Read kumam Ezequiel 40 Bible Online

Ezequiel 40 - kumam bible

Ezequiel 40

¹Tuj tlajin q'ij te tnejel xjaw te ab'q'i, o nna'ye tipumal Qman wib'aje, ex inx q'i'ne tu'n tuj kytx'otx' aj Israel. Ch'ixtoq tel 25 ab'q'i tej qxilen q'i'ne pres tuj Babilonia, ex otoq b'ant kyajlaj ab'q'i tej tkub'len ti'j tnam Jerusalén.

²Mer ik tza'n tuj witzik' inx q'i'ne tu'n Qman tuj kytx'otx' aj Israel, ex in kub' q'o'ne tu'n twi' jun witz ma'xix twa'l; twi'tzun ju witz lu wile txqan ja mer ik tza'n jun nintz tnam tuj tumlal tnayaj q'ij.

³Inx q'i'ne tu'n Qman ma chixin, ex o wile jun xinaq in qoptz'aj ti'j ik tza'n ti'j q'an k'uxb'il, wa'ltoq ttzi tlamel tnam, q'i'ntoq jun ky'jaj tu'n b'animaj ti'j lino, tuk'ix jun ajlaj in ajb'en te echb'il.

⁴Ex tzaj tma'n ju xinaq lu weye kyja': Aya xjal, ke'yintza ex b'intza; q'o'nka kwent ti'j ju kxel nyek'une teya, ex atzun til ma tzul q'i'na tzalu tu'n t-xi nyek'une teya. Ex kxel tma'na kye aj Israel tkyaqilju ok tila'ya.

⁵Ti'jtze tja Dios attoq jun muro tok ti'jele. Aju ajlaj q'i'ntoq tu'nju xinaq attoq ox metro tqan. Xitzun techan ju muro, ex attoq ox metro twitz ex ox metro twa'l.

⁶Te tib'ajxi, xi' ttzi ja aju xi'yni twitz tuj tjawitz q'ij, jax kywi' qe grad ex xi techan aju ttzi tmarkil tlamel, ex attoq ox metro twitz.

⁷Aqeju tal cuart ate'k ttxlaj junjun pak' ttzi ja, teyle junjun attoq ox metro tnuqb'il ex ox metro twitz, ex aju t-xol jun tal cuart tuk'il juntl tal cuart attoq kab'e metro tuk' mey. Ex attoq ox metro twitz aju ttzi ja te tujxi jatum tu'n qokx tuj juntl tal cuart, aju xi'yni twitz tumlal tja Dios.

⁸Xi techan xinaq ju cuart tokx tujxi tumlal twitz tja Dios, ex aju cuart attoq kyaje metro twitz. Attoq kab'e tmarkil ja te jun metro tpimil junjun.

⁹

¹⁰Kykub'sa'ntoq ox tal cuart tuj junjun pak' ttzi ja aju tkub' tumlal tjawitz q'ij, ex kykyaqil junx ta' echb'in kye, ax ikx junx ta' echb'in kye qe tqan ja kykub'sa'n ttxlaj junjun pak'.

¹¹Ex xi techan xinaq ttzi ja, ex attoq jwe' metro twitz, atzunju tnuqb'il attoq qaq metro tuk'il mey.

¹²Twitz junjun tal cuart attoq jun tal muro tkub' te mey metro twa'l. Teyle junjun tal ja attoq ox metro twitz ex ox metro tnuqb'il.

¹³Ex xi techan tkyaqilju twitz ja, xi'x qe' tu'n twi muro te jun tal cuart ex pon b'aj tu'n twi muro te juntl tal cuart tuj juntl pak', ex attoq kab'laj metro tuk' mey.

¹⁴Xi techan twitz ju tal cuart tokx tujxi; tu'n tkyaqil attoq laj metro twitz. Aju tal cuart lu tkub' twitz ttxa'n tpe'n tja Dios.

¹⁵Aju tnuqb'il tkyaqil, xi'ynix qe' ti'jxi sawán ex tu'n tokpun b'aj max ttzi ju tal cuart te tujxi, attoq 25 metro.

