Read kumam Ezequiel 39 Bible Online

Ezequiel 39 - kumam bible

Ezequiel 39

¹Aya xjal, q'manxa ti'j Gog aju yol kxel nma'ne teya, ex q'manxa kyja': Atzun jlu in tma'n Qman: Ma chin oke aj q'oj ti'ja aya Gog, nejenel ma'xix toklen te tnam Mesec ex tnam Tubal.

²Kch'expetel tb'eya wu'ne; cheb'a ktzajel wi'ne najchaq tuj tx'otx' tuj tb'anq'ab' q'ij ex tzul wi'ne tu'n tula tuj tiwitz tx'otx' kye aj Israel.

³Ex kb'el ntoqine xob'l plech q'i'n tu'n tnayaja ex che elel tz'aq wu'ne qe plech q'i'n tu'n tb'anq'ab'a.

⁴Atzun teya kyuk'ix qe t-soldadiya ex kyuk'ix nimku xjal te ela' tnam uk'in tu'na, che kymele kywi' qe witz tuj kytx'otx' aj Israel. Atzun che xel nq'o'ne te kychi' kykyaqil txkaj k'utz ex te kychi' qe txkup te tjaq' k'ul.

⁵Kyjel pale' kyximlale tuj kojb'il. Aqine Dios in chin q'mante jlu.

⁶Kxel nsama'ne q'aq' tib'aj tnam Magog ex kyib'aj qe xjal najl kyuj qe tnam ate' ttzi'yile mar ex txub'txaj ate'. K'eleltzun kynik' ti'j, aqine Dios.

⁷Wu'ne k'elel kynik' aj Israel ti'j nb'iye xjan, aqeju etzan wu'ne, ex mlay txi nq'o'ne amb'il tu'n tyolinjtz mya b'a'n ti'j nb'iye xjan. K'eleltzun kynik' txqantl nasyon ti'j, aqine Kydios aj Israel xjanxix qine.

⁸Aju tq'ijlalil ma chin yoline ti'j, kjapunel ex mlay tzik'x ti'j. Aqine Dios in chin q'mante jlu.

⁹Che eletz aj Israel tuj kytanmi ex kb'el kypatun kyub'l qe aj q'oj, ikx qe kymaqb'il te junxilchaq txkajin, qe xob'l kyplech, qe kyplech, qe mans in che ajb'en tuj q'oj ex qe kylans; tkyaqil jlu k'ajb'el te kysi' tuj enter wuq ab'q'i.

¹⁰Mi'n che'x jyol si' tuj kojb'il, mi tu'n kyxi' tx'emil si' tuj chk'ul, ex kykyaqil qe ub'l lu k'ajb'el te kysi'. Kyja'tzun k'elel kyi'n tkyaqilju at kye qeju otoq che elq'an kyi'j nej. Aqine Dios in chin q'mante jlu.

¹¹Tuj tq'ijlalil tzul kxel nq'o'ne jun piẍ tx'otx' jatum tu'n tku'x maqu'n Gog, ax tuj kytx'otx' aj Israel, aju tok tb'i Chq'ajlaj kye Betin Xjal, aju tkub'sa'n twitz mar tuj tumlal tjawitz q'ij. Tu'n jlu kmaqetel kyb'e qe b'etin xjal, ex atzun kb'elex maqu'n Gog kyuk'ix kykyaqil qe t-soldad, ex k'okel q'o'n tb'i lugar lu Chq'ajlaj kye nimku t-soldad Gog.

¹²Wuq xjaw che muqal aj Israel ti'j kyximlal tu'ntzun tkyaj saqix twitz tx'otx'.

¹³Kykyaqil xjal che muqal ti'j kyximlal ex k'ajb'el jlu te jun nimb'il kye. Tuj q'ij lu kjawil nimsa'n nb'iye. Aqine Dios in chin q'mante jlu.

¹⁴Tb'ajlenxitzun wuq xjaw, che jawil sk'o'n jun k'loj xinaq tu'n kyxi' jyol kyximlal qe kyimni otoq che kyaj ten tuj tkyaqil kytx'otx' aj Israel, ex kb'elex kymaqu'n tu'ntzun tkyaj saqix twitz tx'otx'.

¹⁵Ok kyxi b'et qe xjal lu tuj kytx'otx' aj Israel, qa at jun ma tz'ok noj ti'j jun tb'aqil kyimni, kb'el tq'o'n jun techal ttxlaj, tu'ntzun tku'x maqu'n kyu'n qe muqal tuj Chq'ajlaj kye nimku t-soldad Gog.

