Read kumam Ezequiel 37 Bible Online

Ezequiel 37 - kumam bible

Ezequiel 37

¹O nna'ye tipumal Qman, ex in etz q'i'ne tu'n T-xew; in kub' tq'o'n tuj jun chq'ajlaj jatum attoq nim kyb'aqil kyimni.

²Ex inx ti'n tuj tkyaqil chq'ajlaj lu, nojnitoq tuj tu'n kyb'aqil kyimni, nimxix wen ex jumajx tzqij qe.

³Tmatzun Qman weye: ¿Jakupe che jaw anq'in juntl maj qe b'aq lu? Atzun weye xi ntzaq'we'ne: Nman, o'kx aya b'a'n tu'n.

⁴Tmatzun Qman weye: Txi yolina kye qe b'aq lu te nxele, ex q'manxa kye: Aqeye tzqij b'aq, kyb'intze aju tyol Qman:

⁵Chi Qman kyeye kyja': K'okex nq'o'ne juntl maj kyxewe kyuje tu'ntzun kyjaw anq'ine juntl maj.

⁶K'okel nq'o'ne juntl maj kyb'otx'ile, ex k'okel nq'o'ne kychib'jale; k'okel nq'o'ne kytz'umale ex ktel juntl maj kyxewe wu'ne tu'ntzun kyjaw anq'ine. Atzun k'elel kynik'e ti'j, aqine Dios, chi Qman, chikuya kye.

⁷O chin yoline kye ik tza'nx tzaj tma'n Qman weye. Tej matoq in chin yoline kyuk'il, o nb'iye jun tq'ajq'ajel; in che swok'in qe b'aq wen tej tok kychmon kyib' jun tuk'il juntl.

⁸Ex o wile otoq tz'ok kyb'otx'il ex kychib'jal tuk'ix kytz'umal, ex minti'toq kyxew.

⁹Tmatzun Qman weye kyja': Yolina te nxele teju xewb'aj, ex q'manxa te: Chitzun Qman kyja': Aya xewb'aj, tzaja max kyuj qe kyaje pak' ttxa'n tx'otx', ex xupinxa kyi'j qe kyimni lu tu'n kyjaw anq'in, chi Qman weye.

¹⁰In yoline te t-xel Qman ik tza'nx tzaj tma'n weye, ex okx ju xewb'aj kyuj qe kyimni ex e jaw anq'in. E jaw we' nimxix kyajlal wen.

¹¹Tmatzun Qman weye: Ik kyten aj Israel ik tza'n qe b'aq lu. In kyma'n kyja': Qe qb'aqil ma che tzqij ex minti' jatum b'a'n tu'n tok qe' qk'u'j, ma qo naj, che chi.

¹²Tu'ntzun jlu, yolina kyuk'il te nxele ex q'manxa kye kyja': Atzun jlu in tma'n Qman: Aqeye xjal etzan wu'ne ik kytene ik tza'n qe kyimni otoq che ku'x maqu'n, ex che jaqetel qe kymuqb'ile wu'ne, che eletz wi'ne kyuj, ex che pol wi'ne juntl maj tuj kytx'otx' aj Israel.

¹³Aqeye xjal etzan wu'ne, ok kyjaqet qe kymuqb'ile wu'ne, ex ok kyetz wi'ne kyuj, k'elel kynik'e ti'j, aqine Dios.

¹⁴K'okex nq'o'ne Nxewe kyuje, ex che jawil anq'ine; che pol wi'ne tuj kytx'otx'e. K'eleltzun kynik'e ti'j qa aqine o txi nma'ne jlu, ex wu'ne o b'ant. Aqine in chin q'mante jlu.

¹⁵Tzajtzun yolin Qman wuk'ile ex tma kyja':

¹⁶Q'intza jun piẍ tze' ex tz'ib'an oka qe yol lu ti'j: Aju tnam Judá kyuk'ix qe txqantl aj Israel ate' tuk'il. Q'intza juntl piẍ tze' ex tz'ib'an oka qe yol lu ti'j: Efraín aju tiyjil José, kyuk'ix qe txqantl aj Israel ate' tuk'il.

¹⁷Te tib'ajxi, mojb'an oka tuj tq'ab'a kywi' qe kab'e tze', tu'ntzun kyok te junx.

¹⁸Oktzun kymante qe t-xjalila teya: Chik'b'antza qeye ti t-xilen jlu, qa che chi,

¹⁹q'manxa kye kyja': Atzun jlu in tma'n Qman: Ktzajel ntzyu'ne ju tze' tok tb'i José ti'j ex tok kyb'i txqantl k'loj kyiyjil aj Israel ti'j, aju tzyu'n tu'n Efraín, tu'n tok nmojb'a'ne twi' tuk'il ju tze' tok tb'i Judá ti'j, ex che okel te junx tuj nq'ab'e.

²⁰Ax tzyun kub'a tuj tq'ab'a qeju kab'e tze' otoq tz'ok ttz'ib'ana kywitz, tu'n tok kyke'yin xjal,

²¹ex q'manxa kye kyja': Atzun jlu in tma'n Qman: Che tzajel wi'ne qe aj Israel kyuj qe nasyon jatum ma che pon b'aj, che ajetz nchmo'ne tuj tkyaqil part ex che ul wi'ne juntl maj tuj kytx'otx'.

²²Che okel te junx nasyon wu'ne tuj ju kytx'otx' aju tiwitz tx'otx' kye aj Israel. Junx kyrey ktel. Mlay che oktl juntl maj te kab'e nasyon ex mya partchaq kawb'il kyxol.

²³Mlay che k'ulun juntl maj kywitz qe tilb'ilal tu'n kyb'inchante aju mya b'a'n, ex mlay kyb'incha tkyaqil txkaj il. Che kletel wu'ne te tkyaqil mya b'a'n o kyb'incha tej tel kypa'n kyib' ti'j nleye. Che tx'jetel wu'ne tuj ju kyil. Che okel te weye ex chin okele te Kydios.

²⁴Aju nmajene David k'okel te kyrey ex o'kx te kpastoril kye. Kxel kyb'i'n nyole ex che japunel qe nleye ex qe nxnaq'tzb'ile kyu'n.

²⁵Che najal tuj ju tx'otx' xi nq'o'ne te nmajene Jacob, jatum e ten qe kyxe'chel. Axtzun che najal kyuk'ix qe kyk'wa'l ex kykyaqil qe kyiyjil che ul itz'j te tib'ajxi. Aju nmajene David kukx ktel te nejenel kye.

²⁶Kyjel b'ant ti'j jun nyole kyuk'il tu'n kyanq'in tuj txub'txaj. Aju nyole kyjel b'ant ti'j kyuk'il kukx kyjel ten te jumajx. Kchmetel kyajlal wu'ne ex kukx ktel kyxol aju njaye xjan.

²⁷Chin najale kyuk'il, aqine chin okel te Kydios ex atzun kye che okel te weye.

²⁸Oktzun tten njaye xjan kyxol te jumajx, k'elel kynik' txqantl nasyon ti'j qa aqine in jaw sk'onte kye aj Israel tu'n kyok te jun wetzb'ile xjan.