Read kumam Ezequiel 21 Bible Online

Ezequiel 21 - kumam bible

Ezequiel 21

¹Tzaj yolin Qman wuk'ile ex tma kyja':

²Aya xjal, ke'yinxa tumlal tnam Jerusalén ex q'manxa tyola kyi'j qe lugar jatum in che k'ulun xjal. Q'manxa aju yol kxel nma'ne teya ti'j tx'otx' Israel,

³ex q'manxa kyja': Atzun jlu in tma'n Qman: Ma chin oke aj q'oj kyi'je. Kjawitz wi'ne nspadiye tuj tjayil ex che b'el nb'yo'ne qe xjal tz'aqlxix ex qe aj il.

⁴Ax tok kjawitz wi'ne nspadiye tuj tjayil tu'n kykub' nb'yo'ne kykyaqil xjal tz'aqlxix ex kykyaqil aj il, kxelx qe' wu'ne tuj tx'otx' tuj tb'anq'ab' q'ij ex kpol b'aj wu'ne tuj tx'otx' tuj tnayaj q'ij.

⁵K'elel kynik' kykyaqil xjal ti'j, aqine Dios otoq chin jatz q'inte nspadiye tuj tjayil, ex mlayx txi nk'u'ntle.

⁶Aya xjal, tjaw ayayana kyuwxix tu'n ta'w b'is, tjaw ayayana kywitz qe xjal.

⁷Qatzun ma tzaj kyqanin teya: ¿Tiqu'n in ayayana? q'manxa kye kyja': In chin ayayane tu'n tlaj tqanil ti'j jun ch'ix tul kanun, ex kykyaqil xjal che kyjel ten minti' kyipun ex che elel b'aqchaj kyq'ab'; mi jun ktel tipun, kykyaqil ktzajel lu'lun kyqan tu'n kyxob'il. Ch'ix tul kanun jlu. Aqine Dios in chin q'mante jlu.

⁸Tzaj yolin Qman wuk'ile ex tma kyja':

⁹Aya xjal, q'manxa aju yol kxel nma'ne teya, atzun jlu in tma'n Qman: B'animaj ttzi spad ex jaqumaj ti'j.

¹⁰B'animaj ttzi' tu'n kyb'yet xjal tu'n, ex jaqumaj ti'j tu'n tqoptz'aj. Mlay qo tzalaj ti'j jlu porke ma tz'el ik'un tvar nky'ajale mer ik tza'n noq alkyex jun tze';

¹¹b'aj jaqu'n ti'j tu'n ttzyet tu'n q'ab'aj. B'animaj ttzi' ex jaqumaj ti'j tu'n tokx q'ot tuj tq'ab' b'yol xjal.

¹²Atzun teya xjal, tjaw sch'ina ex tjaw oq'a, porke aju spad b'anin tten tu'n kykub' b'yo'n qe xjal etzan wu'ne, kyuk'ix kykyaqil qeju in che kawin kyxol aj Israel. B'animaj kysentens tu'n kykyim junx kyuk'il qe xjal etzan wu'ne; kyja'tzun q'ajtza'n oka ttzi t-xu'ka tu'n b'is.

¹³Ax tok che okel xjal tuj malb'il. Yajtzun qa ma tz'el ik'un tvar nky'ajale ex qa mi'n xkyaj ten, ¿titzun k'okel? Aqine Dios in chin q'mante jlu.

¹⁴Aya xjal, q'manxa kye aju yol kxel nma'ne teya; yukunxa t-spadiye ela' maj tuk'il nim tq'oja. Atzun tajb'en spad lu tu'n kyb'yet xjal tu'n, puro xob'ajilxix ok tb'iyan, ex nno'k t-xob'tza'n xjal tuj tkyaqil part.

¹⁵Tu'n spad lu ktzajel kyxob'il xjal ex che kymel nim xjal tu'n tuj tkyaqil ja. Kpol ju spad wu'ne tu'n kykyim xjal tu'n. Aju spad jaqumaj ti'j tu'n tqoptz'aj ti'j ex b'animaj ttzi' tu'n kyb'yet xjal tu'n.

¹⁶Aya spad, b'yonkuya qe xjal ate' tuj b'anq'ab'aj ex tuj nayaj ex kyuj kykyaqil pak'.

¹⁷Ax ikx weye kxel nyukune ju spad okxi tjatz b'aj nq'oje. Aqine Dios in chin q'mante jlu.