¹⁶Ax ikx at jun tnam niqayin ta', Hamona[3] tb'i. Kyja'tzun kyjel saqix twitz tx'otx' kyu'n.

¹⁷Tzaj tma'n Qman weye kyja': Q'manxa kye kykyaqil qe jil in che lipan twitz kya'j ex kye kykyaqil qe txkup te tjaq' k'ul: Kytzaje tuj tkyaqil part, kychmon ok kyib'e kywi' qe witz tuj kytx'otx' aj Israel, ti'j jun nintz wa'n kb'antel wu'ne te kyeye tuj lugar lu. Atzun che chyo'le chib'j ex che k'ale chik';

¹⁸kxel kychyo'ne kychib'jal qe xjal kyuw kyk'u'j tuj q'oj, ex kxel kyk'a'ne kychk'el qeju in che kawin twitz tx'otx', che chyo'le ti'j mer ik tza'n in che chyo'ne ti'j kychib'jal ẍne'l, ti'j kychib'jal tal tman ẍne'l, ti'j kychib'jal chip ex qa ti'j kychib'jal tal tor, kykyaqil qe jlu ulni kynab'l ex ate' tuj tx'otx' Basán.

¹⁹Ti'jtzun ju nintz wa'n lu, aju kb'antel wu'ne te kyeye, che chyo'le ti'j t-sebyil okxi tnoj kyk'u'je wen ex che k'ale chik' okxi tchyo'n kywi'ye tu'n.

²⁰Kb'antel tten jun nintz wa'n wu'ne te kyeye tuk'il kychi'ye kychib'jal chej ex kychib'jal qe xjal kyjax kyib'aj, kychib'jal qe xjal kyuw kyk'u'j tuj q'oj ex kychib'jal kykyaqil soldad, tu'ntzun kychyo'ne ti'j okxi tnoj kyk'u'je, chikuya kye. Aqine Dios in chin q'mante jlu.

²¹Kyja'tzun tten kxel nyek'une wajwalile kye txqantl nasyon. Ok kyila' kykyaqil nasyon ok tkub' kysentens ex ok tkub' kycastiw wu'ne.

²²Tujtzun ju q'ij lu kxel qe' tu'n tel kynik' aj Israel wi'je, qa aqine Kyman aju Kydios.

²³Ex k'elel kynik' txqantl nasyon ti'j, o che'x aj q'i'n aj Israel pres tuj juntl lugar najchaq tu'n tlaj il o kyb'incha tu'nju el kypa'n kyib' wi'je; ex atzun weye aj nq'o'ne ttzal wi'je kywitz ex e je'x nq'o'ne tuj kyq'ab' aj q'oj kyi'j tu'n kykub' b'yo'n kykyaqil tu'n spad.

²⁴Kub' nq'o'ne kykastiw ik tza'nx kyb'inchb'en mya b'a'n ex tu'n tlaj e ik' tib'aj nleye, ex aj nq'o'ne ttzal wi'je kywitz.

²⁵Kyja'tzun aqine Dios kxel nma'ne jlu: Ja'lo ktzajel q'aq'an nk'u'je kyi'j kykyaqil aj Israel, aqeju tiyjil Jacob. Che ajetz meltz'aj wu'ne jatum o che pon q'i'n, ex k'okel nq'o'ne tilil tu'n tjaw nimsa'n nb'iye xjan.

²⁶Ok kynajan tuj txub'txaj tuj kytx'otx' ex mi jun k'okel sek'punte kye, k'ik'el tna'l kyu'n aju kych'ixwi tzaj tej tel kypa'n kyib' wi'je.

²⁷Ok kyajtz wi'ne kyxol txqantl nasyon ex ok kyajtz nchmo'ne kyuj kytanmi qe aj q'oj kyi'j, kxel nyek'un wib'e xjanxix qine, ex ok kyila' nimku nasyon.

²⁸Wu'ne e je'x nsama'ne tu'n kyxi q'i'n pres kyuj txqantl nasyon, ex che okel nchmo'ne juntl maj tuj kytx'otx'. Mi jun aj Israel kyjel nq'o'ne kyuj txqantl nasyon. K'eleltzun kynik' ti'j, aqine Kyman aju Kydios.

²⁹Mlay tz'aj nq'o'ntle tzal wi'je kywitz aj Israel, porke ktzajel nq'o'ne Nxewe kye. Aqine Dios ma chin q'mante jlu.