Read kumam Ezequiel 29 Bible Online

Ezequiel 29 - kumam bible

Ezequiel 29

¹Tuj tkab'lajin q'ij te tlajin xjaw ex te tlajin ab'q'i, tzaj yolin Qman wuk'ile ex tma kyja':

²Aya xjal, ke'yinxa tumlal tx'otx' Egipto jatum in kawin Faraón, ex q'manxa te rey ex kye kykyaqil aj Egipto aju mya b'a'n o kyb'incha.

³Q'manxa kyja': Atzun jlu in tma'n Qman: Ma chin oke aj q'oj ti'ja, aya Faraón rey te Egipto, ik ttena ik tza'n jun nintz txkup tku'xa tuj nima etzan tu'na, ex in tmana kyja': Weye aju nima Nilo, wu'ne o b'ant.

⁴K'okex nq'o'ne jun ganch tuj ttzi'ya, ex qe kyiẍ ate' tuj nima etzan tu'na ok nb'inchaye tu'n kyok kychmon kyib' ti'j tpwaqil ti'ja. Kjawitz njawo'ne tuj nima kyuk'ix kykyaqil qe kyiẍ kychmon kyib' ti'j tpwaqil ti'ja.

⁵Kxel nxo'ne max tuj tzqij tx'otx' kyuk'ix qe kyiẍ ate' tuj nima etzan tu'na; kb'el tz'aqa tuj kojb'il ex mi jun kjawil q'inte teya tu'n tku'x maqu'na. Kxel nq'o'ne t-ximlala te kychi' qe txkup te tjaq' k'ul ex te kychi' qe k'utz.

⁶Kykyaqil xjal najl tuj tnam Egipto k'elel kynik' ti'j qa aqine Dios. Qe aj Israel e pon qanil onb'il tuk'ila, ex oka te kye ik tza'n jun ajlaj toqoqon ti'j.

⁷Tej ttzaj tzyu'na kyu'n ik tza'n jun ky'aqo'ch, atzun teya kub' toqja ex k'ixb'i kyxu'k tu'na; tej kyok q'eje' ti'ja, atzun teya kub' toqja ex e kub' tz'aq twitz tx'otx' tu'na.

⁸Kyja'tzun aqine Dios in xi nma'ne jlu: Aya tnam Egipto, che tzajel wi'ne qe aj q'oj tu'n kyok tzoqpaj ti'ja tu'n spad, ex tu'n kykub' b'yo'n qe xjal ex qe alumaj kyu'n.

⁹K'okela te tzqij tx'otx' jatum minti' xjal najl tuj, ex k'elel kynik' xjal ti'j qa aqine Dios. O tmaya kyja': Weye ju nima Nilo, wu'ne o b'ant.

¹⁰Kyja'tzun ma chin oke aj q'oj ti'ja ex ti'j nima etzan tu'na. K'okela wu'ne te tzqij tx'otx' xob'ajilxix ex minti' xjal najl tuj, kxelx qe' tuj Migdol kpol b'aj tuj tnam Asuán, ex max jatum ulni tmojonil tnam Etiopía.

¹¹Mi qe xjal ex mi qe alumaj che ik'el b'et tuj ju lugar lu. Tuj enter 40 ab'q'i mi jun knajal tuj.

¹²K'okel tx'otx' Egipto wu'ne te jun lugar minti' xjal najl tuj, ik tza'n qe txqantl tnam minti' xjal o che kyaj ten kyuj; b'i'x kb'el xitj ex tuj enter 40 ab'q'i mi jun kjawil b'inchante te juntl maj, mas pyor k'okel ik tza'n qe txqantl tnam o che kub' xitj, ex qe xjal najl tuj che xel nsputune kyxol txqantl nasyon.

¹³Aqine Dios in xi nma'ne jlu: Tb'ajlenxi 40 ab'q'i, che ajetz nchmo'ne juntl maj aj Egipto jatum otoq che b'aj nsputune.

¹⁴Qe aj Egipto, aqeju otoq che'x q'i'n pres, che ajetz meltz'aj wu'ne ex che najal tuj tx'otx' Patros, ax tuj kytanmi, ex atzun kb'antel jun kawb'il kyu'n ch'in toklen.

¹⁵Aju kawb'il lu k'okel te minti' tipun kywitz txqantl kawb'il, ex mlay jaw ti'ntl tib' tu'n tkawin kyib'aj txqantl nasyon. K'okel wu'ne te ch'in tipun tu'ntzun mi'n tkawin kyib'aj txqantl nasyon,

¹⁶mlay tz'ok qe'tl kyk'u'j aj Israel ti'j Egipto, tzul ti'j kyk'u'j aju il otoq kyb'incha tej kyxi' qanil onb'il te. K'eleltzun kynik' aj Israel ti'j, aqine Dios.

¹⁷Tuj tnejel q'ij te tnejel xjaw ex tuj ab'q'i 27, tzaj yolin Qman wuk'ile ex tma kyja':

¹⁸Ate Nabucodonosor aju rey te Babilonia, kyuk'ix qe t-soldad, o che q'ojin kyuwxix ti'j tnam Tiro; kykyaqil o tzaj jilj ttzmal kywi' ex o b'aj tz'olj tzal kyi'j tjaq' iqtz; ex mi Nabucodonosor ex mi qe t-soldad minti' ch'in kykamb'a tej kyq'ojin ti'j tnam Tiro.

¹⁹Kyja'tzun aqine Dios in xi nma'ne jlu: Kxel nq'o'ne aju tx'otx' Egipto te Nabucodonosor tu'n tok te tajwil, ex k'elel ti'n tq'inumab'l ex tkyaqil aju at tuj, kchjetel twi kyk'u'j qe t-soldad tu'n tkyaqilju kxel telq'a'n.

²⁰Kxel nq'o'ne aju tx'otx' Egipto te Nabucodonosor te chojb'il te, tu'nju o q'ojin nimxix ti'j tnam Tiro, porke weye o che ajb'en. Aqine Dios in chin q'mante jlu.

²¹Ok tb'ant jlu, kxel nq'o'ne nimxix kyipumal aj Israel, ex aya Ezequiel k-yolila kyxol minti' t-xob'ila. K'eleltzun kynik' ti'j, aqine Dios.