Read kumam Daniel 1 Bible Online

Daniel 1 - kumam bible

Daniel 1

¹Tuj toxin ab'q'i ttzyetlen tkawin rey Joacim tuj Judá, pon Nabucodonosor aju rey te Babilonia tuj Jerusalén, kyuk'ix qe t-soldad ex b'aj kytxolb'an kyib' ti'jele tnam.

²Atzunte Qman xi tq'o'n amb'il te Nabucodonosor tu'n ttzyet Joacim tu'n ex tu'n kyetz ti'n nimku makb'il tuj tja Dios. Xitzun ti'n Nabucodonosor nimku xjal pres ex e pon ti'n tuj Babilonia, atzun qe makb'il xjan e okx tq'o'n jatum k'u'n tkyaqil q'inumab'l tuj tja tdios.

³Ax ikx xi tma'n te Aspenaz, aju nejenel kyxol qeju at kyoklen ttxlaj rey, tu'n kyetz t-sk'o'n junjun ku'xun kyxol aj Israel, tiyjil rey, ex kyxol txqantl xjal ma' kyoklen.

⁴Aqeju ku'xun lu il ti'j minti' ch'in kytzakaj, mejor che ke'yin, at kynab'l, xnaq'tzamaj qe, elni kynik' ti'j tkyaqil ex at kynab'l tu'n kyajb'en tuj tja rey; ex tu'n t-xi q'ot xnaq'tzb'il kye tu'n tel kynik' ti'j kyyol aj Caldeo ex ti'j tkyaqil u'j at kyuk'il.

⁵Ax ikx xi tma'n Nabucodonosor tu'n t-xi q'o'n kywa ku'xun, tuk'ix kyk'a vin, ik tza'nx te rey twa in b'aj tkyaqil q'ij, ex tu'n t-xi q'o'n xnaq'tzb'il kye tuj ox ab'q'i, ex oktzun tjapun ox ab'q'i kyu'n, ax tu'n kykyaj ten ttxlaj rey te ajb'el te.

⁶Kyxol qe ku'xun lu, attoq kyaje ku'xun aj Judá qe, ex atzun kyb'i jlu: Daniel, Ananías, Misael ex Azarías.

⁷Atzunte nejenel kyxol qeju at kyoklen ttxlaj rey b'aj tch'expu'n kyb'i: Ate Daniel, Beltsasar tb'i ok tq'o'n; atzunte Ananías, Sadrac tb'i ok tq'o'n; atzunte Misael, Mesac tb'i ok tq'o'n; ex atzunte Azarías, Abed-nego tb'i ok tq'o'n.

⁸Atzunte Daniel kub' t-ximan tu'n mi'n tb'aj ttz'ilsan tib' tu'n tchi rey ex mi tu'n tk'a vin, tu'ntzun mi'n tik' tib'aj tley Dios, ex xi tqanin te nejenel kyxol qeju at kyoklen ttxlaj rey tu'n mi'n tok lajwersin tu'n tb'aj ttz'ilsan tib' tu'nju tnik'b'eb'l rey.

⁹Noq tu'n t-xtalb'il Dios b'a'n ela tnab'l Daniel tuj twitz ju nejenel kyxol qeju at kyoklen ttxlaj rey,

¹⁰ex xi tma'n te Daniel: —In chin xob'e twitz rey aju npatrone, porke ma tzaj tma'n weye alkye kywaye ex alkye kyk'a'ye tu'n t-xi'. Qatzun ma che ilwaje tu'n myalnix che ke'yine kywitz txqantl ku'xun junx kyab'q'iyle kyuk'il, noqlo tu'n kylaje jaku chin kub' b'yo'ne tu'n.

¹¹Xitzun tma'n Daniel te mayordom, aju otoq tz'ok q'o'n tu'n nejenel kyxol qeju at kyoklen ttxlaj rey tu'n kyok kwentin Daniel, Ananías, Misael ex Azarías tu'n:

¹²—In chin kub'sane twitza tu'n tprobarina laj q'ij qi'je, aqo'ye ajb'el teya; noq o'kx q'onkuya tkyaqil txkaj twitz awal te qchi'ye ex noq a' qk'a'ye q'ontza.

¹³Tb'ajlenxitzun laj q'ij, ke'yin oka qwitze kyuk'il qe txqantl ku'xun in che wa'n ti'j twa rey, tu'ntzun tel tnik'a ti'j alkye qe mas mejor che ke'yin, ex b'inchamtzuna qi'je noq alkye b'a'n tuj twitza, chi Daniel.

¹⁴B'a'n ela jlu tuj twitz mayordom ex e ok tq'o'n qe ku'xun tuj malb'il tuj laj q'ij.

¹⁵Tb'ajlenxitzun laj q'ij, aqeju ku'xun lu mas tb'anilxix che ke'yin ex mas at kyipun kywitz kykyaqil ku'xun in che chyo'n ti'j chib'j ik tza'n te rey in xi' tu'n.

¹⁶Kyja'tzun, minti'tl xi tq'o'n mayordom tnik'b'eb'l rey te kywa qe ku'xun lu, noq o'kx xi tq'o'n kye, tkyaqil txkaj twitz awal b'a'n tchyo'njtz.

¹⁷Xi tq'o'n Dios kysek'al ex kynab'l kyaje ku'xun lu tu'n tel kynik' ti'j tkyaqil txkaj libro ex ti'j tkyaqil ojtzqib'l. Ax ikx el tnik' Daniel ti'j ti t-xilen tkyaqilju in tzaj yek'un kye xjal ik tza'n tuj witzik' ex ti'j tkyaqil txkaj witzik'.

¹⁸Tejtzun tjapun b'aj ox ab'q'i, aju otoq tzaj tma'n rey tu'n kypon yek'b'aj qe ku'xun, ate nejenel kyxol qeju at kyoklen ttxlaj rey e je'x ti'n qe ku'xun lu twitz rey.

¹⁹Oktzun ten rey yolil kyuk'il, ex kyxol kykyaqil qe ku'xun minti' pon juntl ik tza'n te Daniel, Ananías, Misael ex Azarías; kyja'tzun, ax e kyaj ten qe kyaje ku'xun lu ajb'el te rey.

²⁰Tej tok ten rey xjelil kye ti'j junjun yol taj nim nab'l ex nim ximb'etz tu'n tel nik'b'aj kyi'j, atzun el tnik' kyi'j qa at mas kynab'l kywitz kykyaqil qe chman ex qeju b'a'n che q'ijin ate' tuj tkyaqil lugar jatum in kawin rey.

²¹Axtzun kyaj ten Daniel tejxi ttzyet tkawin Ciro.