Read kumam Ezequiel 27 Bible Online

Ezequiel 27 - kumam bible

Ezequiel 27

¹Tzaj yolin Qman wuk'ile ex tma kyja':

²Aya xjal, b'itzanxa ju b'itz lu te b'is

³ti'j tnam Tiro, aju tkub' ttzi mar ex nnegosyarin kyuk'il txqantl tnam ate' ttzi'yile mar. Q'manxa, chitzun Qman in tma'n kyja': Aya tnam Tiro, o tmaya kyja': Tb'anilxix qine ex minti' npaltile;

⁴aju tmojonila najchaq in pon b'aj tuj mar, ik ttena ik tza'n jun barc tb'anilxix ok ke'yina kyu'n qeju e b'inchante teya.

⁵Kykyaqil qe tz'lom ate'k ti'ja tzajni q'i'n qe twi witz Senir; aju tze' ma' twa'l tkub' tuj tmija, atzun el ti'j tze' wi'ten tzajni q'i'n twi witz Líbano;

⁶qe palet in che ajb'en te yukul teya, atzun elni qe ti'j tze' k'ol tzaj q'i'n tuj tx'otx' Basán; qe tz'lom e ajb'en ti'ja, e tzaj q'i'n tuj mlaj tx'otx' te tnam Chipre ex lo'tzimaj kywitz tu'n marfil.

⁷Aju xb'alun tjaw twitz kya'j tu'n t-xi lamo'na tu'n kyq'iq', tzaj q'i'n tuj Egipto, slapun twitz ex lino ttx'otx'il, ex ajb'en teya te bander; aju xb'alun jax ten te t-xmu'ja ẍq'ilin ex ẍjulin ke'yin, atzun tzaj q'i'n tuj mlaj tx'otx' te tnam Elisa.

⁸Qe xinaq yukul palet ti'ja tzajnitoq qe tuj tnam Sidón ex tuj tnam Arvad, qe xinaq yukul teya, nimtoq kynab'l at ex ax aj Tiro qe.

⁹Qe tij xjal at kynab'l te tnam Gebal atzun qe in che b'aj lo'tzintoq qe tpa'xil ti'ja tu'n q'ol. Kykyaqil qeju yukul barc tuj mar e negosyarin tuk'ila ti'j tk'a'ẍa.

¹⁰Qe xinaq te tnam Persia, Lidia ex Libia kyok qe te soldad tu'na kyxol qe txqantl t-soldadiya; jaw kyyob'in kymaqb'il ex kypasb'il k'uxb'il ti'ja, ex mejor ok ke'yina kyu'n.

¹¹Qe xjal te tnam Arvad, kyuk'ix qe t-soldadiya e jax ten xq'uqil kywi' qe muro tok ti'ja, ex kywi' qe tjaya ma' kywa'l e jax ten qe xjal te Gamad xq'uqil tnam. Ok kyyob'in kymaqb'il ti'j tkyaqil tnuqb'il muro tok ti'ja, kyu'ntzun qe jlu tb'anilxix ok ke'yina.

¹²Tu'nju nimtoq tq'inumab'la at in che loq'ontoq aj Tarsis ti'j tk'a'ẍa, ex te twi tk'a'ẍa tzaj q'o'n saq pwaq, k'uxb'il, estaño ex plom.

¹³Ax ikx qe tnam Grecia, Tubal ex Mesec e loq'on tuk'ila, ex tzaj kyq'o'n xjal ex qe ti'xti q'an k'uxb'il kytx'otx'il te chojb'il te tk'a'ẍa.

¹⁴Qe xjal najlqe tuj tnam Bet-togarma tzaj kychjo'n twi tk'a'ẍa tu'n chej b'a'n che iqan iqtz, tu'n chej iqal xjal ex tu'n chej mul.

¹⁵Qe xjal te tnam Rodas e loq'on tuk'ila. O negosyarina kyuk'il nimku tnam ate' ttzi'yile mar, ex chjet twi tk'a'ẍa kyu'n tu'n marfil ex tu'n tze' kyuwxix, ébano tb'i.

¹⁶O negosyarin tnam Edom tuk'ila, tu'nju at nimku txkaj tk'a'ẍa: Te twi tk'a'ẍa tzaj kyi'n qe tal ab'j tb'anilxix ex wi'yilxix, ax ikx qe xb'alun ẍjulin che ke'yin, qe xb'alun slapun kywitz, qe xb'alun lino, ex qe tal ab'j tb'anilxix corales ex rubíes kyb'i.

¹⁷Ax ikx e negosyarin qe aj Israel ex qe aj Judá tuk'ila, ex chjet twi tk'a'ẍa kyu'n tu'n triw in jaw tuj tnam Minit, ex tu'n pan pastel, tu'n ta'l kab', tu'n aseyt ex tu'n bálsamo.

