Read kumam Daniel 8 Bible Online

Daniel 8 - kumam bible

Daniel 8

¹Tuj toxin ab'q'i ttzyetlen tkawin rey Belsasar, aqine Daniel at juntl o wile ik tza'n tuj witzik', te tib'ajxi aju otoq tzaj yek'un weye nej.

²Tuj nwitze mer ik tza'n atine tuj nintz tnam Susa, aju tnam mas ma' toklen kyxol txqantl tnam tuj tx'otx' Elam, ex ik tza'n a atine ttzi nima Ulai.

³Xi nke'yine ex o wile jun tman ẍne'l at ttzi nima, at kab'e tcach nmaq qe, ex mas yajxi tzaj ch'iy jun ex mas ma' ok twitz tnejel.

⁴O wile aju tman ẍne'l lu in jaw ttako'n tcach tuj telex q'ij, tuj tb'anq'ab' q'ij ex tuj tnayaj q'ij ex mi a'l juntl txkup jaku xkye' ti'j ex mi tu'n tkolpaj tu'n, tu'nju at nimxix tipun. In tb'incha'ntoq tman ẍne'l noq alkye b'a'n tuj twitz ex kyja' tok mastl tipun.

⁵Kukxtoq in ximane ti'j jlu, tej twile kyja' ttzaj jun tman chip tuj telex q'ij, in qelan wen mer ik tza'n minti' in che kub' aj tqan twitz tx'otx'. Aju tman chip lu, attoq jun nintz tcach kyxol qe tb'aq' twitz.

⁶Tej tpon jatum ta'toq tman ẍne'l at kab'e tcach, aju otoq wile ttzi nima, xi qelan takolte tu'n tkyaqil tipun,

⁷ex b'i'x e je'l toqj qe kab'e tcach tman ẍne'l tu'n ex minti' o ten tipun tu'n tq'ojin tuk'il. B'i'x pon tz'aq tman ẍne'l tu'n twitz tx'otx' ex b'aj twab'an ex mi jun o kolin ti'j tman ẍne'l.

⁸Aju tman chip ok nimxix tipun, ex tej tok mastl tipumal etz q'ulpaj tcach ex e tzaj ch'iy kyajetl tcach te t-xel. Aju kyaje tcach lu xi kyumla'n tkyajil pak' twitz tx'otx'.

⁹Ti'j jun kyxol qeju kyaje cach lu, el jlet jun titz'in ex o ch'iyxix wen, pon kanun max tuj tnayaj q'ij, tuj tjawitz q'ij ex tuj lugar Tb'anil Tx'otx' tb'i.

¹⁰Aju cach lu o ch'iyxix wen ex pon kanun twa'l max kyxol qe che'w twitz kya'j, b'i'x e tzaj tz'aq junjun che'w tu'n ex e b'aj twab'an,

¹¹ax ikx ok tq'o'n tib' te mas ma' toklen twitz ju Nejenel kye qeju ate' tuj kya'j ex tu'n o mayet, tu'n mi'n t-xi q'o'n aju chojb'il in xi q'o'n kykyaqil q'ij, ex b'aj t-xitun aju at tuj tja Dios.

¹²Ex tu'nju mya b'a'n kyb'incha junjun xjal, qe xjal etzan tu'n Dios tuk'ix ju chojb'il, e je'x q'o'n tuj tkwent ju yajlal kye; ex aju tley Dios axix tok ok tq'o'n te minti' tajb'en. O tb'incha ik tza'nx tajb'il, ex b'a'n ela tkyaqil te.

¹³Te tib'ajxi, o nb'iye xi tqanin jun anjel te juntl anjel: ¿Jtoj b'an tjapun b'aj tyemp ti'j ju mya b'a'n in b'inchanjtz tib'aj altar jatum in kub' patit chojb'il tkyaqil q'ij? ¿Jte' q'ij ktel aju il xob'ajilxix, tu'n kyb'aj yajla'n qe okslal ex tu'n tb'aj wab'an ju ja te k'ulb'il te Qman kyu'n xjal?

