Read kumam Daniel 11 Bible Online

Daniel 11 - kumam bible

Daniel 11

¹Ax ikx weye xi nkyuwsa'ne tk'u'j Darío aju rey te Media, ex xi wonine tuj tnejel ab'q'i ttzyetlen tkawin.

²Ax ikx tzaj tma'ntl anjel weye: —Ja'lo kxel nyek'une teya aju axix tok. Che kawiltl ox rey tuj Persia, ex te tib'ajxi k'okel tkyajin rey, ex k'okel mas q'inun kywitz qe ox rey che tel nej. Oktzun tch'iy tipumal tu'n tq'inumab'l, k'okel tq'o'n il kyi'j xjal tu'n kyq'ojin ti'j kawb'il tuj tnam Grecia.

³Ex te tib'ajxi kkawil jun rey at nim tnab'l tu'n tq'ojin, kkawil kyib'aj nimku nasyon ex kb'antel tu'n noq alkyex tajb'il.

⁴Ok tkyuwsante tib', knajel tkawb'il ex te kyaje pa'n k'elel, ex mya kye tk'wa'l kyjel ten aju kawb'il lu, ex mlay pon tipumal ik tza'n nej, tu'nju otoq b'aj pa'n, ex junxitl che kawil te t-xel.

⁵Aju rey te Egipto ktel nimxix tipumal, ex at jun kyxol nejenel kye qe t-soldad ktel mas nim tipun ik tza'n te; k'okel nimxix tipun ex aju tkawb'il k'okel te ma'xix.

⁶Oktzun tel junjun ab'q'i, aju rey te Egipto ex aju rey te Siria kb'antel ti'j jun kyyol kykab'il, ex aju rey te Egipto kxel tq'o'n tme'jel tu'n tmoje' tuk'il rey te Siria, noq tu'n tten tzalajb'il kyxol kab'e nasyon. Ex aju ximb'etz lu knajel, porke tza'nx te xu'j, ax ikx tal, tuk'ix tchmil ex kyuk'ix qeju at kyoklen ttxlaj che b'el b'yo'n.

⁷Ex at jun kyxol qe tiyjil xu'j lu k'okel tzoqpaj kyi'j qe soldad te Siria, ktzyetel lugar te tkolb'il tib' rey tu'n, ex aqeju t-soldad ktel kyipun ex kb'el kyi'j qe soldad te Siria kyu'n.

⁸Ax ikx che xel ti'n qe tilb'ilal nno'k kydiosin xjal, kyuk'ix qe tilb'ilal b'inchamaj ti'j k'uxb'il nno'kx q'ot tuj q'aq' tu'n tkub' ulj, junx kyuk'il txqantl makb'il wi'yilxix q'an pwaq ex saq pwaq kytx'otx'il, tu'n kypon ti'n tuj Egipto. Ex tuj junjun ab'q'i minti' q'oj k'okel kyxol kab'e nasyon lu,

⁹aju rey te Siria k'okel tzoqpaj ti'j tkawb'il rey te Egipto, ex jurat k'ajel meltz'aj tuj ttanmi.

¹⁰Kb'antel kyten qe tky'ajal rey te Siria tu'n kyq'ojin ex kb'antel kyten nimxix soldad kyu'n. Jurattzun naj ktzajel jun tky'ajal kyuk'il qe t-soldad tu'n ttzyet ju kawb'il tuj Egipto tu'n; knajel tkyaqil tu'n ik tza'n tu'n jun nima otoq ch'iy wen, ex te tib'ajxi k'ajetz meltz'aj tu'n tok tzoqpaj ti'j lugar te tkolb'il tib' rey te Egipto.

¹¹Tu'nju kyokxlen tzoqpaj qe soldad te Siria, ktzajel nimxix tq'oj rey te Egipto, k'eletz q'ojlel kyi'j soldad te Siria nimxix kyajlal, ex b'i'x che najel tu'n te jumajx.

¹²Tkub'lenxi kyi'j tu'n, ex kykyimlenxi ela' mil soldad te Siria tu'n, kjawil tniman tib', ex aju tipumal mlay ten nim tyemp.

¹³Aju rey te Siria k'okel tchmo'n juntl maj qe t-soldad mas nim kyb'aj ik tza'n nej, ex tb'ajlenxi junjun ab'q'i k'okel tzoqpaj juntl maj ti'j rey te Egipto, kyuk'il nimxix soldad q'i'mlex kymakb'il in che ajb'en tuj q'oj.

¹⁴Oktzun tb'ant jlu, nimku xjal kjawil kyi'n kyib' ti'j rey te Egipto. Kyxol qe jlu at junjun xinaq aj Israel puro mya b'a'n qe, kjawil kyi'n kyib' ti'j tu'ntzun tjapun aju tzaj yek'un teya tuj witzik', pero mlay che kamb'an qe.

¹⁵Ktzajeltzun rey te Siria ex kjawil tb'incha'n junjun wa'lb'il ti'jele tnam tok muro ti'j tu'ntzun b'a'n tokx, ex kb'el ti'j tu'n. Mi qe mejor soldad te Egipto mlay che we' kywitz qe aj q'oj lu.

