Read kumam Ezequiel 36 Bible Online

Ezequiel 36 - kumam bible

Ezequiel 36

¹Aya xjal, yolina kye qe witz ate' tuj kytx'otx' aj Israel ex q'manxa kye aju yol kxel nma'ne teya kyja': Aqeye witz ate'ye tuj kytx'otx' aj Israel, kyb'intze,

²atzun jlu in tma'n Qman: O kyma qe aj q'oj kyi'je, aqeye aj Israel: Ma qo ok kyajwil qe ojtxi witz, che chi.

³Kyja'tzun, q'manxa kye aju yol kxel nma'ne teya, ex q'manxa kye kyja': Atzun jlu in tma'n Qman: Tuj tkyaqil part e tzaj qe aj q'oj, e ok tzoqpaj kyi'je ex e naje kyu'n, tu'n kyoke te kyetzb'il qe txqantl nasyon, ex ma che oke te kyxmayb'il xjal ex ma che el ik'une kyu'n.

⁴Kyja'tzun aqeye witz ate'ye tuj kytx'otx' aj Israel, kyb'intze aju yol in tma'n Qman kye qe nmaq witz, kye qe tal witz, kye qe tq'ab' xaq, kye qe chq'ajlaj ate' kyxol witz ex kye qe tnam kye aj Israel o che kub' xitj ex minti' xjal kyuj, aqeju o tz'ex elq'a'n kyuj kyu'n qe tnam kyvesin kyib' kyuk'il ex o che ok te kyxmayb'il.

⁵Atzun jlu in tma'n Qman: Ma chin jaw kyaqpaje ex ma tzaj nimxix nq'oje kyi'j txqantl nasyon, ex kyi'j kykyaqil aj Edom, porke nim e jaw tzalaj tej kyok te tajwil ju tx'otx' etzan wu'ne ex tuk'il nim ik'b'il ma tz'el kyelq'a'n tkyaqilju at tuj kojb'il.

⁶Kyja'tzun q'manxa aju yol in xi nma'ne teya ti'j kytx'otx' aj Israel, ex q'manxa kyja': Atzun jlu in tma'n Qman kye qe nmaq witz, kye qe tal witz, kye qe tq'ab' xaq ex kye qe chq'ajlaj ate' kyxol witz: Ma tzaj ntx'u'jile ex nq'oje tu'n tlaj ju yasb'il ma tzik'x kyu'ne kyu'n qe xjal kyuj txqantl nasyon.

⁷Kyja'tzun aqine Dios in xi nma'ne jun yol axix tok: Qe nasyon kyvesin kyib' kyuk'ile ktzajel kych'ixwi.

⁸Atzun kyeye, aqeye nmaq witz tuj kytx'otx' aj Israel, che ch'iyil qe tze' kywi'ye, aqeju b'a'n tlo'njtz kywitz, ex k'okel nim kywitz tu'n tajb'en te kylo' qe xjal etzan wu'ne aqeju aj Israel. Ex niqayin ta' tq'ijlalil tu'n kyajtz meltz'aj.

⁹Aqine chin okel kwentin te kyeye, che b'ajel ch'okine ex kb'elex awet awal kywi'ye.

¹⁰Wu'ne kchmetel kyb'aj aj Israel kywi'ye. Kchmetel nimxix xjal kyuj tnam, ex che jawil b'incha'n juntl maj qe tnam o che kub' xitj.

¹¹Wu'ne kchmetel nimxix xjal kywi'ye, ax ikx qe alumaj kchmetel nimxix kyb'aj. Che tel nimku xjal ik tza'n tej kyten ojtxi ex che anq'il mas b'a'n ik tza'n ojtxi. K'eleltzun kynik'e ti'j, aqine Dios.

¹²Che tzajel wi'ne qe aj Israel, aqeju etzan wu'ne, tu'n kynajan kywi'ye, che okel te kyajwile, ex mlay che kyaj tentl minti' kyk'wa'l kyu'ne.

¹³Aqine Dios in xi nma'ne jlu: Aqeye witz in q'manjtz kyi'je kyja': B'a'n che chyo'ne xjal, ex in kyaj kyq'o'ne kytanmiye minti' k'wa'l tuj.

¹⁴Atzun ja'lo mlay txi kychyo'ntle qe xjal, ex mlay kyaj kyq'o'ntle kytanmiye minti' k'wa'l tuj. Aqine Dios in chin q'mante jlu.

¹⁵Mlay txi nq'o'ntle amb'il tu'n kyb'inteye juntl maj qe yasb'il kyu'n qe xjal kyuj txqantl nasyon; ex mlay che xmayintl txqantl tnam kyi'je, ex mlay kyaj kyq'o'ntle kytanmiye minti' k'wa'l tuj. Aqine Dios in chin q'mante jlu.

¹⁶Tzaj yolin Qman wuk'ile ex tma kyja':

¹⁷Aya xjal, tej ate'xtoq aj Israel tuj kytx'otx', b'aj kytz'ilsa'n tu'nju kyb'inchb'en mya b'a'n. Puro tz'il ok kyb'inchb'en nwitze, ik tza'n nno'k jun xu'j ok tk'ulul ẍwo'j ti'j.

¹⁸Tzajtzun nimxix nq'oje kyi'j tu'nju kub' kyb'yo'n nimku xjal tuj kytanmi, ex b'aj kytz'ilsa'n tu'nju e k'ulun kywitz qe tilb'ilal.

