Read kumam Ezequiel 38 Bible Online

Ezequiel 38 - kumam bible

Ezequiel 38

¹Tzaj yolin Qman wuk'ile ex tma kyja':

²Aya xjal, ke'yinxa tumlal ju tx'otx' Magog ex q'manxa aju yol kxel nma'ne teya ti'j Gog, aju nejenel ma'xix toklen kye tnam Mesec ex Tubal.

³Q'manxa kyja': Atzun jlu in tma'n Qman: Aya Gog nejenel ma'xix toklen kye tnam Mesec ex Tubal, ma chin oke aj q'oj ti'ja.

⁴K'ajel meltz'aja wu'ne, k'okex nq'o'ne ganch tuj ttzi'ya, k'eletz wi'ne kyuk'ix qe t-soldadiya kyjax kyib'aj chej ex q'i'mlex kyub'l; qe soldad lu nimxix kyb'aj wen, q'i'mlex kyspad kyuk'ix kymaqb'il te junxilchaq txkajin.

⁵Qe xjal aj Persia, kyuk'ix qe aj Etiopía ex qe aj Libia, che xe'l kyuk'il kykyaqil qe jlu, q'i'mlex kymaqb'il ex kypasb'il k'uxb'il.

⁶Ax ikx kykyaqil soldad te tnam Gomer ex te tnam Bet-togarma che xe'l kyuk'il, aqeju mas najchaq ate' tuj tx'otx' tuj tb'anq'ab' q'ij, kyuk'ix qe tnam nimxix kyb'aj wen, aqeju mojl kyyol kyuk'il.

⁷B'incham ttena ex b'inchama tten tkyaqilju k'ajb'el tuj q'oj, aya kyuk'ix kykyaqil qe soldad ate' tuk'ila; ex toka te nejenel kye.

⁸Oktzun tel nim ab'q'i ok tk'ma'ya jun tqanil tu'n tq'ojina ti'j jun nasyon o tz'ok q'oj ti'j ojtxi, atzun ja'lo ma we' q'oj ti'j; qe xjal teju tnam lu e b'aj sputj kyxol nimku nasyon ex otoq che naj te jumajx, ex o tz'ok kychmon kyib' juntl maj kywi' qe witz tuj kytx'otx' aj Israel. O che ajtz meltz'aj tuj nimku nasyon ex in che anq'in kykyaqil tuj txub'txaj.

⁹K'okel tzoqpaja q'ojlel ti'j ik tza'n jun kyq'iq' jb'al, ex kb'ajel noj tuj kyu'n kykyaqil t-soldadiya kyuk'ix nimku tnam tuk'ila, ik k'okel twitz tx'otx' kyu'n ik tza'n q'eq muj.

¹⁰Aqine Dios in xi nma'ne jlu: Tuj tq'ijlalil lu tzul tuj t-ximb'etza tu'n tb'aj tnak'una ti'j tu'n tb'inchanteya mya b'a'n.

¹¹Ex kxel tma'na kyja': Chin xe'le q'ojlel ti'j jun nasyon minti' tkolb'il tib', tuj jun tnam jatum najl qe xjal tuj txub'txaj, kykyaqil qe tnam lu minti' muro tok kyi'j, minti' kylamel, ex minti' trank kyi'j.

¹²K'eletz welq'a'ne tkyaqilju at tuj, chin okel tzoqpaje kyi'j qe tnam o che jaw b'incha'n juntl maj, ex kyi'j qe xjal o che ajtz meltz'aj kyxol nimku nasyon ex o tz'ok kychmon kyib' juntl maj, aqeju at kywakẍ ex txqantl kyetzb'il ex najlqe tuj tmij enter twitz tx'otx'.

¹³Qe xjal te tnam Sabá ex te tnam Dedán, kyuk'ix qe comersyant te tnam Tarsis kyuk'ix qe nejenel ate' kyxol, ktzajel kyqanin teya kyja': ¿Mape tzaja elq'al? ¿Mape che tzaj tchmo'na qe t-soldadiya tu'n tex ti'na saq pwaq, q'an pwaq, qe wakẍ ex txqantl kyetzb'il xjal, ex tu'n t-xi ti'na jun matij q'inumab'l?

¹⁴Kyja'tzun, q'manxa te Gog aju yol kxel nma'ne teya, ex q'manxa kyja': Atzun jlu in tma'n Qman: Ok kyanq'in aj Israel tuj txub'txaj, aqeju etzan wu'ne, oktzun tb'iya, kb'el b'e tu'na,

¹⁵ktzajela tuj ttanmiya najchaq tuj tx'otx' tuj tb'anq'ab' q'ij, kyuk'ix nimku xjal te ela' tnam che tzajel tuk'ila, nimxix kyipun ex kyuk'ix qe soldad kyjax kyib'aj chej.

¹⁶K'okel tzoqpaja kyi'j aj Israel aqeju etzan wu'ne. Ex kb'ajel noj twitz kytx'otx' tu'na ik tza'n tu'n jun q'eq muj. Aya Gog, tuj mankb'il tq'ijlalil ktzajel wi'ne tu'n tq'ojina kyi'j xjal tuj tx'otx' etzan wu'ne, tu'n tel kynik' txqantl nasyon wi'je ok t-xi nyek'un wib'e kye, qa xjan qine.

¹⁷Aqine Dios in xi nma'ne jlu: Ti'ja o chin yoline ojtxi tej kyyolin qe nsanjele e ten kyxol aj Israel, o kyma atxix ojtxi qa tu'n ttzaj wi'ne ex tu'n tok tzoqpaja ti'j tnam etzan wu'ne, aqeju aj Israel.

¹⁸Aqine Dios in chin q'mante jlu: Tuj tq'ijlalil ok tok tzoqpaj Gog ti'j tnam Israel, ktzajel nimxix nq'oje ex ntx'u'jile.

¹⁹Tu'nju otoq tzaj nimxix nq'oje kxel ntziyane jun yol axix tok, tuj tq'ijlalil lu ktzajel jun kyaqnajnab' kyuwxix tuj tx'otx' kye aj Israel.

²⁰Che tzajel lu'lun nwitze qe kyiẍ tuj mar, qe jil in che lipan twitz kya'j, qe txkup te tjaq' k'ul ex qe jil in xi kyjaqu'n kyk'u'j twitz tx'otx', ax ikx kykyaqil xjal ate' twitz tx'otx'. Che b'el tilj qe witz, che tzajel tz'aq qe pik, ex kykyaqil qe muro tok kyi'jele tnam che b'el tilj twitz tx'otx'.

²¹Aqine Dios in xi nma'ne jlu: Che tzajel ntxko'ne qe xjal tu'n kyq'ojin ti'j Gog kywi'yile qe witz etzan wu'ne, ex che okel tzoqpaj qe t-soldad q'ojlel tu'n spad kywitzx kyib'.

²²Chin q'ojile kyi'j tu'n tx'u'j yab'il ex che b'el b'yo'n, ktzajel nq'o'ne kyq'iq' jb'al tuk'ix saqb'aqun ex azufre tib'aj ex kyib'aj t-soldad ex kyib'aj nimku xjal uk'in tu'n.

²³Kyja'tzun tten kxel nyek'une kye nimku nasyon aju woklene ma'xix ex qa xjanxix qine. Kxel nyek'un wib'e kye, ex k'eleltzun kynik' ti'j, aqine Dios.