Read kumam Ezequiel 32 Bible Online

Ezequiel 32 - kumam bible

Ezequiel 32

¹Tuj tnejel q'ij te tkab'lajin xjaw ex te tkab'lajin ab'q'i, tzaj yolin Qman wuk'ile ex tma kyja':

²Aya xjal, b'itzanxa ju b'itz lu te b'is ti'j Faraón aju rey te Egipto: Ik ttena ik tza'n jun b'alun kyxol qe nasyon; ik ttena ik tza'n jun nintz txkup najl tuj mar: In xpurin a' tu'n tqana tuj nima, ex tu'n tqana in b'aj ttz'ilsa'na a' ex in yukch tu'na.

³Atzun jlu in tma'n Qman: Kxel nxo'ne nxuyb'e tib'aja, atzun nim kyajlal tnam ex kyu'ntzun ktzyetela wu'ne.

⁴Ok kjawitz wi'ne tu'n tjawila twitz tx'otx' ex kyjel pale'ya wu'ne twitz tx'otx'. Che tzajel wi'ne kykyaqil txkaj jil in che lipan twitz kya'j tu'n kykub' we' tib'aja, ex kxel chyo'n tchib'jala kyu'n kykyaqil txkup te tjaq' k'ul.

⁵Kb'el nq'o'ne tchib'jala q'ayni kywi' qe witz ex kywitz qe chq'ajlaj kyxol witz.

⁶Kb'ajel ak'ix twitz tx'otx' tu'n tchk'ela wu'ne ex kpol ak'ix max kywi' qe witz, ex che nojel qe tq'ab' xaq tu'n.

⁷Ok tnaja wu'ne, kmaqsetel twitz kya'j ex k'okel yupj kywitz qe che'w; k'okel nq'o'ne muj twitz q'ij ex mlay tzaj tq'o'n xjaw t-spik'umal.

⁸Tu'n tlaja che b'elex nyupune kykyaqil qe spik'un in che qoptz'aj twitz kya'j, ex knojel tuj ttanmiya wu'ne tu'n qlolj. Aqine Dios in chin q'mante jlu.

⁹Ktzajel kyb'is nimku tnam ok kyxi wi'ne qe t-xjalila kyuj qe nasyon minti' ojtzqi'n tu'na.

¹⁰Ktzajel kyxob'il nimku tnam ti'ja; b'i'x knajel kynab'l qe kyrey ok kylonte ok t-xi njato'ne nspadiye ti'ja. Ok tkub' xitja che tzajel lu'lun tu'n kyxob'il, ti'j kychwinqlal.

¹¹Chi Qman kyja': Aju t-spad rey te Babilonia kpol kanun ti'ja ex knajela tu'n.

¹²Qe t-xjalila nimxix kyb'aj che najel wu'ne tu'n kyspad qe q'ojlel nim kyipun ex tx'u'j qe. Mi'n jaw kynimantl kyib' aj Egipto, ex che b'el b'yo'n kykyaqil qe t-xjalila nimxix kyb'aj.

¹³Che najel kykyaqil alumaj wu'ne, aqeju in che wa'n ttzi nima, ex mlay b'aj ẍwo'jix twitz a' tu'n kyqan xjal ex mi tu'n kyqan alumaj.

¹⁴Ksaqixtel twitz a' wu'ne ex che b'etel qe nima wu'ne ik tza'n aseyt minti' in jululun. Aqine Dios in chin q'mante jlu.

¹⁵Ok tb'aj xitj tnam Egipto wu'ne ok tex q'i'n tkyaqilju at tuj ex ok kykub' b'yo'n kykyaqil xjal najl tuj, k'eleltzun kynik' ti'j, aqine Dios.

¹⁶Atzunju b'itz lu te b'is kxel kyb'itzan qe xu'j te txqantl nasyon ok kyjaw oq' ti'j tnam Egipto ex kyi'j qe xjal nimxix kyb'aj najlqe tuj. Aqine Dios in chin q'mante jlu.

¹⁷Tuj t-olajin q'ij te xjaw te tkab'lajin ab'q'i, tzaj yolin Qman wuk'ile ex tma kyja':

¹⁸Aya xjal, b'itzanxa jun b'itz te b'is kyi'j qe xjal nimxix kyb'aj ate' tuj Egipto. Xo'n ku'xa qe tuj kynajb'il kyimni junx kyuk'il qe txqantl nasyon nim kyipun ex mojl kyyol tuk'il, junx kyuk'il qeju in che ku'pun tuj kynajb'il kyimni.

¹⁹¿Maspetzun mejorxix ke'yina kywitz qe txqantl nasyon? Tku'xa tuj kynajb'il kyimni ex koẍekuya junx kyuk'il qeju mya nimal Dios qe.

