Read kumam Oseas 1 Bible Online

Oseas 1 - kumam bible

Oseas 1

¹Atzun yol jlu tzaj tma'n Qman te Oseas aju tky'ajal Beeri, tej kyten qe rey lu tuj Judá: Uzías, Jotam, Acaz ex Ezequías, ex tej tten Jeroboam aju tky'ajal Joás te rey kye aj Israel.

²Kyja'tzun tten o xe't tyol Qman tuk'il Oseas tu'n t-xi tma'n kye aj Israel, chi kyja': Qe aj Israel ma tz'el kypa'n kyib' wi'je tu'nju ma che ok ik tza'n jun xu'j jawni twitz kyuk'il xinaq. Ikxtzun teya, txi'ya ex q'intza jun t-xu'jila jawni twitz kyuk'il xinaq, ex b'a'n tu'n tul tk'wa'la ti'j tu'ntzun kyok qe k'wa'l lu te tal jun xu'j jawni twitz kyuk'il xinaq, chi Dios te Oseas.

³Tzajtzun ti'n Oseas ju xu'j Gomer tb'i, aju tme'jel Diblaim, tu'n tok te t-xu'jil, ok ten tal ex tzaj jun tky'ajal Oseas ti'j.

⁴Xi'tzun tma'n Qman te Oseas: Jezreel tb'i tal q'a k'okel tq'o'na, ex ch'ix tpon tyemp tu'n tkub' nq'o'ne kycastiw qe tiyjil rey Jehú, tu'n tlaj e kub' b'yo'n xjal tu'n tuj lugar Jezreel, ex b'i'x knajel wu'ne aju kykawb'il rey kyxol aj Israel.

⁵Maske nim kyipun qe kysoldad aj Israel, che najel wu'ne tuj chq'ajlaj Jezreel tuj tq'ijlalil tzul, chi Qman te Oseas.

⁶Ok ten juntl tal Gomer ex txin tal ul itz'j. Tzajtzun tma'n Qman te Oseas: Lo-ruhama[1] tb'i tal txin k'okel tq'o'na, ex mlay tzaj q'aq'an nk'u'je juntl maj kyi'j aj Israel ex mlay kub' nnajsa'ne kyil.

⁷Atzun kyi'j aj judá ktzajel q'aq'an nk'u'je. Wu'nxe che kletel, aqine Kymane ex Kydiose; mya tu'n q'oj che kletel wu'ne, mya tu'n xob'l plech, mya tu'n spad, ex mi'n che ajb'en chej mi qe xjal kyjax kyib'aj chej, chi Qman te Oseas.

⁸Tej tel tal txin Lo-ruhama ti'j tch'u', ok ten juntl tal Gomer ex ul itz'j juntl tal, q'a.

⁹Tzajtzun tma'ntl Qman te Oseas: Lo-ammi[2] tb'i tal q'a k'okel tq'o'na, porke mya etzantl qeye wu'ne ex myatl Kydiose qine.

¹⁰Tzul tq'ijlalil tu'n kyok aj Israel ik tza'n ttxa tz'a'n ttzi mar, mi a'l jun jaku b'ant tmalon ti'j ex mlay b'ant tajlanjtz. Mlay q'manjtz kye tu'n Dios kyja': Mya etzan qeye wu'ne, chiwt, noq o'kx kxel tma'n Dios kye: Aqeye tk'wa'l Dios itz'.

¹¹K'okeltzun kychmon kyib' aj Judá ex qe aj Israel ex kjawil kysk'o'n o'kxku jun nejenel kyxol, ex tuj tkyaqil part che tzajel tu'n kyul meltz'aj tuj Jerusalén. Ma'xix toklen aju tq'ijlalil Jezreel.