Read kumam Ezequiel 35 Bible Online

Ezequiel 35 - kumam bible

Ezequiel 35

¹Tzaj yolin Qman wuk'ile ex tma kyja':

²Ke'yinxa tumlal ju witz Seir ex q'manxa yol ti'j, aju kxel nma'ne teya.

³Q'manxa kyja': Atzun jlu in tma'n Qman: Ma chin oke aj q'oj ti'ja, aya witz Seir, ex kb'el tcastiwoya wu'ne, kb'el xitja ex k'okela te tzqij tx'otx'.

⁴Che b'ajel nxitune qe tnam ate' tuj tkwenta, atzun teya k'okela te tzqij tx'otx'. K'eleltzun tnik'a ti'j, aqine Dios.

⁵Atxix ojtxi ax ikx ja'lo kukx kyq'ojine kyi'j aj Israel, e ok tzoqpaje q'ojlel kyi'j tej tkub' aju mankb'il kycastiw tu'n tlaj kyil.

⁶Ex aqine Dios in xi nma'ne jun yol axix tok; che xel nq'o'ne tu'n kykyime, at kyile tu'nju ma che kub' xjal kyu'ne, kyja'tzun ax ikx kyeye che b'el b'yo'ne.

⁷Aya tiwitz tx'otx' Seir k'okela wu'ne te tzqij tx'otx' minti' xjal knajal tuj, ex mi jun xjal kb'etel tuj.

⁸Qe nmaq witz ex qe tal witz, kyuk'ix qe chq'ajlaj kyxol witz, kyuk'ix qe tq'ab' xaq ate' tuj tkwenta, che nojel wu'ne tu'n kyximlal kyimni che kymel tuj q'oj.

⁹Te jumajx k'okela wu'ne te tzqij tx'otx', ex mi jun xjal knajal kyuj qe tnam ate' tuj tkwenta. K'eleltzun kynik'e ti'j, aqine Dios.

¹⁰Tu'nju xi tma'na kyja': Qe kab'e nasyon Israel ex Judá tuk'ix kytx'otx' che okel te weye; aqine chin okel te kyajwil maske najl Qman tuj,

¹¹kyja'tzun aqine Dios in xi nma'ne jun yol axix tok: Ik tza'n teya o tzaj tq'oja ex tlo'ch tk'u'ja kyi'j aj Israel ex o che el tik'una, ikxtzun ok nb'incha'ye ti'ja. Ok tkub' tcastiwoya wu'ne, k'elel kynik' aj Israel wi'je.

¹²K'eleltzun tnik'a ti'j, aqine Dios otoq nb'iye tkyaqil tyasb'ila tzaj tma'na kyi'j qe witz te Israel. Tmaya kyja': Ma che najx qe, ma che tzaj q'o'n te nkanb'e.

¹³Nim jaw tniman tib'a nwitze ex o yasuna wi'je. O nb'iye jlu, chi Qman.

¹⁴Atzun jlu in xi nma'ne, aqine Dios: Kykyaqil xjal tuj tkyaqil twitz tx'otx' che jawil tzalaj ok tnaja wu'ne.

¹⁵O jaw tzalaja tej tnaj tx'otx' aju kyk'am aj Israel te kyetzb'il, ax ikxtzun kb'ajel ti'ja: K'okela te tzqij tx'otx', aya witz Seir, tuk'ix tkyaqil tx'otx' kye aj Edom. K'eleltzun kynik' ti'j, aqine Dios.