¹⁶Aju rey lu ok tb'incha' noq alkye tajb'il ex mi a'l jun jaku tnimari tib' tu'n tq'ojin tuk'il. Kyjel ten tuj lugar tb'anil tx'otx' tb'i ex aju tx'otx' lu kyjel ten tjaq' tkawb'il.

¹⁷Ax ikx kb'antel tten tu'n ttzyet tkyaqil tx'otx' Egipto tu'n; kb'antel jun ttrat tuk'il rey lu ex kxel tq'o'n tme'jel te t-xu'jil, tu'ntzun tkamb'an ti'j tx'otx' Egipto, ex aju t-ximb'etz lu mlay japun.

¹⁸Te tib'ajxi k'okel tzoqpaj kyi'j qe tnam ate' tuj mlaj tx'otx', ex nimku kye qe tnam lu che tzyetel tu'n, pero ktzajel tch'ixwi tu'n jun nejenel kye soldad te juntl nasyon, ex tib'ajx ktzajel mya b'a'n.

¹⁹Tu'n jlu k'ajel meltz'aj tu'n tpon tuj lugar te tkolb'il tib' tuj ttanmi, ex kb'el ti'j ex kb'el b'yo'n.

²⁰K'okel juntl rey te t-xel, ex ate rey lu kxel t-sama'n jun xjal peyil chojenj tu'ntzun tchmet tq'inumab'l tuj tkawb'il, ex noq nik'xi q'ij ktel, jurat kb'el b'yo'n, maske mya tuj q'oj kymel.

²¹Te tib'ajxi jlu, k'okel juntl rey puro ik'b'ilxix minti'toq toklen tu'n tok te rey, ex noq minab'en ktzyetel kawb'il tu'n noq tu'n sb'ub'l.

²²Qe soldad in che q'ojin ti'j che najel te jumajx tu'n, ax ikx kb'el tb'yo'n aju nejenel kye pal.

²³Ax ikx che b'el t-sb'un qeju otoq b'ant ti'j jun kyyol tuk'il, ex maske mya nim xjal ktel tuk'il, pero a kkamb'al.

²⁴Mi a'ltoq jun b'ilte ok tokx tuj tx'otx' mas q'inunxix, ex ok tb'incha' aju minti' o tb'incha jun kyxol qe t-xe'chel. Aju q'inumab'l otoq tz'el kyi'n tuj q'oj, kb'el t-sipan kyxol qe t-soldad, ex kb'ajel t-ximan tza'n tten tu'n tok tzoqpaj kyi'j qe tnam tok muro kyi'j, pero noq nik'xi tyemp ktel.

²⁵Tuk'il nim tipumal ex kyuw tk'u'j, k'okel tzoqpaj ti'j rey te Egipto kyuk'il nimku soldad uk'in tu'n. Atzunte rey te Egipto k'eletz kyuk'il nimku t-soldad nimxix kyipun ex k'okel ten q'ojlel ti'j, ex noq minab'en kb'el ti'j tu'n sb'ub'l ex mlay xkye' kyi'j aj q'oj.

²⁶Ax qeju otoq che tzaj ttxko'n tu'n kywa'n tuk'il, kb'antel ti'j kyu'n tu'n tnaj tkawb'il, aqe t-soldad kb'el kyi'j ex nimku che najel.

²⁷Aqeju kab'e rey lu noq o'kx che ximal ti'j tu'n kyb'inchante mya b'a'n jun ti'j juntl; che b'el qe' ti'j jun mes tu'n kyyolin ex kykab'il che nik'al yol, ex mi jun kye kjapunel t-ximb'etz, tu'nju na'nxtoq tu'n tpon or.

²⁸Aju rey te Siria k'ajel meltz'aj tuj ttanmi tuk'il tkyaqil q'inumab'l otoq tz'el ti'n tuj q'oj, ex tu'nju in q'ojl ti'j tnam sk'o'maj tu'n Dios, ex kjapunel aju otoq kub' t-ximan, ex te tib'ajxi k'ajel meltz'aj tuj ttanmi.

²⁹Oktzun tpon tq'ijlalil b'animaj ti'j, k'okel tzoqpaj juntl maj ti'j rey te Egipto, ex tuj q'oj lu mlay kamb'an ik tza'n tnejel maj.

³⁰Che ul qe barc, q'i'n qe soldad kyu'n tzajniqe tuj telex q'ij, ex che okel tzoqpaj ti'j, ktzajel nim t-xob'il ex k'elel oq. Ktzajeltzun nimxix tq'oj ti'j tnam sk'o'maj tu'n Dios, ex ok tb'incha' noq alkye tajb'il kyi'j, atzun qeju otoq kyaj kykolin aju yol kyaj b'ant ti'j tu'n Dios kyuk'il noq tu'n kyajb'en te, ok tb'incha' b'a'n kye.