¹⁶Attoq kyventaniyil qe tal cuart. Ax ikx qe pared tkub' kyxol tal cuart, ax ikx ju cuart tokx max tujxi attoq tventaniyil. Attoq tventaniyil tkyaqil tujile. Ex kyi'j qe pared toktoq tilb'ilal tqan xa'j.

¹⁷Te tib'ajxi inx q'ine tu'n xinaq tuj tnejel ttxa'n pe'n tok ti'j ox pak' tja Dios. Ex tuj ttxa'n pe'n lu lo'tzintoq ab'j twitz tx'otx' ttxa'nile, ex attoq 30 tal cuart tkub' ttxa'nile.

¹⁸Aju ttxa'n pe'n lu, aju lo'tzintoq ab'j twitz tx'otx' ttxa'nile, mas kub'ni ta', ex lo'tzintoq ab'j twitz tx'otx' ttxa'nile ttxa'n pe'n kywitz qe tal cuart, ex junxtoq ta' echb'in twitz tuk'il kynuqb'il qe sawán.

¹⁹Xi techan xinaq twitz tnejel ttxa'n pe'n, xi'x qe' tu'n twitz ju tal ja te tujxi ex pon b'aj ttzi ja jatum tu'n qokx tuj tkab'in ttxa'n pe'n, ex attoq 25 metro t-xol.

²⁰Ax ikx attoq jun ttzi ja kyja' xi'yni twitz tuj tumlal tb'anq'ab' q'ij, tkub' twitz tnejel ttxa'n pe'n. Xi techan xinaq tnuqb'il ex tuj t-ẍkyin.

²¹Ax ikx attoq ox tal cuart tkub' ttxlaj junjun pak' ttzi ja lu, ex at qe pared kykub' kyxol tal cuart, ex juntl cuart tokx tujxi, ikpunx qe ik tza'n qeju ate'k ttzi ja tkub' tuj tjawitz q'ij, attoq 25 metro tnuqb'il ex kab'laj tuk' mey tuj t-ẍkyin.

²²Aju tal cuart tokx tujxi, ex qe tventaniyil ex qe tilb'ilal tqan xa'j, ikpunx qe ik tza'nx qeju ate'k ttzi ja tkub' tuj tjawitz q'ij. Ax ikx attoq wuq grad tu'n qjax b'et tib'aj, ex aju tal cuart mas ma' max tujxi ta'.

²³Tza'nx ju ttzi ja tkub' tuj tjawitz q'ij, ax ikx aju ttzi ja tkub' tuj tumlal tb'anq'ab' q'ij twitz ju tnejel ttxa'n pe'n, attoq juntl ttzi ja in xi' tu'n tokpun tuj ju tkab'in ttxa'n pe'n. Xi techan xinaq kyxol, xi qe' ti'j jun ttzi ja tu'n tpon ti'j juntl ttzi ja ex attoq 50 metro t-xol.

²⁴Inx q'i'ne tu'n xinaq jatum ta' ttzi ja tkub' tuj tumlal tnayaj q'ij, ex xi techan qe pared tkub' kyxol qe tal cuart tuk'ix tal cuart mas ma' tokx max tujxi, ex aju echb'in kye junx ta' ik tza'n qe txqantl.

²⁵Aju ja jatum nno'kx b'e tu'n tokpun tujxi tnejel ttxa'n pe'n tuk'ix ju tal cuart mas ma' tokx max tujxi, attoq tventaniyil tkyaqil ti'jele, ik tza'nx qe txqantl. Aju echb'in te tkyaqil, attoq 25 metro tnuqb'il ex kab'laj metro tuk' mey tuj t-ẍkyin.

²⁶Ax ikx attoq wuq grad tu'n qjax b'et tu'n qokx tuj ja, ex aju tal cuart mas ma' tokx max tujxi. Ax ikx qe pared tkub' kyxol qe tal cuart toktoq tilb'ilal tqan xa'j kyi'j, junjun tuj junjun pak' ttxlaj.

