Read kumam Ezequiel 28 Bible Online

Ezequiel 28 - kumam bible

Ezequiel 28

¹Tzaj yolin Qman wuk'ile ex tma kyja':

²Aya xjal, q'manxa jlu te rey te tnam Tiro: Atzun jlu in tma'n Qman: Ma jaw tniman tib'a tuj tanmiya, ex ma tmaya kyja': Aqine Dios, q'uql qine tuj tq'uqb'il Dios ex txolin wi'je tu'n mar. Ex teya mya Diosa, noq o'kx jun xjala ex tuj t-ximb'etza qa junx ta' tnab'la ik tza'n tnab'l Dios.

³¿Maspetzun at tnab'la twitz Daniel? ¿Ojtzqi'npetzun tu'na tkyaqilju at tuj ewaj?

⁴Tu'nju tnab'la ex tojtzqib'la ma knet nimxix tq'inumab'la, ma b'aj tchmo'na nim q'an pwaq ex saq pwaq.

⁵Tu'nju nimxix tnab'la ti'j k'aẍjel ma chmet tq'inumab'la, ex tu'nju tq'inumab'la ma jaw tniman tib'a.

⁶Kyja'tzun in tma'n Qman kyja': Tu'nju in tma'na qa ik tnab'la ik tza'n tnab'l Dios,

⁷che tzajel wi'ne qe stranjer xjal q'ojlel ti'ja, qe xjal lu puro tx'u'j qe, kjawitz kyi'n kyspad tuj tjayil tu'n kyok tzoqpaj ti'ja, aya tb'anilxix ke'yina ex at nimxix tnab'la, ex k'elel q'i'n toklena kyu'n.

⁸Kb'elex xo'na kyu'n tuj kynajb'il kyimni, ex kymela kyu'n tuj tmij mar.

⁹¿Kukxpe kxel tma'na qa aya Dios ok tkub' tena kywitz qe b'yol teya? Tuj kyq'ab' qeju che b'el b'yonte teya mya Diosa, noq o'kx jun xjala.

¹⁰Kymela kyu'n qe stranjer xjal, ik tza'n in che kyim qe xjal mya nimal Dios qe. Aqine Dios in chin q'mante jlu.

¹¹Tzaj yolin Qman wuk'ile ex tma kyja':

¹²Aya xjal, b'itzanxa jun b'itz te b'is ti'j rey te tnam Tiro, ex q'manxa kyja': Atzun jlu in tma'n Qman: Aju ttena nej tz'aqlxixa, nimxix tnab'la ex jumajx tb'anilxix ke'yina.

¹³Nej, atzun kub' tena tuj Edén tuj tqan tawal Dios, toktoq tkyaqil txkaj tal ab'j tb'anilxix ex wi'yilxix ti'j t-xb'aluna, atzun qe jlu: Rubí, crisólito, jade, topacio, cornalina, jaspe, zafiro, granate ex esmeralda; q'an pwaqile qe adorn tok ti'ja, b'animaj qe atxix tuj q'ij tej tkub' b'incha'na.

¹⁴Aya querubín ma' tok toklena ex toka te xq'uqil, aqine in kub' q'onte teya twi witz xjan te Dios; atzun o tena ex o b'etjeya kyxol qe ab'j in k'ant q'aq' kyi'j.

¹⁵Atxix tuj q'ij tej tkub' b'incha'na, tz'aqlxixa ex minti' tpaltila, ex te tib'ajxi tb'inchaya aju mya b'a'n.

¹⁶Tu'nju nimxix tk'a'ẍa, o tb'inchaya nim mya b'a'n kyi'j xjal ex o tb'inchaya il, kyja'tzun ex nlajo'na twi' ju witz te Dios, ex nlajo'na kyxol qe ab'j in k'ant q'aq' kyi'j, aya querubín toka te xq'uqil.

¹⁷Jaw tniman tib'a tu'nju tb'anilxix ke'yina; ex tu'nju nim t-spik'umala, oka te minti' tnab'la. Ku'x nxo'na tu'n tku'puna twitz tx'otx', ex ok nq'o'na tu'n kyxmayin qe rey ti'ja.

¹⁸Nimxix il o tb'inchaya ex nimxix o sb'una tej tk'ayina mya tuj tumel ti'j tk'a'ẍa, ex tu'ntzun jlu ma b'aj ttz'ilsa'na qe ja jatum in k'uluna. Kyja'tzun, ti'jxa o tz'el k'ant jun q'aq' wu'ne ma b'aj tz'e'ya tu'n. Ja'lo kykyaqil in che ke'yin ti'ja ma kub' tza'jixa twitz tx'otx'.

¹⁹Kykyaqil qe nasyon ojtzqi'n twitza kyu'n b'i'x in che jaw sek'paj ok tilwaja kyu'n. Xob'ajilxix ma tz'ok ke'yina; ex te jumajx ma naja.

²⁰Tzaj yolin Qman wuk'ile ex tma kyja':

²¹Aya xjal, ke'yinxa tumlal tnam Sidón ex q'manxa kye xjal aju mya b'a'n o kyb'incha.

²²Q'manxa kyja': Atzun jlu in tma'n Qman: Ma chin oke aj q'oj kyi'je, aqeye aj Sidón; kxel nyek'une wipumale kyxole. Ok tkub' kysentense wu'ne ex ok t-xi nyek'une kyeye qa xjan qine, k'eleltzun kynik'e ti'j, aqine Dios.

²³Kxel nsama'ne tx'u'j yab'il kyi'je ex kb'etel kychk'ele kyuj cay; che kymel tu'n spad qe xjal najl tuj tnam Sidón ok kyok tzoqpaj qe aj q'oj kyi'j tuj tkyaqil pak' te tnam. K'eleltzun kynik'e ti'j, aqine Dios.

²⁴Qe nasyon kyvesin kyib' kyuk'il aj Israel ex ma che el ik'unte kye, mlay che oktl te kye ik tza'n jun ch'i'x tz'u'p twi' ex nimxix ta'w. K'eleltzun kynik'e ti'j, aqine Dios.

²⁵Aqine Dios in xi nma'ne jlu: Ok kytzaj nchmo'ne qe aj Israel kyxol qe nasyon jatum kysputun kyib', kxel nyek'un wib'e kywitz qe nasyon qa xjan qine. Che najal juntl maj aj Israel tuj kytx'otx', aju tx'otx' xi nq'o'ne te nmajene Jacob.

²⁶Atzun che anq'il tuj txub'txaj ex segurxix, kjawil kyb'incha'n kyja ex kb'elex kyawa'n tqan uva. Wu'ne kb'el kysentens qe tnam kyvesin kyib' kyuk'il aj Israel, aqeju ma che el ik'unte kye. K'eleltzun kynik' aj Israel ti'j, aqine Kydios.