³¹Qe t-soldad kb'ajel kytz'ilsa'n tuj tja Dios tu'n mya b'a'n, tuk'ix ju ja jatum nno'kx kyklon kyib' xjal, ex kmayetel kyu'n tu'n mi'n kyxi q'ot qe chojb'il aqeju in che'x q'ot tkyaqil q'ij, ex ax tuj tja Dios k'okex kyq'o'n jun tilb'ilal ik'b'ilxix.

³²K'okel tilil tu'n rey tu'n kykamb'et tuk'il xmoxb'il aqeju otoq tz'el kypa'n kyib' ti'j yol otoq kyaj b'ant ti'j tu'n Dios kyuk'il, atzun qeju q'uql kyk'u'j ti'j Dios che tel wa'lxix ex mi'n txi kyniman tyol.

³³Qe xjal at kynab'l kyxol t-xjalila kxel kyq'o'n xnaq'tzb'il kye nimku xjal, ex tzul jun tq'ijlalil che b'el b'yo'n, che b'el patun, kxel elq'a'n tkyaqilju at kye ex at junjun che okel te majen kyuj tx'otx' minti' ojtzqi'n kyu'n, pero noq nik'xi tyemp ktel jlu.

³⁴Oktzun tpon tq'ijlalil ok ttzaj yajb'il, ok kyk'ma' ch'in onb'il ex nimku k'okel kymojb'an kyib' kyuk'il, pero noq tten kyu'n.

³⁵Ax ikx che b'ajel yajla'n junjun kye qeju che q'olte kynab'l tnam xjal. Aju joyb'il kyi'j k'ajb'el tu'n t-saqix tuj kyanmi ex tu'n kyten minti' kypaltil okxi tpon mankb'il tq'ijlalil b'animaj ti'j.

³⁶Kb'antel tkyaqil tu'n rey noq alkye tajb'il, kjawil tniman tib', k'okel tq'on tib' te ma' toklen kywitz kykyaqil dios nno'k kydiosin xjal, ex k'okel ten yolil mya b'a'n ti'j Dios axix tok. Tkyaqil b'a'n k'elel te okxi ttzaj t-sama'n Dios tcastiw, porke aju at tu'n tb'ant tu'n Dios, kb'antel tu'n.

³⁷K'elel tik'un rey lu kydios qe t-xe'chel, kyuk'ix qe dios in che k'ulun xu'j kywitz, kyuk'ix txqantl dios nno'k kydiosin xjal, porke k'okel tq'on tib' te ma'xix toklen kywitz kykyaqil.

³⁸Maske ikju, pero k'okel ten k'ulul twitz jun dios tuj twitz qa tu'n ok kletel, aju dios lu minti' ojtzqi'n kyu'n qe t-xe'chel, ex kxel toyin q'an pwaq te, tuk'ix saq pwaq, kyuk'ix qe tal ab'j tb'anilxix, kyuk'ix qe oyaj wi'yilxix.

³⁹Tu'nju onb'il tu'n jun dios minti' ojtzqi'n kyu'n xjal, k'okel tzoqpaj q'ojlel kyi'j qe ja te kykolb'il kyib' xjal, ex k'okel tq'o'n kyoklen xjal te ma'xix, aqeju in kyma'n qa ate jlu rey, ex kxel tq'o'n kytx'otx' te chojb'il kye.

⁴⁰Oktzun tpon mankb'il tq'ijlalil, aju rey te Egipto k'okel tzoqpaj ti'j rey te Siria, ex aju rey te Siria k'eletz ik tza'n kyq'iq' jb'al ex k'okel tzoqpaj ti'j rey te Egipto; k'eletz kyuk'il qe tcarwaj in che ajb'en tuj q'oj, kyuk'ix qe t-soldad kyjax kyib'aj chej, ex nimku barc. K'ik'el kyuj nimku nasyon ik tza'n jun nima nne'x tilj tuj tb'e ok tch'iy wen.

⁴¹Ax ikx k'okex tuj tx'otx' tok tb'i Tx'otx' Tb'anilxix ex kb'el kyi'j nimku nasyon tu'n, ex qe xjal najl tuj Edom, tuj Moab ex mas mijku kye qeju najl tuj tx'otx' Amón che kletel.

⁴²Ktzyetel txqantl nasyon tu'n, ax ikx te Egipto mlay kyaj klet.

⁴³Kxel ti'n nimku q'inumab'l q'an pwaq, saq pwaq, ex kykyaqil qe makb'il tb'anilxix ate' tuj Egipto. Ax ikx kb'el kyi'j qe nasyon Libia ex Etiopía tu'n.

⁴⁴Ex ktzajel t-xob'il tu'n jun tqanil ktzajel tuj tjawitz q'ij ex tuj tx'otx' tuj tb'anq'ab' q'ij, k'ajel meltz'aj tuk'il nim ttx'u'jil ex che b'el tb'yo'n nimku xjal.

⁴⁵Atzun kb'el ten tcampament kyxol mar tuk'il witz xjan ex tb'anilxix. Pero kpol or tu'n tkyim ex mi a'l jun k'onil ti'j.