Read kumam Ezequiel 9 Bible Online

Ezequiel 9 - kumam bible

Ezequiel 9

¹Te tib'ajxi o nb'iye jun tq'ajq'ajel kyuwxix wen chi kyja': Che laq'etze aqeye che b'el q'onte kycastiw qe xjal najl tuj tnam, teyle te junjun kyeye q'i'n tmakb'il in ajb'en tuj q'oj tu'n tajb'en te xitb'il, chi tq'ajq'ajel.

²O wile tej kyoktz qaq xinaq ttzi ja tjaw jawni, aju xi'yni twitz tumlal tuj tb'anq'ab' q'ij, teyle te junjun q'i'n jun tmakb'il in ajb'en te b'iyb'il, ex tuk'ix jun xinaq kyuk'il tok t-xb'alun saq ke'yin, ex k'alo'ntoq jun tkub'il tint tk'u'j, te tz'ib'el. E okxtzun tujxi ex e kub' ten junx ttxlaj altar q'an k'uxb'il.

³Jaw laq'e' tajwalil Kydios aj Israel tib'aj kyilb'ilal querubín jatum tkub'toq tkyaqil maj, ex kyja' xi' ttzi tlamel tja Dios. Atzunte Qman tzaj ttxko'n aju xinaq tok t-xb'alun lino, aju k'alo'ntoq tkub'il tint tk'u'j, te tz'ib'el,

⁴ex xi tma'n Qman teju xinaq kyja': Txi'ya ex b'etin b'aja tuj tnam Jerusalén, ex q'o'nka jun techal tib'aj kywitz qeju in che b'isun ex in che oq' tu'n tlaj tkyaqil mya b'a'n ik'b'ilxix in b'inchanjtz tuj tnam lu, chi Qman.

⁵Ex o nb'iye tej t-xi tma'n Qman kye qeju qaqtl xinaq: Kyxi lpe'ye ti'j ju xinaq lu ex kyb'etin b'aje tuj tnam txi'x qe' kyu'ne ti'j njaye, kyb'yonkuye qe tij xjal, qe ku'xun, qe q'apoj, qe k'wa'l ex qe xu'j, ex mi'n tzaj q'aq'an kyk'u'je kyi'j. Ex mi'n kub' kyb'yo'ne qe xjal tok techal tib'aj kywitz, chi Qman. Tzyettzun kyb'yonjtz qe kytijil xjal kyu'n, aqeju ate'toq twitz tja Dios.

⁷Te tib'ajxi xi tma'n Qman kye kyja': Kyxi'ye tuj njaye ex kytz'ilsa'n b'aje, kynojsa'n b'aje tkyaqil ttxa'n pe'n tu'n kyximlal xjal otoq che kub' b'yo'n, chi Qman. E etztzun qe xinaq lu ex tzyettzun kyb'yonjtz qe xjal kyu'n tuj tnam.

⁸Ex tej matoq in che b'yet xjal kyu'n, atzun weye in kyaj tene njunalxe. In kub' ẍmeje'ye tejxi tpon takl tib'aj nwitze twitz tx'otx', ex tu'n nim b'is in jaw sch'ine ex nmaye kyja': Ay Nman Dios, ¿maj che b'el tb'yo'na ch'intl xjal aj Israel ate'x, tu'n tq'oja ma tzaj tib'aj tnam Jerusalén?

⁹Atzunte Qman tzaj ttzaq'we'n weye kyja': Ma tijxix ju il ma kyb'incha aj Israel ex aj Judá. Nojni tuj tnam kyu'n b'yol xjal; nimku mya b'a'n in kyb'incha'n tuj tnam, ex in kyma'n kyja': Ma kyaj tkolin Qman qtanmi ex minti' in til aju in b'ant qu'n, che chi.

¹⁰Kyja'tzun mlay tzaj q'aq'an nk'u'je kyi'j, noq o'kx che okel tuj xjel wu'ne ti'j kyb'inchb'en mya b'a'n.

¹¹Aju xinaq tok t-xb'alun saq ke'yin ex k'alo'ntoq jun tkub'il tint tk'u'j, te tz'ib'el, ul meltz'aj ex tma kyja': Ma japun b'aj wu'ne aju yol tzaj tma'na weye, chi xjal te Qman.