Read kumam Ezequiel 34 Bible Online

Ezequiel 34 - kumam bible

Ezequiel 34

¹Tzajtzun yolin Qman wuk'ile ex tma kyja':

²Aya xjal, yolina te nxele kyuk'il qe pastor kye aj Israel ex q'manxa kye kyja': Chi Qman: B'ek'b'il kywitz qe pastor kye aj Israel, porke o'kx kye nno'k kykwentin kyib'. ¿Myapetzun aqe ẍne'l ex qe chip tu'n kyok kykwentin?

³In che k'ane ti'j kylech chip, in b'aj kyb'incha'ne kytzmal ẍne'l te kyxb'alune, in kub' kyb'yo'ne qe ẍne'l mas ulni kynab'l te kychi'ye, ex minti' in che ok kykwentine qe.

⁴Minti' in che onine kyi'j qe ẍne'l okni kyi'j, minti' in che ok tene q'anal kyi'j qe yab', minti' nno'k kypotzine ti'j kyqan otoq toqj, minti' in che ajtz kyi'ne qeju otoq che'x najchaq tuj k'ul, ex minti' in che ok tene jyol kye qeju otoq che kyaj tzpet, noq o'kx kyuw in che'xe kyi'j ex in tzaj kytx'u'jile kyi'j.

⁵Ma che b'aj sputj qe nẍne'le tu'n tlaj mi a'l pastor kyi'j ex ma che'x chyo'n kyu'n txkup te tjaq' chk'ul.

⁶Ma b'aj kysputun kyib' kywi' kykyaqil witz, ex kywi' qe nmaq witz, ma che'x tzpet tuj tkyaqil twitz tx'otx', ex mi a'l jun ma tzaj tb'is kyi'j ex mi a'l jun ma txi' jyolte kye.

⁷Kyja'tzun aqeye pastor, kyq'ontzxix kywi'ye ti'j nyole.

⁸Aqine Dios in xi nma'ne jun nyole axix tok: Kykyaqil txkaj txkup te tjaq' k'ul ma che'x kyelq'a'n qe nẍne'le ex ma che'x kychyo'n tu'nju mi a'l pastor kyi'j. Qe pastor minti' in che'x jyol kye qe ẍne'l. Ax qe nno'k kykwentin kyib' ex mya kyi'j qe ẍne'l in che kwentin.

⁹Kyja'tzun aqeye pastor, kyb'intze qe yol in xi nma'ne kyeye.

¹⁰Aqine Dios in xi nma'ne kyeye kyja': Ma chin oke te aj q'oj kyi'je, ex che xel nqanine qe nẍne'le kyeye; k'elel wi'ne kyaq'une te pastor tu'ntzun mya kukx tu'n tok kykwentin kyib'e; ex che kolpetel qe nẍne'le wu'ne, tu'ntzun mya kukx tu'n kykub' kyb'yo'ne te kychi'ye.

¹¹Aqine Dios in chin q'mante jlu: Ax qine chin xe'le jyolte kye qe nẍne'le ex che okel nkwentine.

¹²Ik tza'n nno'k tkwentin jun pastor qe t-ẍne'l ok tb'aj kysputun kyib', ikxtzun weye che okel nkwentine qe nẍne'le; che ajetz nkolpi'ne kyuj qe lugar jatum ma che pon sputj tuj jun q'ij qlolj ex q'eq muj.

¹³Che eletz wi'ne kyuj qe tnam najchaq ate', che okel nchmo'ne ex che ul wi'ne juntl maj tujx kytx'otx'. Che xel wi'ne tu'n kywa'n kywi' qe witz tuj kytx'otx', ex kyuj qe tq'ab' xaq, ex kyuj kykyaqil lugar jatum najl qe xjal.

¹⁴Che xel wi'ne tu'n kywa'n ti'j tb'anil k'ul kywi' qe nmaq witz tuj kytx'otx'. Atzun jaku che ojlan ex jaku che wa'n ti'j tb'anil k'ul.

¹⁵Ax qine chin okel pastor kyi'j qe nẍne'le, ex ax qine chin xel q'inte kye tu'n kyojlan. Aqine Dios in chin q'mante jlu.

