Read kumam Ezequiel 20 Bible Online

Ezequiel 20 - kumam bible

Ezequiel 20

¹Tuj tlajin q'ij te tjwe'yin xjaw te twuqin ab'q'i, e ul junjun kytijil aj Israel qanil jun kyxjel te Qman, ex e kub' qe' nwitze.

²Tzaj yolin Qman wuk'ile ex tma kyja':

³Aya xjal, yolina kyuk'il qe kytijil xjal aj Israel ex q'manxa kye kyja': Atzun jlu in tma'n Qman: ¿Mape che tzaje qanil kyxjele weye? Aqine Dios in nma'ne jun yol axix tok, mlayx txi ntzaq'we'ne kyxjele.

⁴Aya xjal, kawinxa qe ex q'manxa ju kyil ex q'manxa kye aju mya b'a'n ik'unxix wu'ne o kyb'incha qtzan kyman.

⁵Q'manxa kye kyja': Atzun jlu in tma'n Qman: Tej kyjaw nsk'o'ne qe aj Israel, aqeju ax tiyjil Jacob, xi nma'ne jun yol axix tok kye ex xi nyek'un wib'e kye tuj tx'otx' Egipto. Xi nma'ne jun yol axix tok kyja': Aqine Kymane ex Kydiose.

⁶Tuj q'ij tej nyoline kyuk'il xi ntziyane kye tu'n kyetz wi'ne tuj Egipto ex tu'n kyxi wi'ne tuj jun tx'otx' otoq tzaj njyo'ne te kye, aju tx'otx' lu q'inun tx'otx' ex tb'anilxix, aju tx'otx' lu mas tb'anilxix kywitz kykyaqil txqantl tx'otx'.

⁷Xitzun nma'ne kye kykyaqil: Kykolin kyaje tu'n kyk'ulune kywitz qe tilb'ilal ik'b'ilxix qe ex mi'n b'aj kytz'ilsan kyib'e kyu'n qe tilb'ilal ate' tuj Egipto, porke aqine Kymane ex Kydiose.

⁸Atzun kye jaw kyi'n kyib' wi'je, ex minti' kyajb'e tu'n t-xi kyb'i'n nyole; ex minti' kyaj kykolin qe tilb'ilal nno'k kydiosin, aqeju ik'b'ilxix, ex minti' kyaj kykolin qe tilb'ilal ate' tuj Egipto. Kub' nximane tu'n ttzaj nq'oje kyi'j, ex tu'n tkub' kycastiw wu'ne tuj Egipto okxi tjatz b'aj nq'oje.

⁹Ex minti' o nb'inchaye ikju tu'ntzun mi tyolinjtz mya b'a'n wi'je kyu'n qe nasyon jatum najlqe'toq, porke kywitz qe nasyon lu o txi nyek'un wib'e kye ex o txi ntziyane kye tu'n kyetz wi'ne tuj Egipto.

¹⁰E je'tz wi'ne tuj Egipto ex e je'x wi'ne tuj tzqij tx'otx'.

¹¹Atzun xi nq'o'ne qe nleye kye kyuk'ix qe nmandamyente; in kyq'o'n jlu kychwinqlal xjal qa ma che japun kyu'n.

¹²Ax ikx xi nma'ne kye tu'n kyojlan tuj q'ij te ojlab'l, a jlu tu'n tajb'en te jun techal ti'j ju yol otoq kyaj b'ant ti'j wu'ne kyuk'il, tu'ntzun ttzaj kyna'n aqine Dios o chin el pa'nte kye tu'n kyok te weye.

¹³Jawtzun kyi'n kyib' wi'je tuj tzqij tx'otx', ex minti' xi kyniman qe nleye; el kyik'un qe nmandamyente, aqeju otoq txi nq'o'ne kye tu'n tten kychwinqlal qa ma che japun kyu'n, ex ok kyq'o'n te minti' tajb'en aju q'ij te ojlab'l. Kub'tzun nximane tu'n tjatz b'aj nq'oje kyi'j ex tu'n kynaj wu'ne te jumajx tuj tzqij tx'otx'.

¹⁴Ex minti' nb'inchaye ikju tu'ntzun mi'n tyolinjtz mya b'a'n wi'je kyu'n qe nasyon, aqeju otoq kyil tza'n tten otoq che etz wi'ne qe aj Israel tuj Egipto.

¹⁵Ax ikx xi nma'ne kye jun yol axix tok tuj tzqij tx'otx', tu'n mi'n kyokx tuj tx'otx' otoq txi ntziyane kye, aju tx'otx' lu q'inun tx'otx' ex tb'anilxix, ex mas tb'anil kywitz txqantl tx'otx',

¹⁶xi nma'ne kye ikju tu'nju el kyik'un qe nmandamyente, minti' xi kyniman qe nleye ex ok kyq'o'n te minti' tajb'en aju q'ij te ojlab'l, ex o'kx ok ten kyk'u'j kyi'j qe tilb'ilal nno'k kydiosin.