¹⁸Aju tnam Damasco nimxix o loq'on tuk'ila ti'j nimku txkaj tk'a'ẍa ex ti'j tq'inumab'la; ex chjet twi tk'a'ẍa kyu'n tu'n ta'l twitz uva in tzaj tuj tnam Helbón ex tu'n lan tzajni tuj tnam Zahar.

¹⁹Max tuj tnam Uzal tzaj kyi'n aj Dan ex aj Javán ta'l twitz uva, te twi tk'a'ẍa, tuk'ix k'uxb'il tx'inomaj, tuk'ix canela ex ptz'on at tk'ok'jal.

²⁰Aju tnam Dedán o loq'on tuk'ila ex chjet twi tk'a'ẍa tu'n tu'n kysiy chej.

²¹Qe aj Arabia ex kykyaqil qe nejenel te tnam Cedar e loq'on tuk'ila, ex chjet twi tk'a'ẍa kyu'n tuk'il tal ẍne'l ex qe ẍne'l ex qe tman chip.

²²Qe comersyant te Sabá ex te Raama e loq'on tuk'ila, ex chjet twi tk'a'ẍa kyu'n tu'n ela' txkaj perjum tb'anilxix ex kyu'n qe tal ab'j tb'anilxix ex wi'yilxix ex tu'n q'an pwaq.

²³Tuk'ila e negosyarin qe tnam Harán, Cane ex Edén, kyuk'ix qe comersyant te Sabá, te Asiria ex te Quilmad;

²⁴tzaj kyk'ayin xb'alun wi'yilxix teya, ex mant xb'alun ẍq'ilun ke'yin, ex xb'alun slapun twitz, ex qe xb'alun junxilchaq ke'yin kyilb'ilal, in che kub' q'o'n twitz tx'otx' te kyq'uqb'il xjal, ex saqb'aq xpotx'in tten.

²⁵Qe barc te tnam Tarsis in che ul lepchix jun ti'j juntl, q'i'mlex k'aẍjel kyu'n te teya. Ik ttena ik tza'n jun barc max tuj tmijil mar, nojni tkyaqil tuj tu'n q'inumab'l.

²⁶Qe yukul palet ti'ja, atzun qeju e je'x q'inte teya max tuj tmijil mar, ex b'aj xituna tuj tmijil mar tu'n kyq'iq' in tzaj tuj tjawitz q'ij.

²⁷Aju tq'inumab'la, aju tk'a'ẍa, qe yukul teya ex qe yukul palet ti'ja, qe calpinter ti'ja, qe k'ayil tk'a'ẍa, qe t-soldadiya ex kykyaqil qe xjal iqan tu'na, che kupunel max t-xe'pun mar tuj tq'ijlalil ok t-xi mulq'aja.

²⁸Tu'n tq'ajq'ajel kywi' qe yukul teya che tzajel lu'lun qe xjal ate' ttzi'yile mar.

²⁹Kykyaqil qe yukul palet kyuj txqantl barc ex kykyaqil qe yukul barc che eletz tuj barc tu'n kyul ttzi tx'otx'.

³⁰Kjawil tq'ajq'ajel kywi' ex che jawil oq' ti'ja tuk'il nim kyb'is. Kjawix kyq'o'n quq tuj kywi' ex kb'ajel kytolin kyib' tuj tza'j.

³¹Tu'n tlaja k'elel kymatzo'n ttzmal kywi', k'okel kyq'o'n kyxb'alun ch'i'x twitz ex che jawil oq' ti'ja tuk'il nim kyb'is.

³²Kxel kyb'itzan jun b'itz te b'is, ex tu'n kyb'is kxel kyma'n kyja': ¿Alkye jun jaku pon ik tza'n tnam Tiro, aju tnam ma naj tuj tmijil mar?

³³Ok in che pon qe tk'a'ẍa kyuj qe tnam ttzi'yile mar, in che jaw tzalaj nimku nasyon tu'na. Tu'nju nimxix tq'inumab'la ex nimku txkaj tk'a'ẍa e ok qe rey te twitz tx'otx' q'inun tu'na.

³⁴Atzun ja'lo ma b'aj naja tu'n mar, ma txi mulq'aja max t-xe'pun a'. Qe tk'a'ẍa ex kykyaqil qe xjal iqan tu'na ma che'x mulq'aj tuk'ila max t-xe'pun mar.

³⁵In che sek'paj ti'ja kykyaqil qe xjal najlqe kyuj qe tnam ate' ttzi'yile mar. Atzun in che lu'lun tu'n kyxob'il qe kyrey, ex q'ancha'l ti'j kywitz qa in che xob'.

³⁶B'i'x ma che jaw sek'paj qe comersyant kye txqantl nasyon tu'nju ma kub' xitja. Xob'ajilxix ma tz'ok ke'yina; ex te jumajx ma naja.