¹⁶Chin okel tene jyol kye qe ẍne'l otoq che'x tzpet, che ajetz wi'ne qeju otoq che elnaj ti'j kyb'e, k'okel npotzine ti'j kyqan otoq toqj, chin onile kyi'j qeju minti' kyipun, atzun qeju ulni kynab'l ex at nim kyipun che najel wu'ne. Tuj tumelxix che okel npastorine qe nẍne'le.

¹⁷Aqine Dios in chin q'mante jlu: Kyb'intze aqeye nẍne'le: Che okel qe ẍne'l kyuk'ix qe chip tuj xjel wu'ne ti'j kyb'inchb'en.

¹⁸Minti' in qe' kyk'u'je ti'j ex in che wa'ne tb'anil k'ul, in b'aj kywab'ane aju k'ul in kyaj ten; in xi kyk'a'ne aju a' saq, atzun txqantl in b'aj kyẍwo'jine tu'n kyqane.

¹⁹Atzun qe nẍne'le ilx ti'j tu'n t-xi kywa'n aju k'ul otoq b'aj kywab'ane ex tu'n t-xi kyk'a'n aju a' otoq b'aj kyẍwo'jine twitz.

²⁰Tu'ntzun jlu aqine Dios in xi nma'ne jlu kyeye: Kxel nb'incha'ne kyi'j qe ẍne'l okni kyi'j ex qe ẍne'l ulni kynab'l.

²¹Aqeye ẍne'l ulni kynab'le, ma che ex kylaq'b'a'ne qeju minti' kyipun, ma che ex kylamo'ne qe ex ma che ok tzoqpaje kyi'j tu'n kyjaw kyẍu'yine, tu'ntzun jlu ma che el oq.

²²Ex chin okel tene kolil kyi'j qe nẍne'le. Mlay waq'tle amb'il tu'n kukx kyyajlanjtz. Teyle junjun ẍne'l k'okel tuj xjel wu'ne ti'j alkye ma tb'incha ti'j juntl tuk'il.

²³Tzul wi'ne jun pastor, ex tjunal te kpastoril kyi'j; atzun nmajene David k'okel nq'o'ne te pastor, ex a k'okel kwentin kye ẍne'l.

²⁴Aqine Kyman chin okele te Kydios, atzunte nmajene David k'okel te nejenel kye. Aqine Dios in chin q'mante jlu.

²⁵Kyjel b'ant ti'j jun nyole kyuk'il tu'n kyten tuj txub'txaj. Che b'el naj qe txkup wu'ne tuj kytanmi tu'ntzun kyanq'in qe nẍne'le tuj txub'txaj tuj kojb'il, ex tu'n mi'n kyxob' ok kytan tjaq' k'ul.

²⁶Che b'el nky'iwla'ne qe, ax ikx qe lugar ti'jele aju witz etzan wu'ne; ktzajel nq'o'ne jb'al te xtalb'il kyib'aj tujxix tq'ijlalil.

²⁷Qe tze' tuj kojb'il ok kyq'a' kywitz, aju tx'otx' ok tq'a' twitz tawal, ex qe ẍne'l che tel tuj txub'txaj tuj kyex kytanmi. Ok kykolpet qe xjal etzan wu'ne tuj kyq'ab' qeju in che yajlan kyi'j, atzun k'elel kynik' ti'j, aqine Dios.

²⁸Mlay tz'el kyi'n qe txqantl nasyon tkyaqilju at kye, ex mlay che kub' kyu'n qe txkup tu'n kyxi kychyo'n. Che tel tuj txub'txaj ex mi a'l jun k'okel sek'punte kye.

²⁹Kxel nq'o'ne kytx'otx' tb'anilxix yolb'il te tu'nju nim twitz awal in tzaj tuj, ex mlay che kyaj ten tuj we'yaj; mlay che xmayin juntl maj qe txqantl nasyon kyi'j.

³⁰Atzun k'elel kynik' ti'j, atine kyuk'il, aqine Kyman ex Kydios, ex k'elel kynik' aj Israel ti'j qa etzan qe wu'ne. Aqine Dios in chin q'mante jlu.

³¹Aqeye nẍne'le, pastorin qeye wu'ne, xjal qe'ye ex aqine Kydiose. Aqine Dios in chin q'mante jlu.