¹⁷Maske ikju, pero tzaj q'aq'an nk'u'je kyi'j ex minti' e naj wu'ne tuj tzqij tx'otx'.

¹⁸Tuj tzqij tx'otx' xi nma'ne kye kyk'wa'l tu'n mi'n tel kykano'n ti'j ju in kyb'incha'n kyman ex tu'n mi'n t-xi kyniman aju ktzajel kyma'n kyman, ex tu'n mi'n tb'aj kytz'ilsan kyib' kyu'n qe tilb'ilal nno'k kydiosin kyman.

¹⁹Xi nma'ne kye kyja': Aqine Kymane aju Kydiose. Japunx qe nleye ex qe nmandamyente kyu'ne,

²⁰kynimanxe qe q'ij te ojlab'l tu'n tajb'en te jun techal ti'j yol kyaj b'ant ti'j wu'ne kyuk'ile; kyja'tzun k'elel kynik'e ti'j, aqine Kymane aju Kydiose.

²¹Ax ikx qe kyk'wa'l jaw kyi'n kyib' wi'je. Minti' xi kyniman qe nleye ex minti' e japun qe nmandamyente kyu'n, aju in tq'o'n kychwinqlal qa ma japun kyu'n, ex ok kyq'o'n te minti' kyajb'en qe q'ij te ojlab'l. Kub'tzun nximane tu'n ttzaj nq'oje kyi'j ex tu'n kynaj te jumajx wu'ne tuj tzqij tx'otx' tu'ntzun tjatz b'aj nq'oje.

²²Ex minti' o nb'inchaye ikju tu'ntzun mi'n tyolinjtz mya b'a'n wi'je kyu'n qe nasyon aqeju otoq kyil tej kyetz wi'ne tuj Egipto.

²³Tuj tzqij tx'otx' xi nma'ne jun yol axix tok kye: Ok che b'ajel nsputune tuj tkyaqil nasyon twitz tx'otx',

²⁴tu'nju minti' e japun qe nmandamyente kyu'n, el kyik'un qe nleye, ok kyq'o'n te minti' tajb'en qe q'ij te ojlab'l ex o'kx e k'ulun kywitz qe tilb'ilal aqeju in che k'ulun kyman kywitz.

²⁵Kyja'tzun e je'x nq'o'ne qe ley mya b'a'n kye ex qe mandamyent minti' kyanq'ib'l kyu'n.

²⁶Xi nq'o'ne amb'il kye tu'n tb'aj kytz'ilsan kyib', tej t-xi kyi'n kyoyaj kywitz qe tilb'ilal ex kub' kypatun tnejel kyky'ajal te chojb'il. O nb'inchaye jlu tu'n ttzaj tchi kyi'j ex tu'n tel kynik' ti'j, aqine Dios.

²⁷Atzun teya xjal, q'manxa kye aj Israel: Atzun jlu in tma'n Qman: Ax ikx ti'j jlu qe qtzan kymane o tz'el kypa'n kyib' wi'je ex minti' o japun nyole kyu'n.

²⁸Tej kypon wi'ne tuj tx'otx' otoq txi ntziyane kye, noq ok tkyil jun tal witz ex qa jun tze' nim t-xaq, atzun xi kyq'o'n chojb'il tuk'ix kyoyaj aju nimxix in tzaj nq'oje tu'n, ax ikx atzun kub' kyqo'n perjum at tk'ok'jal ex kub' kyq'o'n kyoyaj ta'l twitz uva.

²⁹Xitzun nqanine kye: ¿Ti t-xilen ju tal witz jatum in che'x aje k'ulul? Ex ok q'o'n tb'i lugar lu, Lugar jatum in che k'ulun qe xjal mya okslal, ex ax tb'i tok ja'lo.

³⁰Q'manxa kye aj Israel kyja': Atzun jlu in tma'n Qman: ¿Tiqu'n ma b'aj kytz'ilsan kyib'e ik tza'n o kyb'incha qtzan kyxe'chele? ¿Tiqu'n minti' ma chinx kynimane ex ma che ok tene k'ulul kywitz qe tilb'ilal ik'unxix wu'ne?

³¹Ok in xi kyq'o'ne kyoyaje ex ok nno'kx kypatune kyk'wa'le tuj q'aq' te chojb'il, tu'n jlu kukx tb'aj kytz'ilsan kyib'e kyu'n qe tilb'ilal. ¿Jakupe txi ntzaq'we'ne kyxjele tu'nju kytene ikju, aqeye aj Israel? Aqine Dios in xi nma'ne jun yol axix tok, mlay txi ntzaq'we'ne kyxjele.

³²Mlay japun kyximb'etze tu'n kyoke ik tza'n qe txqantl nasyon twitz tx'otx', aqeju in che k'ulun twitz tze' ex twitz ab'j.

