Read kumam Ezequiel 45 Bible Online

Ezequiel 45 - kumam bible

Ezequiel 45

¹Ok tkub' kypa'ne tx'otx' tu'n t-xi kyq'o'ne te junjun k'loj kyiyjile, il ti'j tu'n tel kypa'ne jun piẍ tx'otx' te kab'laj kilómetro tuk' mey tnuqb'il ex laj kilómetro twitz, aju tx'otx' lu k'elel kypa'ne tu'n tajb'en te Qman. Tkyaqil tx'otx' lu k'okel te xjan.

²Tujtzun tx'otx' k'elel kypa'ne jun piẍ tu'n tjaw b'inchet tja Dios tuj, aju tx'otx' k'elel kypa'ne te 250 metro junjun pak', ex ti'jele kyjel kyq'o'ne jun piẍ tx'otx' te 25 metro twitz ex minti' at tuj.

³Tuj ju tx'otx' pa'nmaj te Qman kb'el echit jun piẍ tx'otx' te kab'laj kilómetro tuk' mey tnuqb'il ex jwe' kilómetro twitz, ex atzun tx'otx' lu k'okel mas xjanxix: Atzun Kjawil b'inchet tja Dios tuj.

⁴Aju tx'otx' lu k'ajb'el kye pal, aqeju in che ajb'en tuj tja Qman ex in che ul laq'e' twitz tu'n kyajb'en te. Atzun lugar lu jatum tu'n tjaw kyb'incha'n kyja. K'okel te jun lugar xjan jatum tu'n tkub' ten tja Qman.

⁵Ax ikx at juntl tx'otx' te kab'laj kilómetro tuk' mey tnuqb'il ex jwe' kilómetro twitz, pa'nmaj te kyetzb'il aj Leví aqeju in che ajb'en tuj tja Dios, tu'ntzun ten kytanmi jatum tu'n kynajan.

⁶Ax ikx k'elel pa't jun piẍ tx'otx' te kab'laj kilómetro tuk' mey tnuqb'il ex kab'e kilómetro tuk' mey twitz jatum kjawil b'inchet tnam, aju tx'otx' lu tkub' tjaq' tx'otx' xjan jatum kjawil b'inchet tja Dios. Aju tx'otx' lu k'okel te kyetzb'il kykyaqil aj Israel.

⁷Ax ikx k'elel pa't kab'e piẍ tx'otx' tu'n tajb'en te kawil. Jun piẍ kxel qe' ti'j ju tx'otx' xjan tu'n tpon b'aj ti'j tmojonil tx'otx' tuj tjawitz q'ij, ex juntl piẍ kxel qe' ti'j ju tx'otx' xjan tu'n tpon b'aj ti'j tmojonil tx'otx' tuj telex q'ij. Aju tkub' tumlal tjawitz q'ij tuk'ix ju tkub' tumlal telex q'ij junx echb'inte kynuqb'il ik tza'n qe tx'otx' otoq txi q'o'n kye junjun k'loj kyiyjil aj Israel.

⁸Aju tx'otx' lu k'okel te tetzb'il kawil kyxol aj Israel tu'ntzun mi'n tkub' kyyajla'n juntl maj qe kawil qe xjal etzan wu'ne; noq o'kx kxel kyq'o'n kytx'otx' teyle junjun k'loj kyiyjil aj Israel.

⁹Aqine Dios kxel nma'ne jlu: Nim mya b'a'n ma kyb'inchaye, aqeye kawil kyxol aj Israel. Mi'n che b'iyintle xjal ex mi'n che kub' kyyajla'ne. Kyb'inchame tkyaqil tuj tumel ex tz'aqlxix. Kykolinxe tu'n tel kyelq'a'ne kytx'otx' qe xjal etzan wu'ne. Aqine Dios in chin q'mante jlu.

¹⁰Che ajb'en kykyaqil mark ex malb'il cabalxix kyu'ne.

¹¹Aju malb'il triw il ti'j tu'n tten junx ta' tuk'il ju malb'il ta'l twitz uva. Aju malb'il homer tb'i 220 litro tuj, ex atzunju k'ajb'el te ttxuylal. Tuj jun homer in xi' laj bato ta'l twitz uva, ax ikx in xi' laj efa triw tuj jun homer.

