxuyb'e tib'aj ex ktzyetel wu'ne; kxel wi'ne tuj Babilonia ex atzun kb'el tcastiw wu'ne ma chixin tu'nju minti' ma japun nyole tu'n.

²¹Kykyaqil qe t-soldad che elel oq ex che b'el b'yo'n tu'n spad, atzun qeju che kyjel anq'in che b'ajel sputj tuj tkyajil pak' twitz tx'otx'. K'eleltzun kynik'e ti'j, aqine Dios otoq chin yoline.

²²Aqine Dios in xi nma'ne jlu: Ax ikx weye ktzajel ntzyu'ne tunen wi'ten aju ma' twa'l; ex k'elel nk'uẍine jun t-xul aju ma' tjaw, ex ax qine chin b'elex awante twi' jun witz ma' twa'l.

²³Kb'elex wawa'ne twi' ju witz mas matij twa'l tuj tnam Israel. Che ch'iyil qe tq'ab', k'okel twitz ex k'okel te jun wi'ten tb'anilxix. Che najal kykyaqil txkaj chyu'j t-xe tqan, che najal tjaq' t-xlekumal.

²⁴K'eleltzun kynik' kykyaqil qe tze'[2] tuj kojb'il ti'j, ax tok aqine Dios. In che jaw ntx'emine qe tze' ma' kywa'l ex in che ch'iy wu'ne qe tze' ch'in kywa'l. In che tzqij wu'ne qe tze' cha'x ex in che cha'xix wu'ne qe tze' tzqij. Aqine Dios in chin q'mante jlu ex in japun wu'ne.