²⁷Aju tkab'in ttxa'n pe'n tokx tujxi ax ikx attoq jun tlamel kyja' xi'yni twitz tuj tumlal tnayaj q'ij. Xi techan xinaq nik'pun kyxol kab'e tlamel, aqeju kykub' tuj tumlal tnayaj q'ij, ex attoq 50 metro kyxol.

²⁸Inx q'i'ne tu'n xinaq jatum ta' ttzi ja tuj tumlal tnayaj q'ij tu'n wokxe tuj tkab'in ttxa'n pe'n. Xi techan ju ttzi ja lu, ex ax echb'in te ik tza'nx echb'in kye qe txqantl ttzi ja.

²⁹Qe tal cuart ex qe pared tkub' kyxol qe tal cuart, tuk'ix tal cuart mas ma', junx ta' echb'in kye ik tza'n qe txqantl. Aju ja jatum nno'kx b'e tuj tu'n tokpun tujxi, ex aju tal cuart mas ma', attoq tventaniyil tkyaqil ti'jele, ex aju echb'in te tu'n tkyaqil, attoq 25 metro tnuqb'il ex kab'laj metro tuk' mey tuj t-ẍkyin.

³⁰Qe twitz ja, kab'laj var tuk' mey kynuqb'il ex kab' var tuk' mey kywitz.

³¹Aju tal cuart mas ma' tkub' jatum nno'kx b'e tu'n tokpun tuj tkab'in ttxa'n pe'n. Ex toktoq tilb'ilal tqan xa'j kyi'j qe pared tkub' kyxol qe tal cuart. Ex attoq wajxaq grad tu'n qjax b'et tu'n qjapun ttzi tlamel.

³²Te tib'ajxi inx q'i'ne tu'n xinaq tuj tkab'in ttxa'n pe'n jatum ta' ttzi ja tuj tumlal tjawitz q'ij, ex xi techan ttzi ja jatum tu'n qokx tuj tkab'in ttxa'n pe'n, ex aju echb'in te junx ta' ik tza'n qe txqantl.

³³Aqeju tal cuart ex qe pared kykub' kyxol qe tal cuart ex juntl tal cuart mas ma', junx ta' echb'in kye ik tza'n qe txqantl. Aju ja jatum nno'kx b'e tu'n tokpun tujxi tkab'in ttxa'n pe'n tuk'ix tal cuart mas ma', attoq tventaniyil tkyaqil ti'jele, ex aju echb'in te tu'n tkyaqil, 25 metro tnuqb'il ex kab'laj metro tuk' mey tuj t-ẍkyin.

³⁴Aju tal cuart mas ma' tkub' jatum nno'kx b'e tu'n tokpun tuj tkab'in ttxa'n pe'n. Ex qe pared kykub' kyxol qe tal cuart toktoq qe tilb'ilal tqan xa'j ti'j junjun pak'. Ex attoq wajxaq grad tu'n qjax b'et tu'n qjapun ttzi tlamel.

³⁵Ex inx q'i'ne tu'n xinaq jatum tkub'sa'n ttzi ja tuj tumlal tb'anq'ab' q'ij, xi techan ju ttzi ja jatum tu'n qokx tuj tkab'in ttxa'n pe'n, ex aju echb'in te junx ta' ik tza'nx qe txqantl;

³⁶ax ikx attoq qe tal cuart, kyuk'ix qe pared kykub' kyxol qe tal cuart, ex juntl tal cuart mas ma', ex attoq kyventaniyil tkyaqil ti'jele. Aju ja jatum nno'kx b'e tu'n tokpun tuj tkab'in ttxa'n pe'n, attoq 25 metro tnuqb'il ex kab'laj metro tuk' mey tuj t-ẍkyin.

³⁷Aju tal cuart mas ma' tkub' tnejel jatum nno'kx b'e tu'n tokpun tuj tkab'in ttxa'n pe'n. Ex qe pared kykub' kyxol qe tal cuart toktoq tilb'ilal tqan xa'j ti'j junjun pak'. Attoq wajxaq grad tu'n qjax b'et tu'n qjapun ttzi tlamel.

