Read kumam Ezequiel 47 Bible Online

Ezequiel 47 - kumam bible

Ezequiel 47

¹Te tib'ajxi inx q'i'ne juntl maj tu'n xinaq ttzi tja Dios. Ex o wile in pulwin tjatz a' ttzi tja Dios, in b'et tex tumlal tjawitz q'ij, porke aju twitz tja Dios kyja' xi'yni tumlal tjawitz q'ij. Aju a' kyja' in ku'x tuj tumlal tb'anq'ab' tja Dios, kyja' nne'x b'et ttxlaj altar tuj tumlal tnayaj q'ij.

²Ex in etz q'i'ne tu'n tuj tkab'in ttxa'n pe'n te tja Dios ex in elpune ti'jxi ttzi ja tkub' tuj tumlal tb'anq'ab' q'ij, ex in ajtz q'one welt tu'n ti'jele, tejxi npone ttzi ja tkub' ti'jxi tnejel ttxa'n pe'n, aju kyja' xi'yni twitz tumlal tjawitz q'ij. Ex o wile a' nne'tz b'et ttxlaj ttzi ja tuj tumlal tnayaj q'ij.

³Etz xinaq q'i'n jun ky'jaj tu'n ex xi' tumlal tjawitz q'ij, xi techan 500 metro ex in ik'x ti'n tuj a'; ex japun a' ti'j tmopil nqane.

⁴Ex xi techan juntl 500 metro ex in ik'x ti'n tuj a': japun a' twi' nch'eke. Xi techan juntl 500 metro ex in ik'x ti'n tuj a'; ex japun a' nmije.

⁵Xi techan juntl 500 metro, ex otoq tz'ok a' te jun nima ex minti' b'ant tu'n wik'xe tuj; otoq tz'ok te jun nima ma'xix t-xe', o'kx tu'n xnu'txin jaku tzik'x jun xjal tuj.

⁶Tzajtzun tma'n xinaq weye kyja': Q'onka kwent ti'j ju ma tila. Te tib'ajxi in ajtz meltz'aje tu'n ttzi'yile nima,

⁷ex o wile tuj kykab'il pak' ttzi'yile nima attoq nimku tze'.

⁸Ax ikx tzaj tma'n weye kyja': Aju a' lu kyja' in xi b'et tumlal tjawitz q'ij ex in pon tuj nima Jordán, in ik'tl ex in pon b'aj max tuj mar at nim atz'an tuj. Oktzun tpon nima lu tuj mar at nim atz'an tuj, k'okel aju mar b'a'n tk'anjtz.

⁹Noq alkyex part jatum kpol a' lu, che anq'il nim kyiẍ tuj ex kykyaqil txkaj jil najlqe tuj a'. Porke tu'n nima lu aju mar at nim atz'an tuj k'okel te b'a'n tk'anjtz, ex che tel kykyaqil txkaj jil tuj.

¹⁰Che tel qe tzyul kyiẍ ttzi'yile mar, kxel qe' tuj lugar En-gadi ex kpol b'aj max tuj lugar En-eglaim, ex ax kb'el kytzqijsa'n kyxuyb'. Ex che tel nimku txkaj kyiẍ tuj ik tza'n tuj Nintz Mar.

¹¹Ex qe lugar sob'an ex qe laguna ate' niqayin ttzi'yile mar, mi'n ten a' b'a'n tk'anjtz kyuj; kukx che kyjel ten at atz'an kyuj, tu'ntzun kyajb'en tu'n tjatz atz'an.

¹²Tuj kykab'il pak' ttzi nima che ch'iyil kykyaqil txkaj tze' nno'k kywitz. Mlay che tzqij kyxaq ex mlay txi kykolin tu'n tok kywitz. Tkyaqil xjaw k'okel kywitz, porke ktel a' kyxe', aju nne'tz tuj tja Dios. Aju kywitz k'ajb'el te kylo' xjal, atzun kyxaq k'ajb'el te q'anb'il.

¹³Aqine Dios in chin q'mante jlu: Atzun qe tmojonil tx'otx' lu, aju ok kyk'ma' qe kab'laj k'loj kyiyjil aj Israel te kyetzb'il. Ok tk'ma' José kab'e piẍ tx'otx' te tetzb'il.

¹⁴Xi ntziyane tu'n t-xi nq'o'ne tx'otx' lu kye qtzan kyxe'chele. Kysipankuye parej. Atzunju tx'otx' lu k'okel te kyetzb'ile.

¹⁵Qe tmojonil tx'otx' tuj tumlal tb'anq'ab' q'ij, kxel qe' ti'j Nintz Mar, k'ik'el tuj b'e in xi' tuj tnam Hetlón, k'ik'el tuj tnam Zedad,

¹⁶tuj tnam Hamat, tuj tnam Berota ex tuj tnam Sibraim, aqeju kykub'sa'n tuj mojón kyxol tnam Damasco ex Hamat, ex k'ik'el tuj Hazar-haticón, aju tmojonin tib' tuk'il Haurán.

¹⁷Kyja'tzun aju mojón tuj tb'anq'ab' q'ij, kxel qe' tij Nintz Mar ex kpol b'aj ti'j tnam Hasar-enan, atzunju tx'otx' Damasco ex Hamat che kyjel ten tuj tumlal tb'anq'ab' q'ij.

¹⁸Aju mojón tuj tumlal tjawitz q'ij ktzajel qe' kyxol tnam Haurán ex Damasco, kb'eletz ttzi'yile nima Jordán ex ttzi'yile mar at nim atz'an tuj, tu'n tku'pun b'aj ti'j tnam Tamar, ex atzun nima Jordán k'ajb'el te tmojonil kytx'otx' aj Israel tuk'il kytx'otx' aj Galaad.

¹⁹Aju mojon tuj tumlal tnayaj q'ij kxel qe' ti'j tnam Tamar, k'elex jatum ta' twi a' tuj Meriba-cades, ex k'elex ttzi'yile nima te Egipto tu'n tpon b'aj ti'j Nintz Mar.

²⁰Aju tmojonil tx'otx' tuj telex q'ij, atzun Nintz Mar, kxelx qe' ti'j mojón te Egipto ex kpol b'aj jatum nno'kx b'e tu'n tpon tuj tnam Hamat.

²¹Atzun tx'otx' lu kb'el sipet kyxol kab'laj k'loj kyiyjil aj Israel.

²²Atzun etzb'il lu at kyoklene ti'j, ax ikx qe stranjer xjal najlqe kyxole, kyuk'ix qe kyk'wa'l ax otoq che itz'j kyxole. Ex che okel kyq'o'ne mer ik tza'n ax aj Israel qe. Ok tkub' sipet tx'otx' kyxol aj Israel, ax ikx kye at kyoklen ti'j tx'otx'.

²³Noq alkyex k'loj kyiyjil aj Israel najlqe stranjer xjal kyxol, axtzun kxel q'ot kytx'otx'. Aqine Dios in chin q'mante jlu.