¹⁹Kub' nq'o'ne kycastiw tu'n tlaj ju kyb'inchb'en mya b'a'n, ex e b'aj nsputune kyxol txqantl tnam ex kyxol txqantl nasyon.

²⁰Kyuj kykyaqil tnam jatum e pon, e yolin xjal mya b'a'n ti'j nb'iye xjan tu'n kylaj, ex kyma xjal kyi'j kyja': Atzun qe xjal lu etzan qe tu'n Dios, ¿tza'ntzun tten ma che etz tlajo'n tuj ttx'otx'?

²¹Tzajtzun ta'w tuj wanmiye tej nlonteye, tu'n kylaj aj Israel e yolin xjal mya b'a'n ti'j nb'iye kyuj qe nasyon jatum e pon q'i'n.

²²Tu'ntzun jlu, q'manxa kye aj Israel: Atzun jlu in tma'n Qman: Aju kb'antel wu'ne mya noq tu'n kylaje, aqeye aj Israel, noq o'kx tu'n tjaw nimsa'n nb'iye xjan, aju ma tz'ok kyq'o'ne te minti' tajb'en kyxol qe nasyon jatum ma che pone.

²³K'okel nq'o'ne nb'iye xjan te ma'xix toklen, aju ma tz'ok kyq'o'ne te minti' tajb'en kyxol qe nasyon. Oktzun tb'ant jlu wu'ne, k'eleltzun kynik' wi'je, aqine Dios. Aqine Dios in chin q'mante jlu.

²⁴Che eletz wi'ne kyuj kykyaqil qe nasyon lu ex kyuj qe tnam; che okel nchmo'ne, ex che ul meltz'aje juntl maj wu'ne tuj kytanmiye.

²⁵K'okel nchitune a' saq kyi'je, ex che tx'jetele wu'ne te tkyaqil mya b'a'n. Che tx'jetele wu'ne tu'nju b'aj kytz'ilsan kyib'e tej kyk'ulune kywitz qe tilb'ilal.

²⁶K'okel kyanmiye ex kynab'le te ak'aj wu'ne. Porke ja'lo ik tten kyanmiye ik tza'n jun ab'j puro kyuw, ex kch'expetel wu'ne tu'n tok te q'uyin ex b'a'n niman.

²⁷Ktel Nxewe tuj kyanmiye, ex chin onile kyeye tu'n kyjapun qe nleye ex qe nxnaq'tzb'ile kyu'ne.

²⁸Che najale tuj ju tx'otx' xi nq'o'ne kye kyxe'chele, che okele te weye, ex atzun weye chin okele te Kydiose.

²⁹Che kletele wu'ne tu'n mi'n kyb'inchantle mya b'a'n aju in che tz'ilixe tu'n. Ktzajel nq'o'ne nim triw ex mlay tzaj nsama'ntle juntl maj we'yaj kyi'je.

³⁰Ax ikx ktzajel nq'o'ne nim kywitz tze' ex nim twitz awal tuj kojb'il, tu'ntzun mi'n tkub' juntl maj kych'ixwiye kywitz qe txqantl nasyon tu'n tlaj we'yaj.

³¹Ok ttzaj kyna'ne aju kymodiye mya b'a'n ex ju kyb'inchb'ene mya b'a'n, ktzajeltzun kych'ixwiye tu'n tlaj kyile ex kyb'inchb'ene mya b'a'n ik'unxix wu'ne.

³²Aqine Dios in chin q'mante jlu: Tz'elx kynik'e ti'j, aqeye aj Israel, mya tu'nju b'a'n qeye kb'antel jlu wu'ne; tzajx kych'ixwiye ex najx kynab'le tu'n tlaj kyb'inchb'ene mya b'a'n.

³³Aqine Dios in chin q'mante jlu: Ok kyb'aj tx'jete wu'ne te tkyaqilju kyile, che najale juntl maj tuj kytanmiye ex kjawil kyb'incha'ne juntl maj qe ja o che kub' xitj.

³⁴Aju tx'otx' otoq kyaj kolin ex otoq tz'ok kyke'yin kykyaqil xjal e ik' b'et ttxlaj, che aq'nal xjal juntl maj ti'j tu'n ttzaj tawal.

³⁵Ex ok kyma xjal kyja': Aju tx'otx' otoq kyaj kolin ma tz'ok ik tza'n tqan awal tuj Edén puro tb'anil; qe tnam otoq che kub' xitj ex otoq che kyaj kolin ex otoq che b'aj naj, ja'lo ma che jaw b'incha'n qe nmaq ja kyuj ex at xjal najl kyuj.

³⁶Atzun qe nasyon kyvesin kyib' kyuk'ile ex otoq che kyaj anq'in, k'elel kynik' ti'j, aqine in jaw nb'incha'ne juntl maj aju otoq kub' xitj, ex in ku'x wawa'ne juntl maj aju otoq naj. Aqine in chin q'mante jlu, ex kb'antel wu'ne.

³⁷Aqine Dios in chin q'mante jlu: Ax ikx kxel nq'o'ne kye aj Israel aju ktzajel kyqanin weye tu'n tb'ant wu'ne. Kchmetel kyb'aj wu'ne ik tza'n kyb'aj txqan ẍne'l.

³⁸Qe tnam kub'ni xitj kchmetel nim xjal kyuj, ik k'okel kyajlal xjal kyuj ik tza'n kyajlal qe ẍne'l in che'x q'i'n tuj tnam Jerusalén tu'n kykub' b'yet te jun chojb'il kyuj ninq'ij ma' kyoklen. Atzun k'elel kynik' ti'j, aqine Dios.