¹²Ax ikx qe mark aqeju che ajb'el te malb'il atzun qe jlu: Winqin gera junx ta' talil tuk'il jun siclo, ex jun siclo ch'ixmi mey ons talil; 60 siclo junx ta' tuk'il mina.

¹³Atzun qe oyaj lu b'a'n t-xi kyq'o'ne: Aju triw tuk'ix sebad te 60 b'yuj k'elel kyu'ne, ex kxel kyq'o'ne jun b'yuj te oyaj.

¹⁴Ax ikx ktelb'a aseyt kyu'ne, te 100 pa'n k'elel, ex kxel kyq'o'ne jun pa'n te kyoyaje.

¹⁵Atzun kyi'j qe ẍne'l k'eletz kyi'ne jun kyxol kab' syentchaq, aqeju ulni kynab'l at kyxol aj Israel. Aqeju twitz awal lu che ajb'el te kyoyaje te Dios, ax ikx qe alumaj che ajb'el te chojb'il patun in che kub', ex te chojb'il te mojb'ab'l tib'il, aqeju in che'x q'ot tu'n tnajset kyile. Aqine Dios in chin q'mante jlu.

¹⁶Kykyaqil aj Israel il ti'j tu'n t-xi kyq'o'n oyaj lu te kawil at kyxol,

¹⁷atzunte kawil kxel q'onte kye alumaj te chojb'il patun in kub', ex qe oyaj twitz awal, ax ikx oyaj ta'l twitz uva aju in xi q'ot ok in che tzaj ke'yin ak'aj xjaw, ex kyuj qe q'ij te ojlab'l ex kyuj kykyaqil ninq'ij in che ik'set kyxol aj Israel. Ax ikx il ti'j kxel tq'o'n chojb'il il, kyuk'ix qe oyaj twitz awal, ex qe chojb'il patun in che kub', ex chojb'il te mojb'ab'l tib'il, tu'ntzun tnajset kyil aj Israel.

¹⁸Aqine Dios in chin q'mante jlu: Tuj tnejel q'ij te tnejel xjaw kxel kyq'o'ne jun tal tor minti' tpaltil te chojb'il il, tu'ntzun t-saqset tuj tja Dios.

¹⁹Ktzajel ti'n pal ch'in tchk'el alumaj aju otoq txi q'ot te chojb'il il, ex k'okel tq'o'n kyi'j tmarkil tlamel tja Dios, ex kyi'j kykyajil tb'utx' altar, ex kyi'j tmarkil tlamel ja ate' tuj tkab'in ttxa'n pe'n.

²⁰Ax jlu kb'antel tuj twuqin q'ij te xjaw, tu'ntzun tnajset kyil xjal, aqeju otoq che b'inchan il mya ximantoq kyu'n, ex tu'nju minti' nne'l kynik' ti'j. Kyja'tzun tten ksaqsetel tja Dios.

²¹Tuj tkyajlajin q'ij te tnejel xjaw kqeb'il kyu'ne tu'n tik'set ninq'ij te Xjan Q'ij, ex tuj enter wuq q'ij che wa'le pan minti' t-samel tu'n tjaw mal tk'u'j.

²²Tuj q'ij lu kxel tq'o'n kawil jun tal tor te chojb'il til, ex te chojb'il kyil kykyaqil aj Israel.

²³Teyle junjun q'ij teju wuq q'ij ninq'ij ktzajel tq'o'n kawil wuq tor ex wuq tman ẍne'l minti' kypaltil, te chojb'il te weye, aqeju patun in che kub'. Ax ikx teyle junjun q'ij kxel tq'o'n jun tman chip te chojb'il il.

²⁴Ti'j junjun tor ex junjun tman ẍne'l kxel q'ot kyaje alm triw ex ox litro tuk' mey chib'j aseyt.

²⁵Ax ikx kyuj ninq'ij ok kyjaw b'inchet tal ja t-xaq tze'yin kywi', aju in kub' ik'set tuj olaj tajlal twuqin xjaw, kxel tq'o'n kawil qe oyaj tuj enter wuq q'ij, aylex qe chojb'il il kxel tq'o'n ik tza'nx otoq txi tq'o'n nej, atzun qe jlu: Qe alumaj patun in che kub', ex qe oyaj twitz triw, ax ikx chib'j aseyt.