³³Aqine Dios kxel nma'ne jun yol axix tok: Tuk'il nim wipumale ex tuk'il nim ntx'u'jile chin kawile kyib'aje.

³⁴Che ajetz wi'ne kyxol qe nasyon jatum kysputun kyib'e ex che okel nchmo'ne tuk'il nim wipumale ex tuk'il nim ntx'u'jile.

³⁵Che xel wi'ne tuj tzqij tx'otx' kye tnam, ex atzun kb'el kycastiwoye wu'ne,

³⁶ik tza'n tej tkub' kycastiw qtzan kyxe'chele wu'ne ojtxi tuj tzqij tx'otx' Egipto. Aqine Dios in chin q'mante jlu.

³⁷Cheb'a che b'ajel wajla'ne ik tza'n jun pastor in b'aj tajla'n qe t-ẍne'l, ex kb'antel wu'ne tu'n t-xi kynimane ju yol kyjel b'ant ti'j wu'ne kyuk'ile.

³⁸Che elel npa'ne kyi'je qeju in jaw kyi'n kyib' wi'je, ex qeju o tz'el kypa'n kyib' wi'je che eletz wi'ne tuj kytx'otx' stranjer xjal jatum najlqe ja'lo; atzun kye mlay che okx tuj kytx'otx' aj Israel. K'eleltzun kynik'e ti'j, aqine Dios.

³⁹Aqeye aj Israel, atzun jlu in tma'n Qman: Qa kyk'i'ye tu'n kynimane weye, kyxi'ye k'ulul kywitz qe tilb'ilal aqeju nno'k kydiosine, ex te tib'ajxi che nimale weye, ex mlay tz'ok kyq'o'ntle nb'iye xjan te minti' tajb'en tu'nju oyaj in b'ant kyu'ne, ex tu'nju in che k'ulune kywitz qe tilb'ilal.

⁴⁰Kykyaqil aj Israel che k'ulul weye twi witz xjansa'maj wu'ne, twi witz ma' twa'l at kyxol aj Israel, aju tkub' tuj tx'otx' etzan wu'ne. Aqine Dios in chin q'mante jlu: Atzun che k'metel wu'ne tuk'il tzalajb'il; atzun kxel nqanine kye tu'n ttzaj kyi'n oyaj weye, ex tu'n ttzaj kyi'n aju tnejel twitz kyawal in jaw ex kykyaqil kyoyaj kb'ajel kyxjansa'n tu'n tok te weye.

⁴¹Oktzun kyajtz wi'ne kyxol qe tnam ex kyxol qe nasyon jatum kysputun kyib' ja'lo, ex ok kyok nchmo'ne juntl maj, che k'meteltzun wu'ne ik tza'n jun oyaj at tk'ok'jal, ex kywitz kykyaqil nasyon kxel nyek'un wib'e qa xjan qine.

⁴²Oktzun kypon wi'ne tuj tx'otx' Israel, aju tx'otx' otoq txi ntziyane tu'n t-xi nq'o'ne kye qtzan kyxe'chele, k'eleltzun kynik'e ti'j, aqine Dios.

⁴³Atzun tzul ti'j kyk'u'je tkyaqilju kyb'inchb'ene mya b'a'n aju otoq b'aj kytz'ilsan kyib'e tu'n, ex ktzajel kych'ixwiye kyi'jxe tu'n tlaj nimku mya b'a'n otoq kyb'inchaye.

⁴⁴Aqeye aj Israel, ok nb'incha'ye xtalb'il kyeye tu'n tjaw nimsa'n nb'iye, ex mlay kub' kycastiwoye wu'ne ik tza'n kyb'inchb'ene mya b'a'n ex plojxix, k'eleltzun kynik'e ti'j, aqine Dios, chi Qman Dios.

⁴⁵Tzaj yolin Qman wuk'ile ex tma kyja':

⁴⁶Aya xjal, ke'yinxa tumlal tx'otx' tuj tnayaj q'ij, q'manxa tyola ti'j, q'manxa aju yol kxel nma'ne teya ti'j chk'ul at tuj tnayaj q'ij,

⁴⁷ex q'manxa kyja': Atzun jlu in tma'n Qman: Aqine chin okel qoptz'inte q'aq' ti'ja ex che b'ajel tz'e'y kykyaqil qe tze' cha'x ex tzqij tu'n; kk'antel q'aq' ex mlayx yupj, ex kb'ajel tz'e'y kywitz kykyaqil xjal tu'n, kxel qe' tuj tx'otx' tuj tb'anq'ab' q'ij, max kpol b'aj tuj tx'otx' tuj tnayaj q'ij.

⁴⁸Ex ok kyila' kykyaqil xjal, aqine Dios otoq chin ok q'onte q'aq' ti'j, ex aju q'aq' lu mlayx yupj.

⁴⁹Xi ntzaq'we'ne: Ay Nman, qe xjal lu in kyma'n wi'je kyja': Aju yol in tma'n xjal lu, mi jun nne'l tnik' ti'j.