Read kumam Ezequiel 3 Bible Online

Ezequiel 3 - kumam bible

Ezequiel 3

¹Tmatzun weye: Aya xjal, wa'nxa ju u'j tz'ib'an yol twitz, aju ma tzaj yek'un teya, ex txi'ya yolil kyuk'il aj Israel.

²Xitzun nk'ab'ine tuj ntzi'ye, tzaj tma'n weye tu'n t-xi nwa'ne ju u'j tz'ib'an yol twitz,

³ex tma kyja': B'alq'unxtzuna ja'lo aju u'j ma txi nq'o'ne teya, aju tz'ib'an yol twitz, ex e tnoj tk'u'ja tu'n. Xitzun nwa'ne, ex o nna'ye puro chi' wen ik tza'n ta'l kab'.

⁴Ex tmatl weye kyja': Txi'ya, ex q'manxa kye aj Israel aju yol kxel nma'ne kye.

⁵Minti' in xi nsama'na tuj jun tnam jatum junxitl yol in che yolin xjal ti'j ex kyuw tu'n tel tnik'a ti'j, ax kyxol aj Israel kxel nsama'na.

⁶Minti' in xi nsama'na kyuj txqantl nasyon, aqeju junxitl txkaj yol in che yolin ti'j, ex qa kyuw te teya tu'n tel tnik'a ti'j. Noqwit a xi nsama'na kyuj qe tnam lu, jaku txi b'i'n tyola kyu'n.

⁷Atzun kye aj Israel, baqa kxel kyb'i'n tyola, ex mi kyaj tu'n t-xi kyb'i'n aju weye nyol. Kykyaqil aj Israel kyuw kywi' ex kyuw kyanmi.

⁸Ax ikx teya k'okela kyuw wen wu'ne ik tza'n kye.

⁹K'okela kyuw wen wu'ne, ik tza'n jun tb'anil ab'j diamante tb'i mas kyuw kywitz qe txqantl ab'j. Mi'n xob'a kywitz, ex mi'n jaw sek'paja kywitz maske jumajx mib'an che b'i'n.

¹⁰Ex tmatl weye kyja': Q'ontzxix twi'ya ti'j ju yol kxel nma'ne teya, ex b'i'x q'on kyaja tuj tnab'la.

¹¹Txi'ya ke'yil kye qe t-xjalila o che ul q'i'n tzalu, qa xi b'i'n tyola kyu'n ex qa mi'n, ex q'manxa kye kyja': Atzun jlu in tma'n Qman, chikuya, chi tzaj tma'n weye.

¹²In jawtzun q'i'ne tu'n tipumal Dios, ex o nb'iye jun tq'ajq'ajel ma wi'jxiye in jululun wen ex in tma'n kyja': Nimanxwit tajwalil Qman tujx tlugar.

¹³Aju tq'ajq'ajel o nb'iye, atzun tq'ajq'ajel kyxik' qe jil ok in pon juql te jun ti'j te juntl, ax ikx kyq'ajq'ajel qe rwed junx ate' kyuk'il; aju tq'ajq'ajel in jululun wen.

¹⁴In jawtzun q'i'ne tu'n tipumal Dios ex in etz q'i'ne tuj lugar lu, kub'tzun b'e wu'ne, tzaj ta'w tuj wanmiye, ex tzaj tlo'ch nk'u'je tu'nju tzyu'n qine kyuw wen tu'n tq'ab' Qman.

¹⁵Ex in pone tuj tnam Tel Abib ttzi nima Quebar, jatum najl qe aj Israel otoq che pon q'i'n tuj Babilonia, in kub' qe'ye kyxol, ex wuq q'ij in tene kyuk'il minti' b'a'n wu'ne alkye tu'n tb'ant, ex alkye yol tu'n t-xi nma'ne kye.

¹⁶Tb'ajlenxi wuq q'ij lu tzaj yolin Qman wuk'ile ex tma kyja':

¹⁷Aya xjal, ma tz'ok nq'o'ne te xq'uqil kye aj Israel. Ok t-xi nma'ne jun yol teya, il ti'j tu'n t-xi tma'na kye xjal te nxele, tu'n kyb'inte alkye ktzajel kyi'j.

¹⁸Qa ma txi nma'ne tu'n tkub' t-sentens jun xjal b'inchal mya b'a'n tu'n tkyim; ex qa mi'n ma yolina tuk'il, ex qa mi'n ma txi tma'na tu'n tkyaj tkolin tmod mya b'a'n tu'ntzun kukx tanq'in, ax tok kymel xjal lu tu'n tlaj til, atzun teya ok tq'a'ya tajlal weye ti'j tkamik xjal.

¹⁹Qatzun ma txi tma'na teju xjal b'inchal mya b'a'n, ex qa ax te xjal minti' ma txi tkolin tu'n tb'inchante mya b'a'n ex minti' ma ch'expet tmod mya b'a'n, ax tok kymel te xjal lu tu'n tlaj til, atzun teya mlay kyima, porke minti' tila tu'n tlaj jlu.

²⁰Ax ikx jun xjal tz'aqlxix, qa ma kyaj tkolin tu'n tb'inchante ju tzaq'lxix noq tu'n tb'inchante ju mya b'a'n, ex qa ma kub' nq'o'ne jun tolsab'l twitz, qa mi'n ma txi tma'na te, kymel, mlayx tzaj nna'ne aju b'a'n otoq tb'incha ex kymel tu'n tlaj tex til, atzun teya ok tq'a'ya tajlal weye ti'j tkamik xjal lu.

²¹Qatzun ma txi tma'na teju xjal tz'aqlxix tu'n mi'n tb'inchan il, ex qa mi'n ma b'inchan il, kukx k'anq'il tu'nju otoq txi tb'i'n aju otoq txi tma'na te, atzun teya mlay kyima, tu'nju otoq txi tma'na te.

²²Ax tujx lugar lu, o nna'ye tipumal Qman, ex tma weye kyja': We'ktza ex texa tuj chq'ajlaj, ex atzun chin yolile tuk'ila.

²³In jawtzun we'ye, ex in ex b'ete tuj chq'ajlaj, ex atzun o wile tajwalil Qman ik tza'nx otoq wile nej ttzi nima Quebar. In kub' ẍmeje'ye ex pon takl tib'aj nwitze max twitz tx'otx'.

²⁴Ex o nk'ame tipumal Dios ex in jaw wab'ane tu'n. Tzajtzun yolin Qman wuk'ile ex tma kyja': Txi'ya ex lamo'n okx tib'a tuj tjaya.

²⁵B'intza, kb'el k'alo'na tu'n saqb'aq kyu'n xjal, tu'ntzun mi'n tetza ex tu'n mi'n ttena kyxol.

²⁶Ax ikx k'okel tlak'on tib' taq'a twitz tk'o'na wu'ne, tu'ntzun mi tb'ant tyolina. Mlayx b'ant tu'n kyok tmayo'na, porke qe xjal lu jumajx mib'an che b'in.

²⁷Porke noq alkye q'ij waje tu'n t-xi nma'ne jun nyole teya, kb'antel tyolina juntl maj, kxe'ltzun tma'na kye kyja': Atzun jlu in tma'n Qman. Alkye jun taj tu'n tb'in, b'a'n tu'n tb'inte, ex alkye jun mi'n taj tu'n tb'in, b'a'n tu'n mi'n tb'inte, porke qe xjal lu jumajx mib'an che b'in.