Read kumam Ezequiel 43 Bible Online

Ezequiel 43 - kumam bible

Ezequiel 43

¹Inx q'i'ne tu'n xinaq ttzi tlamel tuj tjawitz q'ij,

²ex o wile tajwalil Kydios aj Israel kyja' ttzaj tuj tjawitz q'ij. Aju tq'ajq'ajel twi' ik tb'inx ik tza'n tq'ajq'ajel twi' jun nima in jululun wen, ex b'i'x b'aj noj twitz tx'otx' tu'n t-spik'umal.

³Aju tzaj yek'un weye ik tza'n tuj witzik' ax ik tza'n ju tzaj yek'un weye tej tul Qman xitul te tnam Jerusalén, ex ik tza'n ju tzaj yek'un weye ttxlaj ju nima Quebar. In kub' ẍmeje'ye ex pon takl tib'aj nwitze twitz tx'otx',

⁴ex aju tajwalil Qman okx ttzi ja tkub' tuj tjawitz q'ij ex okx max tujxi tja Dios.

⁵In jaw q'i'ne tu'n T-xew Dios ex inx q'i'ne tu'n tuj tkab'in ttxa'n pe'n, ex o wile tajwalil Qman otoq b'aj noj tuj tja tu'n.

⁶Kub' ten xinaq ntxlaje, ex o nb'iye tzaj yolin Qman weye max tujxi tja

⁷ex tzaj tma'n weye kyja': Atzunju lugar lu jatum tkub' nq'uqb'ile, ex ju lugar jatum in che kub' ten qe nqane; atzun chin najale tzalu kyxol aj Israel te jumajx. Qe aj Israel ex qe kyrey mlay tz'ok kyq'o'n juntl maj nb'iye xjan te minti' tajb'en, mi'n che k'ulun kywitz tilb'ilal ex mlay jaw kyb'incha'ntl kypantyón qtzan kyrey twitz tja Dios.

⁸Jaw kyb'incha'n tja kyrey, kyaj ten tlamel junx tuk'il tlamel njaye, noq o'kx jun pared kyaj ten t-xol. Tu'n jlu ok kyq'o'n nb'iye xjan te minti' tajb'en tu'n kyb'inchb'en ik'un wu'ne; kyja'tzun tzaj nq'oje kyi'j ex e kyim wu'ne.

⁹Atzun ja'lo kyjel kykolin tu'n kyk'ulun kywitz qe tilb'ilal ex k'elex kylaq'b'a'n kyximlal kyrey otoq che kyim, ex te jumajx chin najale kyxol.

¹⁰Atzun teya xinaq, q'manxa kye aj Israel ti'j ju ma tila ti'j tja Dios, ex b'a'n tu'n tok kyq'o'n kwent ti'j echb'in te, tu'ntzun ttzaj kych'ixwi ti'j ju il o kyb'incha.

¹¹Qa ma tzaj kych'ixwi ti'j tkyaqilju o kyb'incha, q'manxa kye tza'n tten tja Dios ex alkye at tuj, kyi'j qe ttzi ja jatum in che etz xjal ex jatum in che okx, ex ti'j tkyaqil echb'in te, ax ikx q'manxa kye kyi'j qe ley il ti'j tu'n tjapun kyu'n. Tz'ib'ankuya tilb'ilal tkyaqil jlu, tu'ntzun telxix kynik' ti'j tza'n ke'yin tja Dios ex tu'n tb'ant kyu'n. Ax ikx tz'ibancuya kykyaqil ley tu'ntzun tjapun kyu'n.

¹²Atzun ley lu ti'j tja Dios: tkyaqil tx'otx' at ti'jele tja Dios twi witz k'okel te jun lugar xjanxix.

