Read kumam Ezequiel 24 Bible Online

Ezequiel 24 - kumam bible

Ezequiel 24

¹Tuj tlajin q'ij te tlajin xjaw te tb'elajin ab'q'i, tzaj yolin Qman wuk'ile ex tma kyja':

²Tz'ib'an ku'xa aju tajlal xjaw te q'ij ja'lo, porke ja'lo ma tz'ok tzoqpaj rey te Babilonia q'ojlel ti'j tnam Jerusalén.

³Ex q'manxa jun techal kye xjal kyk'i' che b'in, tu'n tajb'en te jun yek'b'il te kye. Q'manxa kye aju yol kxel nma'ne teya: Q'on jaxa jun k'il tib'aj q'aq' ex q'on ku'xa a' tuj;

⁴Q'on ku'xa ela' piẍ twitz chib'j tb'anilxix tuj, aju nne'l ti'j tkux ẍne'l ex ti'j ttzal ti'j, ax ikx q'on ku'xa qe b'aq tb'anilxix.

⁵Q'intza jun ẍne'l tb'anilxix ex q'on okxa nim si' tjaq', tu'ntzun tloqlon wen okxi kytzq'aj qe b'aq.

⁶Porke in tma'n Qman kyja': Ay b'ek'b'il twitz tnam nim b'yol xjal at tuj. Ik tten ik tza'n jun k'il ma tzaj jlet lan tuj, ex aju lan mlayx jaw twitz k'il. Q'in jatza qe twitz chib'j, junjun tjatz tu'na, okxi minti'tl tkyaj ten tuj k'il.

⁷Nojni tuj tnam tu'n kychk'el xjal e kub' b'yo'n; ex mya twitz tx'otx' tkub' chik', noqwit tkub' twitz tx'otx' jakwitlo kub' naj tu'n quq, pero jlu tkub' tib'aj pik minti' tx'otx' tib'aj.

⁸Ax kyjel nq'o'ne chik' tib'aj pik minti' tx'otx' tib'aj, kyja'tzun mlayx b'ant tmaqset tib'aj, tu'ntzun ttzaj nimxix nq'oje kyi'j ex tu'n tkub' kycastiw wu'ne.

⁹Porke in tma'n Qman kyja': Ay b'ek'b'il twitz tnam at nim b'yol xjal tuj. Ax qine chin okel chmonte si' ti'j.

¹⁰Chmo'n oka nim si' tjaq' k'il ex e tk'ant-xix q'aq' tjaq' wen ex e kytzq'aj qe twitz chib'j, okxi taj tzqij ta'l ex okxi kyb'aj tz'e'y qe b'aq;

¹¹B'ix jax tq'o'na k'il juntl maj tib'aj q'aq' aju minti' tuj, okxi tok ju k'il skolin tu'n q'aq' ex okxi t-saqix minti'tl tz'il ti'j; ex okxi tkub' naj aju lan otoq tzaj jlet tuj.

¹²Maske b'ant ikju, pero atx lan tuj, minti' ma saqix mi tu'n q'aq'.

¹³Tz'ilxix kyb'inchb'ene mya b'a'n, aqeye aj Jerusalén, o wajb'eye tu'n kysaqixe wu'ne tuj kytz'ilile, pero minti' ma che saqixe. Maxi che saqixtele okxi tkub' nq'o'ne nim kycastiwoye.

¹⁴Aqine Dios ma chin q'mante jlu ex kb'antel wu'ne ikju. Ax qine chin b'inchalte ex mlayx tzik'x ti'j; mlay tzaj tz'e'y nk'u'je kyi'je ex mlay ch'expet nximb'etze ti'j ju kb'antel kyi'je wu'ne. Kb'el kycastiwoye wu'ne tu'n tlaj kyb'inchb'ene mya b'a'n. Aqine Dios in chin q'mante jlu.

¹⁵Tzaj yolin Qman wuk'ile ex tma kyja':

¹⁶Jurat naj k'elel wi'ne ttxlaja aju t-xu'jila aju nimxix in tk'ujla'na. Ex mi'n wuyina, mi'n oq'a ex mi'n tz'etz ta'l twitza ti'j.

¹⁷Mi'n xjiq'b'ana kyuw ex mi'n tb'inchaya ik tza'n in b'ant kyu'n xjal ok tkyim jun kyuk'il. Mi'n tz'el ti'na k'alb'il twi'ya ex mi'n b'eta minti' t-xajb'iya tok; mi'n tz'ok tmaqsi'na twitza te techal tb'isa ex mi'n txi twa'na aju wab'j in b'ant kyu'n xjal ok tkyim jun kyuk'il.

¹⁸Te prim in yoline kyuk'il xjal, ex te qale atzun tkyim nxu'jile; te prim te juntl q'ij nb'inchaye aju otoq tzaj tma'n Qman weye.

¹⁹Tzajtzun kyma'n xjal weye kyja': Chik'b'antza qeye ti t-xilen aju in tb'incha'na.

²⁰Xitzun nma'ne kye: Tzaj yolin Qman wuk'ile ex tzaj tma'n kyja':

²¹Q'manxa kye aj Israel kyja': Atzun jlu in tma'n Qman: Kb'ajel nxitune njaye, aju q'uqlxix kyk'u'je ti'j qa kyuwxix tten, aju nimxix kyganiye tu'n kyke'yine ti'j, ex aju nim in che tzalaje ti'j; qe kyky'ajale ex qe kyme'jele ma che kyaj ten tuj Jerusalén che b'el b'yo'n tu'n spad.

²²Ex q'manxe kye kyja': Kb'antel kyu'ne ik tza'nx weye ma nb'incha, mlay tz'ok kymaqsi'ne kywitze te techal kyb'ise, ex mlay txi kywa'ne aju wab'j in b'ant kyu'n xjal ok tkyim jun kyuk'il.

²³Mlay tz'el kyi'ne k'alb'il kywi'ye ex mlay che b'ete minti' kyxajb'iye tok. Mlay che wuyine ex mlay che jaw oq'e. Che kyjel tene minti' kyipune tu'n tlaj ju kyb'inchb'ene mya b'a'n, ex che jawil oq'e kyxolxe.

²⁴Ate Ezequiel jun yek'b'il te kyeye, ex tkyaqilju ma tb'incha ok kb'antel kyu'ne. Oktzun tpon tq'ijlalil tu'n ttzaj jlu, k'elel kynik'e ti'j, aqine Dios.

²⁵Aya xjal, kb'el nxitune njaye at kyxol, aju q'uqlxix kyk'u'j ti'j qa kyuwxix tten, aju in che tzalaj ti'j tu'nju tb'anilxix ex nim kygan tu'n tok kyke'yin. Ax ikx che elel wi'ne qe kyky'ajal ex kyme'jel.

²⁶Tuj q'ij lu, tzul jun xjal q'olte tqanil teya, aju otoq tzoqpaj.

²⁷Tujtzun q'ij lu kjaqetel ttzi'ya, ex kb'antel tyolina tuk'il ju xjal otoq tzoqpaj, ex mlay tentla te men. Kyja'tzun tten k'okela te jun techal kye tnam xjal, ex atzun kye k'elel kynik' ti'j, aqine Dios.