Read kumam Ezequiel 31 Bible Online

Ezequiel 31 - kumam bible

Ezequiel 31

¹Tuj tnejel q'ij te toxin xjaw ex te tjunlajin ab'q'i, tzaj yolin Qman wuk'ile ex tma kyja':

²Aya xjal, q'manxa te Faraón aju rey te Egipto ex kye kykyaqil qe t-xjalil: ¿Alkye juntl ma' toklen ik tza'n teya?

³Ik ttentoq nasyon Asiria ik tza'n jun wi'ten twi witz Líbano, in kub' t-xmu'jin qe txqantl tze' kyu'n qe tq'ab' tb'anilxix che ke'yin, matijxix twa'l max in japun tunen twitz kya'j.

⁴Aju jb'al ex aju a' in jatz jlet twitz tx'otx' e onin ti'j tu'n tch'iy; e jatz qe twi nima ttxlaj jatum tkub'toq; ex qe nima lu b'aj kya'lin kykyaqil qe tze' tuj chk'ul.

⁵Tu'nju attoq nim a' t-xe', ch'iyxix mas kywitz qe txqantl tze' tuj chk'ul; el jlet nimxix tq'ab' ex e ch'iyxix wen.

⁶Kykyaqil txkaj jil b'a'n che lipan twitz kya'j kyb'incha kyq'u' kyxol qe tq'ab'; ex kykyaqil txkaj txkup te tjaq' k'ul e alin t-xe tqan. E najan nimku nasyon tjaq' t-xlekumal.

⁷A jlu jun tze' tb'anilxixtoq, ma' twa'l ex nmaq qe tq'ab', tu'nju xi'yni qe tlok' tuj a'.

⁸Minti' jun wi'ten tuj tqan tawal Dios pon ik tza'n te; minti' jun tzaj attoq tq'ab' ik tza'n te, minti' jun tze' castaño attoq nim t-xaq ik tza'n te, ex minti' jun tze' tuj tqan tawal Dios o pon ke'yb'ilte tb'anilxix ik tza'n te.

⁹Wu'ne tb'anilxix o tz'ok ke'yin ex nimxix tq'ab'; qe txqantl tze' tuj Edén o che b'isun tu'nju minti' e pon ik tza'n te.

¹⁰Kyja'tzun, atzun jlu in tma'n Qman: Matijxix ma tz'ok twa'l tze' ex ma japun tunen max twitz kya'j; nimxix ma ch'iy ex nimxix ma jaw tniman tib'.

¹¹Tu'ntzun jlu ma tz'el wik'une; kxel nq'o'ne tuj tq'ab' jun nejenel stranjer xjal, ex k'okel b'incha'n ti'j ik tza'nx tb'inchb'en mya b'a'n.

¹²Kjawil tx'emin kyu'n qe stranjer xjal mas tx'u'jxix qe ex kyjel kykolin; che elel toqj qe tq'ab' ex che b'el tz'aq kywi' qe witz ex kyuj qe chq'ajlaj, ex kyuj qe tqan xaq, ex kykyaqil qe xjal e najan tjaq' t-xlekumal che elel oq ex kyjel kykolin.

¹³Kykyaqil txkaj jil b'a'n che lipan twitz kya'j che tzajel najal kyxol qe tq'ab' tze' otoq kub' tz'aq, ex kykyaqil txkaj jil te tjaq' k'ul che okex ten kyxol qe tq'ab'.

¹⁴Ex minti'tl juntl tze' kch'iyil twa'l matijxix wen maske tkub' niqayin ttxlaj a': maske b'et nimxix a' t-xe' mlayx japun kanun tunen max twitz kya'j, ex mi'nxixpe ch'iy twa'l. Kykyaqil tkub' kysentens tu'n kykyim, tu'n kyxi' tuj kynajb'il kyimni tjaq' tx'otx' ex tu'n kyku'pun kyuk'il qeju ate' tuj muqb'il.

¹⁵Aqine Dios in xi nma'ne jlu: Ok tku'pun tuj kynajb'il kyimni, tu'n b'is ktzqijel wu'ne aju mar ma'xix t-xe'; che web'el qe nima wu'ne ex ikx qe a' tuj tq'ab' xaq; noq tu'n tlaj, ktzajel tb'is ju witz Líbano wu'ne ex che tzqijel kykyaqil qe tze' tuj chk'ul.

¹⁶Ok tku'pun wu'ne tuj kynajb'il kyimni tu'n tpon kyuk'il qeju o che kyim, b'i'x che tzajel lu'lun qe nasyon tu'n tq'ajq'ajel ok tku'pun tz'aq. Max tuj kynajb'il kyimni kqeb'el kyk'u'j kykyaqil qe tze' ate'toq tuj Edén, kyuk'ix qe tze' ate'toq twi witz Líbano, aqeju tb'anilxix che ke'yin ex in b'et a' kyxe'.

¹⁷Ax ikx kye che xe'l tuj kynajb'il kyimni ik tza'n te, ex k'okel kyjunin kyib' kyuk'il qeju o che kyim tuj q'oj, aqeju e najan tjaq' t-xlekumal kyxol qe nasyon.

¹⁸Minti' jun tze' tuj Edén o pon ke'yb'ilte tb'anilxix ex matij twa'l ik tza'n te; maske ikju, pero kxe'l tuj kynajb'il kyimni kyuk'ix qe txqantl tze' ate'toq tuj Edén, tu'n tnajan kyxol qe xjal mya nimal Dios qe, ex kyxol qe xjal e kyim tuj q'oj. Aju tze', atzun in yolin ti'j Faraón ex kyi'j kykyaqil qe t-xjalil. Aqine Dios ma chin q'mante jlu.