¹⁴Atzunte juntl anjel xi ttzaq'we'n: Maxi ok tjapun kab' mil tuk' ox syent q'ij. Te tib'ajxitzun jlu, aju ja te k'ulb'il te Dios kb'ajel saqset juntl maj, chi anjel.

¹⁵Aqine Daniel, tej matoq in chin ke'yine ti'j ex in chin ximantoqe ti'j tu'n tel nnik'e ti'j ti t-xilen, minab'en kub' tyek'un tib' nwitze jun ik ke'yin ik tza'n jun xjal,

¹⁶ex o nb'iye tq'ajq'ajel twi' jun xjal tzaj q'ajt ti'jxi nima Ulai in tma'n: Gabriel, chik'b'anxa teju xinaq lu ti t-xilen aju ma tzaj yek'un te.

¹⁷Atzunte pon laq'e' ntxlaje ex b'i'x in sek'paje tu'n ex in kub' ẍmeje'ye tejxi tpon takl tib'aj nwitze max twitz tx'otx', atzunte tzaj tma'n weye: Aya xinaq, tz'elx tnik'a ti'j aju ma tzaj yek'un teya, atzun in yolin ti'j b'ajsb'il tq'ijlalil.

¹⁸Tej matoq in yolin wuk'ile, in kub' mutzq'aje twitz tx'otx' ex in ik' tane, atzunte ok tmako'n qine ex in jaw wab'ane tu'n,

¹⁹ex tma: Kxel nchik'b'a'ne teya aju kb'ajel ok tjapun b'aj tq'ijlalil ttx'u'jil Dios, porke aju witzik'b'aj lu, atzun in yolin ti'j b'ajsb'il tq'ijlalil.

²⁰Aju tman ẍne'l at kab'e tcach, atzun in yolin kyi'j qe rey te Media ex te Persia.

²¹Atzunju tman chip, atzun in yolin ti'j rey te Grecia, ex aju tcach ma tij tetz kyxol qe tb'aq' twitz, atzun tnejel rey te Grecia.

²²Aju kyaje tcach e tzaj ch'iy tej tjaw toqj tnejel tcach, atzun t-xilen: Tujx nasyon lu che jawil jlet kyaje kawb'il, ex mlay pon kyipumal ik tza'n tipumal tnejel rey.

²³Oktzun tpon b'aj tq'ijlalil tu'n kykawin qe rey lu, ex otoq chmet nimxix il kyxol xjal, at jun rey jawni twitz ex kye sb'un, k'okel te kawil.

²⁴K'okel te ma'xix tipumal, ex mya tu'n tex tipun. Nimku kb'ajel t-xitun, ex tkyaqil b'a'n k'elel te. Che b'el tb'yo'n qe xinaq ma' kyoklen, ex qe xjal etzan tu'n Dios che najel tu'n.

²⁵Noq tu'nju jawni sb'un, kkamb'al. Kjawil tniman tib' ex noq minab'en che b'el tb'yo'n nimku xjal. K'okel ten q'ojlel ti'j Nejenel kye kykyaqil kawil, ex b'i'x knajel, maske mya kyu'n xjal.

²⁶Aju ma tzaj yek'un teya ik tza'n tuj witzik' ti'j kab' mil tuk'il ox syent q'ij, axix tok jlu, ex mi'n tz'el tqanil tu'na, porke kjapunel okxi tel nim q'ij.

²⁷Aqine Daniel o nna'ye ya minti'tl wipune, ex b'i'x in yab'te kab' ox q'ij. Te tib'ajxi ul nnab'le ex in aq'nane ti'j aq'untl te rey. Nim in ok tene ximal ti'j ju otoq tzaj yek'un weye, porke minti' el nnik'e ti'j.