Read kumam Ezequiel 33 Bible Online

Ezequiel 33 - kumam bible

Ezequiel 33

¹Tzaj yolin Qman wuk'ile ex tma kyja':

²Aya xjal, yolina kyuk'il qe t-xjalila ex q'manxa kye kyja': Ok t-xi nsama'ne jun tnam q'ojlel ti'j juntl, kjawiltzun kysk'o'n xjal teju tnam lu jun kyxol tu'n tok te xq'uqil.

³Oktzun tke'yinte xq'uqil kyja' kytzaj txqan soldad aj q'oj tu'n kyul laq'e' ti'j tnam, k'okel tq'ajtza'n chun tu'n kyb'inte qe xjal te tnam.

⁴Qa at jun xjal ma b'inte tq'ajq'ajel chun ex minti' ma txi tniman, ex qa ma che pon aj q'oj ex qa ma kub' b'yo'n kyu'n, mi a'l jun at til ti'j tkamik, ax te xjal at til ti'j tkamik,

⁵tu'nju otoq tb'i tq'ajq'ajel chun ex minti' xi tniman; ax te xjal at til ti'j tkamik, ex noqwit xi tniman tq'ajq'ajel chun owtlo klet.

⁶Qatzun ma til xq'uqil ok kypon qe soldad aj q'oj ex minti' ma tz'ok tq'ajtza'n chun tu'n kyb'inte xjal, qa ma che pon aj q'oj ex ma kub' b'yo'n jun xjal kyu'n, aju xjal lu kymel tu'n tlaj til, ex kxel nqanine te xq'uqil tiqu'n otoq kyim xjal.

⁷Aya xjal, ma tz'ok nq'o'ne te xq'uqil kye aj Israel. Ok tk'ma'ya nyole ex kxel tma'na kye.

⁸Mya yajku tzaj nma'ne teya tu'n tkub' t-sentens jun xjal b'inchal mya b'a'n tu'n tkyim; qa mi ma txi tma'na te tu'n tb'aj tch'expu'n tmod, aju xjal lu kymel tu'n tlaj til, ex kxel nqanine teya tiqu'n otoq kyim.

⁹Qatzun ma txi tma'na teju xjal b'inchal mya b'a'n tu'n tb'aj tch'expu'n tmod ex qa mi ma tb'incha, kymel tu'n tlaj til, atzun teya mlay kyima, porke minti' tila tu'n tlaj jlu.

¹⁰Aya xjal, q'manxa kye aj Israel: Aqeye in kyma'ne kyja': At nim qpaltil ex at nim qil. Kyja'tzun ch'ix qnaj. ¿Tza'n tten qo anq'il?

¹¹Pero aqine Dios in xi nma'ne jun nyole axix tok: Mi'n waje tu'n tkyim jun xjal b'inchal mya b'a'n, noq o'kx waje tu'n tb'aj tch'expu'n tmod tu'ntzun tanq'in. Aqeye aj Israel, kykolin kyaje aju kytene mya b'a'n q'i'n kyu'ne. ¿Tiqu'n kyaje tu'n kykyime?

¹²Aya xjal, q'manxa kye qe t-xjalila kyja': Qa at jun xjal tz'aqlxix ma b'inchan il, mlay klet tu'nju tb'inchb'en b'a'n te ojtxi, ex qa at jun xjal mya b'a'n ma kyaj tkolin tb'inchb'en mya b'a'n, mlay kyim tu'nju tb'inchb'en te ojtxi. Qa at jun xjal b'a'n ma b'inchan il, mlay tz'anq'in tu'nju tb'inchb'en b'a'n te ojtxi.

¹³Qa ma txi ntziyane tu'n t-xi nq'o'ne tchwinqlal jun xjal b'a'n tb'inchb'en, ex qa ma tz'ok qe' tk'u'j ti'j ju b'a'n otoq tb'incha nej, ex qa ma tz'ok ten b'inchal mya b'a'n, mi jun tb'inchb'en b'a'n k'okel nq'o'ne tajlal, noq o'kx tu'n tkyim tu'n tlaj tb'inchb'en mya b'a'n.

¹⁴Ex qa ma txi nma'ne tu'n tkyim jun xjal b'inchal mya b'a'n, ex qa ma kyaj tkolin tu'n tb'inchante il, ex qa ma tb'incha ju b'a'n ex ju tz'aqlxix,

¹⁵qa ma tz'aj tq'o'n aju otoq tk'am te prent te tuk'il, qa ma tz'aj tq'o'n aju otoq tz'el telq'a'n, qa ma che japun qe ley tu'n, aqeju in kyq'o'n chwinqlal, ex qa ma kyaj tkolin tu'n tb'inchante mya b'a'n, ax tok aju xjal lu k'anq'il ex mlay kyim.

