Read kumam Ezequiel 6 Bible Online

Ezequiel 6 - kumam bible

Ezequiel 6

¹Tzaj yolin Qman wuk'ile ex tzaj tma'n kyja':

²Aya xjal, ke'yinxa kyumlal qe witz ate' tuj kytx'otx' aj Israel, ex q'manxa kye aju kxel nma'ne teya,

³ex chikuya kyja': Kyb'intze aqeye witz ate' tuj kytx'otx' aj Israel, aju in tma'n Qman kye qe nmaq witz, ex kye qe tal witz, kye qe nima ex kye qe chq'ajlaj ate' kyxol witz: Che tzajel nsama'ne qe xjal q'ojlel kyi'je ex che najel qe lugar kywi' qe witz jatum in che k'ulun qe xjal mya nimal Dios qe.

⁴Che b'ajel npaẍu'ne qe altar jatum in kub' kyq'o'n aj Israel qe chojb'il, ex jatum in kub' kypatun storak tib'aj, ex ok che b'el b'yo'n qe xjal kywitz qe tilb'ilal nno'k kydiosin.

⁵Atzun kyximlal aj Israel otoq che kyim, kb'el nq'o'ne kywitz qe tilb'ilal nno'k kydiosin, ex kxel nsputune kyb'aqil kyi'jele ky-altar.

⁶Tuj tkyaqil lugar jatum najlqe, che b'el xitun qe tnam, ex qe ky-altar te k'ulb'il kywitz qe tilb'ilal b'i'x che b'ajel xitj. Qe ky-altar b'i'x che b'ajel naj, ex qe tilb'ilal kydios che b'ajel b'uchj; qe ky-altar jatum in kub' patun storak tib'aj che b'el tilj; tkyaqil kyb'inchb'en o b'aj b'ant kb'ajel naj.

⁷Oktzun kylonte ok kykub' b'yo'n xjal kyxol, k'eleltzun kynik' ti'j, aqine Dios.

⁸Ex che tzoqpajel junjun kye wu'ne tu'n mi'n kykyim, che kyjel anq'in ex che b'ajel sputj kyxol txqantl nasyon.

⁹Qe xjal che kyjel anq'in, chin tzajel kyna'n kyxol qe nasyon jatum otoq che pon q'i'n; ktzajel kyna'n tza'n tten tzaj nb'ise kyu'n tu'n tlaj e je'x lpe' kyi'j qe tilb'ilal, ex el kypa'n kyib' wi'je tu'n kyk'ulun kywitz qe tilb'ilal. Ktzajel kych'ixwi kyi'jx ti'j tkyaqilju mya b'a'n otoq kyb'incha ik'b'ilxix.

¹⁰K'eleltzun kynik' ti'j, aqine Dios, ex k'elel kynik' ti'j mya noq gan o chin yoline tej t-xi nma'ne tu'n ttzaj mya b'a'n kyib'aj.

¹¹Tzaj tma'n Qman weye kyja': Tjaw oq'a, ex poq'cha'n ok qe tq'ab'a ex jaton kub'a tqana twitz tx'otx'; sch'ina tu'n ta'w tu'n tlaj kyb'inchb'en aj Israel puro ik'b'ilxix, ok che kymel tuj q'oj ex tu'n we'yaj ex tu'n tx'u'j yab'il.

¹²Aqeju ate' najchaq che kymel tu'n tx'u'j yab'il, atzun qeju ate' niqayin che kymel tuj q'oj, atzun qeju che kyjel anq'in che kymel tu'n we'yaj. Kyja'tzun kjawitz b'aj nq'oje kyi'j.

¹³Ok kylonte kyximlal qe xjal otoq che kyim kyxol qe tilb'ilal otoq tz'ok kydiosin, ex kyi'jele qe ky-altar, ex kywi' qe tal witz ma' kywa'l, ex kywi' qe nmaq witz, ex kyjaq' qe tze' cha'x kyxaq, ex kyjaq' qe tze' k'ol pin kyxaq, ex kyuj kykyaqil lugar jatum xi kyoyin perjum k'ok'jxix kywitz qe tilb'ilal, k'eleltzun kynik' ti'j, aqine Dios.

¹⁴Kxel nnuqpi'n nq'ab'e tu'n tkub' kycastiw wu'ne noq jatum otoq che pon najal; b'i'x kb'el xitj kytanmi wu'ne, ktzajel qe' tuj tzqij tx'otx', ex kpol b'aj tuj tnam Diblat. K'eleltzun kynik' ti'j, aqine Dios.