Read kumam Oseas 10 Bible Online

Oseas 10 - kumam bible

Oseas 10

¹Ik kyten qe aj Israel ik tza'n jun tqan uva nim twitz, ex tej tok nim twitz kyawal, kub' kyb'incha'n txqantl ky-altar; tej tok kytx'otx' tb'anilxix, ax ikx tb'anilxix e ok qe ab'j kyu'n, aqeju in che kub' ten k'ulul kywitz.

²Kab'e tten kyximb'etz aj Israel, atzun ja'lo kxel kychjo'n kyil. Che b'el t-xitun Qman ky-altar ex che b'el tb'uchin qe ab'j, aqeju in che kub' ten k'ulul kywitz.

³Atzun ja'lo ok kyma' qe xjal lu: Minti' qreye porke mib'an qo nimane te Qman. Ex ¿alkye jun b'a'n jaku tb'incha jun rey qeye? Che chi.

⁴Noq o'kx in che yolin wen, in xi kytziyan jun yol mya ax tok ok tb'ant ti'j jun kyyol tuk'il juntl. Aju castiw ktzajel kyib'aj ik tten ik tza'n jun tal k'ul puro venen in ch'iy kyxol qe surc tuj kojb'il.

⁵Qe xjal ate' tuj Samaria che tzajel lu'lun, che jawil oq' tu'nju otoq naj tilb'ilal tal tor aju in che k'ulun twitz tuj lugar Bet-avén. Ti'jtzun jlu che jawil oq' tnam xjal ex qe pal, tu'nju otoq naj tajwalil.

⁶Ex tuk'ix ju tilb'ilal tal tor kxel q'i'n tuj Asiria tu'ntzun t-xi q'o'n teju nintz rey. Kyja'tzun che elel aj Efraín tuj kych'ixwi: Ktzajel kych'ixwi aj Israel ti'j tilb'ilal in che k'ulun twitz.

⁷Kb'el naj ju rey te Samaria ik tza'n jun ttx'i'lil tze' in xi iqan tu'n a'.

⁸Che b'el xitun qe ja in che ajb'en te kyk'ulb'il xjal kywi witz jatum in b'ant il kyu'n xjal aj Israel. Che tzajel ch'iy qe ch'i'x k'ul kyuk'ix qe txqantl ch'i'x kyib'aj ky-altar, ex kxel kyma'n xjal kye nmaq witz: Qo kyewan kub'e, ex kxel kyma'ntl kye qe tal witz: Kytzaj tz'aqe qib'aje.

⁹Chi Qman in tma'n: Na'nx t-xi kykolin aj Israel tu'n kyb'inchan il atxix tzaj qe' kyu'n tuj Gabaa; ax ma che kyaj ten tuj kyil. Kyja'tzun kpol kanun q'oj tuj Gabaa kyi'j qe b'inchal mya b'a'n.

¹⁰Kb'el kycastiw tnam xjal lu wu'ne noq jtoj waje. Kjawil kychmon kyib' qe nasyon q'ojlel kyi'j ok tkub' kycastiw wu'ne tu'n tlaj ju nintz mya b'a'n otoq kyb'incha.

¹¹Qe aj Efraín ik kyten ik tza'n jun tal vac mansimaj at tgan tu'n tb'et tib'aj triw tu'n tel ttxk'omil. Atzun ja'lo ma kub' nq'o'ne yuw tib'aj kyqul tb'anilxix, tu'n t-xi kyjawo'n carret; qe aj Judá kxel kyjawo'n punt tu'n kych'okin ex qe tiyjil Jacob che pa'l q'ub'an.

¹²Xi nma'ne kye kyja': Kyawan ku'xe aju tz'aqlxix ex kychmon jawe aju k'ujlalil ik tza'n twitz awal. Kyb'inchame tten kyanmiye tu'n tch'expet kymodiye ik tza'n in jaw q'u't ak'aj tx'otx' tu'n tku'x awet awal, porke ma pon tq'ijlalil tu'n kyjyone ti'j Qman okxi tul ex tu'n ttzaj tq'o'n xnaq'tzb'il kyeye tu'n kyb'inchanteye aju tz'aqlxix.

¹³Atzun kyeye ma ku'x kyawa'ne ju mya b'a'n, ma jaw kychmo'ne aju mya tz'aqlxix ex ma tzaj xitb'il kyi'je tu'n tlaj ok qe' kyk'u'je ti'j nik'aj yol. Tu'nju ma tz'ok qe' kyk'u'je ti'j kyeye kynab'le ex kyi'j nimku xinaq at kyuk'ile kyuw kyk'u'j tuj q'oj,

¹⁴kyja'tzun nimxix tq'ajq'ajel kywi' aj q'oj che ul q'ojlel kyi'je, ex kykyaqil ja te kykolb'il kyib'e che b'el xitun ik tza'n tej tkub' xitun aju lugar Bet-arbel tu'n rey Salmán, tej tok ten q'ojlel ti'j ex tej kyb'aj paẍu'n qe txuyb'aj kyuk'ix kyal.

¹⁵Chin ajele tuj nlugare ex max chin eletze okxi tel kynik' ti'j kyil ex okxi kyul jyol weye. Ok ttzaj yajb'il kyib'aj, che okel ten jyolte weye, chi Dios.