¹⁶Mlay tzaj nna'ne mi jun til otoq tb'incha nej, ex kukx k'anq'il tu'nju ma tb'incha aju b'a'n ex aju tz'aqlxix.

¹⁷Oklo kyma' qe t-xjalila qa mya tuj tumel in b'ant wu'ne; ex ax tok ax qe mya tuj tumel in b'ant kyu'n.

¹⁸Qa ma kyaj tkolin xjal b'a'n aju tb'inchb'en b'a'n ex qa ma tb'incha mya b'a'n, kymel tu'n tlaj jlu.

¹⁹Ex qa ma kyaj tkolin xjal mya b'a'n aju tb'inchb'en mya b'a'n, ex qa ma tb'incha aju b'a'n ex aju tz'aqlxix, tu'n tlaj jlu k'anq'il.

²⁰Atzun kyeye kukx t-xi kyma'ne: Minti' in tb'incha'n Qman aju tz'aqlxix, ex aqeye aj Israel, teyle junjun kyeye kb'el tcastiw wu'ne ik tza'nx tb'inchb'en.

²¹Tuj jwe' tajlal tlajin xjaw ex te tkab'lajin ab'q'i qul-len q'i'n tuj Babilonia, at jun xjal otoq tzoqpaj tuj Jerusalén ul wuk'ile ex tzaj tma'n weye kyja': O kub' ti'j tnam kyu'n aj q'oj.

²²Teju qonik'an tej na'nxtoq tul aju xjal otoq tzoqpaj, o nna'ye tipumal Qman, ex te prim tej tul xjal, otoq jaqet ntzi'ye tu'n Qman, ex mya mentl qine.

²³Tzaj yolin Qman wuk'ile ex tma kyja':

²⁴Qe xjal najl kyuj qe tnam o che naj tuj Israel in kyma'n kyja': Tjunalxte Abraham pero ok te tajwil ju tx'otx', ikxtzun qe qo okel te tajwil tx'otx' tu'nju mas nim qb'aj.

²⁵Kyja'tzun q'manxa kye: Chi Qman in tma'n kyja': In che chyo'ne chib'j tuk'ix tchk'el, in che k'ulune kywitz qe tilb'ilal, ex in kub' kyb'yo'ne qe kyuk'ile, ¿che chipetzune qa che okele te tajwil aju tx'otx'?

²⁶Nno'k qe' kyk'u'je ti'j kyspadiye tu'n tkub' kyb'yo'ne xjal, in kyb'incha'ne aju mya b'a'n nne'l tuj nwitze, ex in kub' kymojb'an kyib'e tuk'il t-xu'jil kyuk'ile, ¿che chipetzune qa che okele te tajwil aju tx'otx'?

²⁷Ax ikx q'manxa kye: Chi Qman in tma'n kyja': Kxel nma'ne jun nyole axix tok, qe xjal najl kyuj qe tnam o che kub' xitj, che b'el b'yo'n, ex qeju najl tuj kojb'il, che xel nq'one kye txkup tu'n kyb'aj chyo'n, atzun qeju najl kyuj qe toy' pik ex kyuj jul, che kymel tu'n yab'il.

²⁸K'okel nq'o'ne kytx'otx' aj Israel te jun lugar minti' kynajb'il xjal tuj, ex b'i'x kb'ajel naj; wu'ne knajel kyipumal qeju in jaw kyniman kyib'. Qe witz tuj kytx'otx' che okel te jun lugar minti' kynajb'il xjal tuj ex mi a'l jun kb'etel kywi'.

²⁹Ok tok ju tx'otx' te minti' kynajb'il xjal tuj, ex ok tnaj tu'n kylaj qe il o kyb'incha, aqeju ik'un wu'ne, k'eleltzun kynik' ti'j, aqine Dios.

³⁰Nno'k kychmon kyib' qe t-xjalila kywitz muro ex kytzi kyja tu'n kyyolin ti'ja, ex in kyma'n kyxolx kyja': Kytzaje, qo b'in ti'j ju yol ma tzaj tma'n Qman te t-sanjel.

³¹Qe xjal etzan wu'ne in che ul twitza ex in che kub' qe' twitza ik tza'nx in b'ant kyu'n tu'n kyb'inte tyola. Pero minti' in kyb'incha'n aju in tma'na. In che yolin yol mejorxix, ex noq tten kyu'n, ex atzun tok kyk'u'j ti'j pwaq.

³²Ik nno'ka te kye ik tza'n jun xjal mejor b'itzan, mejor tq'ajq'ajel twi', ex mejor chimb'an ti'j arpa. In kyb'i'n ju tyola ex minti' in kyb'incha'n aju in tma'na.

³³Maske ikju, pero kjapunel tkyaqilju o tmaya kye, ex ok tjapun k'elel kynik' ti'j, o ten jun t-sanjel Dios kyxol.