Read kumam Ezequiel 2 Bible Online

Ezequiel 2 - kumam bible

Ezequiel 2

¹Ex o nb'iye jun tq'ajq'ajel wib'aj in tma'n we'ye kyja': Aya xjal,[1] we'ktza, ok chin yolile tuk'ila.

²Tej matoq in yolin wuk'ile o nk'ame tipumal Dios ex in jaw wab'ane tu'n. Ex o nb'iye tq'ajq'ajel wib'aj in yolin wuk'ile,

³ex tma juntl maj weye: Aya xjal, kxel nsama'ne kyxol aj Israel mib'an che b'in ex ma jaw kyi'n kyib' tu'n kyq'ojin wi'je. Ma jaw kyi'n kyib' tu'n kyq'ojin wi'je ik tza'n o b'ant kyu'n kyxe'chel, ex kukx kyq'ojin ja'lo.

⁴Qe xjal lu kyuw kywi' ex kyuw kyanmi. Kxel nsama'ne kyuk'il tu'n t-xi tma'na kye kyja': Atzun jlu in tma'n Qman.

⁵Qa xi b'i'na kyu'n ex qa mi'n, ex k'elel kynik' ti'j, at jun t-sanjel Dios kyxol, porke qe xjal lu jumajx mib'an che b'in.

⁶Aya xjal, mi'n tzaj t-xob'ila kywitz ex mi ti'j ju ok kyma' teya, maske ok tna'ya mer ik tza'n tokxa tuj txqan ch'i'x, ex mer ik tza'n najla kyxol txqan si'nin. Mi'n tzaj t-xob'ila tu'n kyyol ok kyma' teya, ex mi'n jaw sek'paja kywitz, maske jumajx mib'an che b'in.

⁷Q'manxa nyole kye qa xi b'i'na kyu'n ex qa mi'n, porke qe xjal lu jumajx mib'an che b'in.

⁸Q'ontz twi'ya ti'j nyole kxel nma'ne teya, ex mi'n tz'oka mib'an b'ina ik tza'n kye. K'ab'inx tuj ttzi'ya ex wa'nxa aju kxel nq'o'ne teya, chi Qman, tzaj tma'n weye.

⁹O wile jun q'ab'aj nuqpi'n ti'j ulni wuk'ile, q'i'n jun u'j tu'n b'alq'i'n tten ex tz'ib'amaj txqan yol twitz.

¹⁰Eltzun tlik'pun nwitze. Tz'ib'amaj kykab'il pak'; ex in yolin ti'j tu'n kywuyin xjal ex tu'n ky-ayayan, ex ti'j jun yol kyuw wen te xob'tzab'l.