¹³Atzun qe echb'il ti'j altar jlu. Ti'jele altar attoq jun tb'e a' te mey metro t-xe' ex mey metro twitz, ex ttzi'yile tb'e a' tjawsa'n jun tal muro te 25 centímetro twa'l. Aju tq'uqb'il altar atzun tten kyja':

¹⁴tzajnix qe' twitz tx'otx' ex tu'n tjapun ti'j tnejel kol, attoq jun metro twa'l. Aju tnejel kol oknix ti'n tib' mey metro. Aju tkab'in kol attoq kab'e metro twa'l, ax ikx oknix ti'n tib' mey metro.

¹⁵Aju toxin kol atzun jatum in che kub' patit chojb'il, ex attoq kab'e metro twa'l. Ex twi' toxin kol attoq kyaje tkach.

¹⁶Aju toxin kol altar junxtoq ta' echb'in te twitz tuk'il tnuqb'il, qaq metro junjun pak' ttxlaj.

¹⁷Ax ikx tkab'in kol junxtoq ta' echb'inte twitz tuk'il tnuqb'il, wuq metro junjun pak' ttxlaj. Aju tb'e a' toktoq ti'jele, attoq mey metro twitz, ex ttzi'yile tb'e a' tjawsa'n jun tal muro te 25 centímetro twitz. Qe grad tu'n qjapun tib'aj altar a kykub' qe tuj tumlal tjawitz q'ij.

¹⁸Ex tzaj tma'n Qman weye kyja': Ok tpon tq'ijlalil tu'n tjaw b'inchet altar, il ti'j tu'n kyjapun qe ley lu: Kb'el kypatun jun alumaj te chojb'il tib'aj altar, ex k'okel kychitun chik' ti'jele altar.

¹⁹Aqe pal aj Leví, aqeju tiyjil Sadoc, atzun qe b'a'n tu'n kyul laq'e' nwitze tu'n kyajb'en weye; kxel tq'o'na jun tal tor kye tu'ntzun t-xi kyq'o'n te chojb'il il. Aqine Dios ma chin q'mante jlu.

²⁰Ex kxel ti'na ch'in tchk'el tal tor ex k'okel tchituna ti'j kykyajil tkach altar, ex ti'j kykyajil tb'utx' tkab'in txol ex ti'j tal muro tjawsa'n ttzi'yile tb'e a', kyja'tzun tten kb'ajel saqix altar tu'na ex k'elel ju il ti'j.

²¹Ex aju tal tor otoq txi q'ot te chojb'il il, ktzajel ti'na ex kb'el tpatuna ti'jxi tpe'n tja Dios, tuj ju lugar axix til tu'n kykub' patit.

²²Tuj tkab'in q'ij kxel tq'o'na jun tal tman chip minti' tpaltil te chojb'il il, ex kb'ajel kysaqsa'n pal altar ik tza'nx otoq b'aj kysaqsa'n tu'n tchk'el tal tor.

²³Oktzun tb'aj t-saqsa'na altar, ktzajel ti'na jun tal tor ex jun tman ẍne'l, kykab'il minti' ch'in kypaltil,

²⁴ex che tzajel ti'na nwitze. Atzun kye pal kb'el kychitun atz'an kyib'aj ex che b'el kypatun te oyaj te nimb'il weye.

²⁵Teyle junjun q'ij tuj enter wuq q'ij kb'el tb'yo'na jun tal tman chip te chojb'il il, tuk'ix jun tal tor ex jun tman ẍne'l, kykyaqil jlu minti' ch'in kypaltil.

²⁶Teyle junjun q'ij tuj enter wuq q'ij il ti'j tu'n tb'aj kysaqsa'n pal tkyaqil altar, tu'ntzun tajb'en te weye.

²⁷Atzun jlu kb'antel kyu'n pal tuj enter wuq q'ij. Tujtzun twajxaqin q'ij atzun kqeb'il tu'n t-xi kyq'o'n oyaj patun in kub' tib'aj altar, ex tu'n t-xi kyq'o'n chojb'il te mojb'ab'l tib'il. Oktzun che k'metele wu'ne tuk'il tzalajb'il. Aqine Dios ma chin q'mante jlu.