¹⁸Tzaj yolin Qman wuk'ile ex tma kyja':

¹⁹Q'onkuya techal kab'e b'e, tu'ntzun tb'et ju rey te Babilonia tuj, tuk'ix t-spad. Kykab'il b'e il ti'j tu'n kyex jlet tuj junx tnam, ex jatum in xi qe' junjun b'e, kb'el tq'o'na jun techal tu'n tq'mante alkye tnam in pon ju b'e.

²⁰B'a'n tu'n tkub' tq'o'na techal b'e jatum tu'n t-xi b'et rey tuk'il t-spad. Jun techal kb'el tq'o'na ti'j ju b'e in xi' tuj tnam Rabá kye aj Amón, atzun juntl techal kb'el tq'o'na ti'j ju b'e in xi' tuj tnam Jerusalén, aju tnam tok muro ti'j tuj tx'otx' Judá.

²¹Aju rey te Babilonia kb'el ten q'il swert jatum in che tzaj qe' qe kab'e b'e: che b'ajel tyukun qe plech, k'okel ten qanil xjel kye qe tilb'ilal, ex kb'ajel tke'yin tuj kyk'u'j qe alumaj, aju kytx'otx' tb'i.

²²Tuj tb'anq'ab' k'okex ten aju plech in tyek'un ti'j tnam Jerusalén, ex atzun t-xilen jlu: Il ti'j tu'n tok tzoqpaj ti'j kyuk'il qe makb'il te q'ojb'il, ex tu'n t-xi tq'o'n orden tu'n kyb'yet xjal, tu'n kyjaw sch'in ok tok q'oj, tu'n kyok tzoqpaj kyi'j qe tlamel tnam, tu'n tjaw kyb'incha'n kyxwe'tzb'il ti'j ex tu'n tb'aj kytxolb'an kyib' ti'jele.

²³Tuj kywitz qe xjal najlqe tuj Jerusalén mya ax tok aju tqanil lu, tu'nju otoq b'ant ti'j jun kyyol tuk'il rey te Babilonia. Atzunte rey ktzajel tna'n aju kyb'inchb'en mya b'a'n, ex che tzyetel tu'n.

²⁴Kyja'tzun aqine Dios in xi nma'ne jlu: Qe kyb'inchb'ene mya b'a'n ex plojxix ma che el tuj q'ancha'l; ma tz'el tuj q'ancha'l aju il in b'ant kyu'ne tuj tkyaqilju in kyb'incha'ne. Kyja'tzun che tzyetele tu'n kyxi q'i'ne pres.

²⁵Atzun teya nejenel kye aj Israel, jumajx tq'on tib'a tu'n tb'inchanteya mya b'a'n, lu in laq'ex ttzaj tq'ijlalil tu'n tk'monteya aju castiw kyuwxix.

²⁶Aqine Dios in xi nma'ne jlu: K'elel q'i'n k'alb'il twi'ya, kb'eletz q'i'n coron tjax tuj twi'ya, ex tkyaqil kch'expetel; qeju ch'in kyoklen che okel te ma' kyoklen ex atzun qeju ma' kyoklen che okel te minti' kyoklen.

²⁷Tkyaqil b'i'x kb'el xitj ex mlay jaw b'incha'n juntl maj; maxi kjawil b'incha'n juntl maj okxi tul aju xinaq at toklen tu'n tjaw tb'incha'n. Ex tetzun kxel nq'o'ne oklenj.

²⁸Aya xjal, q'manxa kye aj Amón aju yol kxel nma'ne teya: Tu'nju in che xmayin kyi'j aj Israel, lu spad ma jatz tuj tjayil b'anin tten tu'n kyb'yet xjal tu'n ex jaqumaj ti'j tu'n tqoptz'aj ex tu'n kynaj xjal tu'n.

²⁹Mya ax tok aju in tzaj yek'un kye ik tza'n tuj witzik', ex aju tqanil in kyma'n ti'j ju tzul puro nik'aj yol. Tu'n spad k'elel tamtz'u'n kywi' qe xjal aqeju jumajx kyq'on kyib' tuj mya b'a'n. Ch'ix tul laq'e' tq'ijlalil tu'n tkub' kycastiw.

³⁰Kyq'on ku'xe kyspadiye tuj tjayil. Che najelxe wu'ne twitz ju tx'otx' jatum e itz'je ax tuj kytanmiye,

³¹ktzajel nq'oje kyib'aje ik tza'n jun q'aq' xob'ajilxix; ex che xel nq'o'ne tuj kyq'ab' qe xjal tx'u'j kywi' ex b'yol xjal qe.

³²K'okel tq'aq'al kytanmiye ex kb'el xitun, k'elel b'et kychk'ele tuj tkyaqil tx'otx', ex mi jun tzul na'nte kyeye. Aqine Dios ma chin q'mante jlu.