²⁰Che b'el b'yo'n aj Egipto junx kyuk'il qeju o che kyim tuj q'oj. B'anin tten spad kyi'j. Kyi'nxe qe kyuk'ix qe kyxjalil nim kyb'aj.

²¹Qe nejenel nimxix kyipun, aqeju otoq che ku'pun tuj kynajb'il kyimni kyuk'ix qeju mojl kyyol kyuk'il, ktzajel kyma'n kyja': Ma che ku'tz ex ma che kub' koẍe' kyxol qeju mya nimal Dios qe, aqeju e kyim tu'n spad tuj q'oj.

²²Atzun ta' nasyon Asiria kyuk'ix qe t-soldad nim kyb'aj ex txolin ti'j tmuqb'il tu'n kymuqb'il. Kykyaqil qe jlu tuj q'oj e kyim.

²³Maqu'n qe max t-xe'pun kynajb'il kyimni. Tej itz'xtoq qe soldad lu tzaj nim kyxob'il xjal kyu'n, ex e kyim tuj q'oj ex atzun ja'lo txolin ti'j tmuqb'il Asiria kyu'n.

²⁴Atzun ta' nasyon Elam kyuk'ix kykyaqil qe t-soldad txolin ti'j tmuqb'il kyu'n. Kykyaqil qe jlu tuj q'oj e kyim, mya nimal Dios qe ex ma che'x tuj kynajb'il kyimni. Tej itz'xtoq qe tzaj kyxob'il xjal kyu'n, atzun ja'lo minti' nimb'il kye kyxol qeju o che ku'pun tuj kynajb'il kyimni.

²⁵Palch tnam Elam kyxol kykyaqil qe t-soldad kyimni qe, kykyaqil qe jlu tuj q'oj e kyim ex mya nimal Dios qe, ja'lo txolin kyten ti'j tmuqb'il Elam. Tej itz'xtoq qe tzaj nim kyxob'il xjal kyu'n, atzun ja'lo minti' nimb'il kye kyxol qeju o che ku'pun tuj kynajb'il kyimni. Ma che ku'pun kyxol qe xjal b'yo'n e kub'.

²⁶Atzun ta' nasyon Mesec tuk'ix Tubal, kyuk'ix kykyaqil qe kysoldad txolin ti'j kymuqb'il tu'n, kykyaqil qe jlu mya nimal Dios qe ex tuj q'oj e kyim; tej itz'xtoq qe tzaj nim kyxob'il xjal kyu'n.

²⁷Mya junx maqu'n qe kyuk'il qe kyimni ma' kyoklen e ten twitz tx'otx' ojtxi, aqeju q'i'nx kymakb'il in ajb'en tuj q'oj tej kyku'x tuj kynajb'il kyimni, tokx kyspad tjaq' kywi' ex kub' kycastiw tu'n tlaj kyil, tu'nju nim kyxob'il xjal tzaj kyu'n tej itz'xtoq qe.

²⁸Ikx teya Faraón kb'ajel b'uchja kyxol qe xjal mya nimal Dios qe, ex kb'elex pale'ya kyuk'il qeju o che kyim tuj q'oj.

²⁹Atzun ta' Edom kyuk'ix qe t-rey ex kykyaqil qe tkawb'il. Maske ten nimxix kyipumal, pero atzun ate' kyxol qe xjal o che kyim tuj q'oj, maqu'n qe kyxol qe xjal mya nimal Dios qe, kyxol qeju o che ku'pun tuj kynajb'il kyimni.

³⁰Atzun ate' kykyaqil qe nejenel kye qe tnam ate' tuj tx'otx' tuj tb'anq'ab' q'ij kyuk'ix kykyaqil aj Sidón. E ok nimxix kyipumal ex tzaj nim kyxob'il xjal kyu'n tej itz'xtoq qe, atzun ja'lo o che ku'pun kyxol qe kyimni o che kyim tuj q'oj, ex ma tz'el kych'ixwi. Mya nimal Dios qe, maqu'n qe ex minti' nimb'il kye kyxol qeju o che ku'pun tuj kynajb'il kyimni.

³¹Oktzun tke'yinte Faraón qe jlu, kqeb'el tk'u'j ti'j kykyimlen kykyaqil qe t-xjalil, porke ikx te ex kyuk'ix kykyaqil qe t-soldad e kyim tuj q'oj. Aqine Dios in chin q'mante jlu.

³²Tej itz'xtoq Faraón xi nq'o'ne amb'il te tu'n ttzaj nim kyxob'il xjal tu'n; kyja'tzun maqu'n kyxol qe xjal mya nimal Dios qe, kyxol qeju e kyim tuj q'oj, ax ikx qe t-soldad nimxix kyb'aj. Aqine Dios in chin q'mante jlu.