³⁸Ax ikx attoq jun cuart tkub'sa'ntoq twitz tal cuart mas ma' jatum nno'kx b'e tu'n tokpun tuj tkab'in ttxa'n pe'n. Tujtzun cuart lu in b'aj tx'jet kyi'j qe alumaj tu'n kyxi q'ot te oyaj patun in kub'.

³⁹Tuj ju cuart mas ma' attoq kyaje mes, kab'e junjun pak ttzi ja, kyib'ajtzun qe mes lu in che kub' b'yo'n qe alumaj tu'n kyxi q'ot te oyaj patun in kub', ex qa tu'n kyxi q'ot te chojb'il tu'n tlaj kyil xjal ex tu'n tlaj kypaltil.

⁴⁰Ax ikx at kyaje mes kykub' twitz tal cuart mas ma', kab'e junjun pak' ttzi ja tkub' tuj tumlal tb'anq'ab' q'ij.

⁴¹Kyja'tzun kyaje mes at tujxi ex kyaje mes at ti'jxi ttzi ja: wajxaq mes tu'n tkyaqil. Kyib'ajtzun qe mes lu in che kub' b'yo'ntoq qe alumaj.

⁴²Qe kyaje mes in che ajb'entoq tu'n kykub' patun qe alumaj kyib'aj, b'animaj qe ti'j ab'j xpe'limaj; ex aju echb'in kye 75 centímetro kynuqb'il ex 75 centímetro kywitz, ex 50 centímetro kywa'l, ex kyib'ajtzun qe jlu in che kub' q'o'n qe makb'il in che ajb'en tu'n kykub' b'yet qe alumaj te oyaj patun in kub'.

⁴³Tx'apo'n qe xok twitzile cuart te tujxi te qaq centímetro kyqan. Kyib'ajtzun qe mes lu in kub' q'o'n kychib'jal qe alumaj in che ajb'en te oyaj.

⁴⁴Tuj ju tkab'in ttxa'n pe'n attoq kab'e tal cuart, jun, junx tkub' tuk'il ju ttzi ja at tujxi aju tkub' jawni, atzun juntl, junx tkub' tuk'il ju ttzi ja at tujxi aju tkub' kub'ni, ex atzunju cuart kyja' xi'yni twitz jawni.

⁴⁵Tzaj tma'n xinaq weye: Aju cuart kyja' xi'yni twitz tuj tumlal tnayaj q'ij, atzun cuart kye qe pal in che ajb'en tuj tja Dios,

⁴⁶ex atzun ju cuart kyja' xi'yni twitz tuj tumlal tb'anq'ab' q'ij, atzun cuart kye qe pal in che ajb'en tu'n kykwentin ti'j altar. Aqe jlu tiyjil Sadoc, ex o'kxku aqe aj Leví jaku che pon laq'e' twitz Qman tu'n kyajb'en te.

⁴⁷Te tib'ajxi xi techan xinaq tkab'in ttxa'n pe'n, a jlu cuadrad ttentoq ex attoq 50 metro junjun pak' ttxlaj. Aju altar tkub'toq twitz tja Dios.

⁴⁸Inx q'i'ne tu'n xinaq tuj tal cuart tkub' ttzi tja Dios, ex xi techan kypimil qe pared junjun pak' ttzi' ja, teyle junjun attoq kab'e metro tuk'il mey kypimil. Attoq wuq metro twitz tlamel, ex qe pared jatum tok tmarkil tlamel attoq jun metro tuk'il mey tpimil junjun.

⁴⁹Aju tal cuart tkub' twitz tja Dios attoq laj metro tnuqb'il ex qaq metro twitz, ex attoq laj grad tu'n tjax qb'etin tu'n qjapun ttzi' tal cuart lu. Ex attoq kab'e tqan ja tkub' twitz tja Dios; jun tkub' tuj jun pak', ex juntl tkub' tuj juntl pak'.