Read kumam Oseas 11 Bible Online

Oseas 11 - kumam bible

Oseas 11

¹Chi Qman in tma'n kyja': Tej matoq k'wa'lx qe aj Israel, ten nim nk'ujlalile kyi'j, ex e jaw nsk'o'ne ma tuj Egipto tu'n kyok te nk'wa'le.

²Ex tej kukxtoq in chin txokone kyi'j, noq nne'l kypa'n kyib' wi'je. Qe xjal etzan wu'ne xi kyq'o'n chojb'il kye Baal aqeju kydios, ex kub' kypatun storak kywitz qe tilb'ilal.

³Maske ikju, aqine inx xnaq'tzante kye aj Efraín tu'n tb'ant kyb'et ex aqine inx ẍaqlunte kye, pero minti' el kynik' ti'j qa aqine kwentil kye.

⁴Tu'n tq'aq'b'il nk'u'je ex tu'n nk'ujlalile e tzaj wi'ne tu'n kyul wuk'ile; el wi'ne aju iqtz al tkub'sa'ntoq kyib'aj, ik tza'n nne'l q'i'n yuw tib'aj kyqul wakẍ ex in kub' tene k'a'chal kye.

⁵Ex minti' kyajb'e tu'n kyajtz wuk'ile. Kyja'tzun che ajel juntl maj tuj Egipto ex aju kyrey aj Asiria kkawil kyib'aj.

⁶Tu'n spad che b'el b'yo'n qe xjal kyuj kytanmi ex b'i'x che b'ajel naj qe tlamel tnam, che najel xjal tu'n tlaj ju kyximb'etz mya b'a'n.

⁷Qe xjal etzan wu'ne kukx tel kypa'n kyib' wi'je, in jax kysch'i'n twitz kya'j, ex mi a'l jun in onin kyi'j.

⁸¿Tza'n tten tu'n kykyaj ntzoqpi'ne, aqeye aj Efraín? ¿Tza'n ten tu'n kykyaj nkoline, aqeye aj Israel? ¿Jakupe che naje wu'ne ik tza'n naj aju tnam Adma, ex qa tu'n nb'inchanteye kyi'je ik tza'n o b'ant wu'ne kyi'j aj Seboím?[5] In tzaj nim ta'w tuj wanmiye, tu'nju at nim tq'aq'b'il nk'u'je kyi'je.

⁹Mlayx kub' kycastiwoye wu'ne ik tza'nx nq'oje; ex mlay che naj juntl maj aj Efraín wu'ne porke Dios we qin ex mya xjal. Aqine xjan atine kyxole, ex mlayx chin ule xitul kyeye.

¹⁰Qe xjal etzan wu'ne che tzajel lpe' wi'je ex chin jawil tzanune kyi'j ik tza'n jun b'alun. Chin jawil tzanune, ex atzun qe xjal etzan wu'ne che tzajel tuj telex q'ij in che lu'lun wen.

¹¹Che ajetz tuj Egipto in che qelan wen mer ik tza'n qe chyu'j; che tzajel tuj Asiria mer ik tza'n qe paloma; ex che tzajel wi'ne tu'n kynajan juntl maj kyuj kyja. Aqine Dios in chin q'mante jlu.

¹²Txolin wi'je tu'n nik'aj yol kyu'n aj Efraín; txolin wi'je tu'n sb'ub'l kyu'n aj Israel. Ma tz'el kypa'n kyib' aj Judá wi'je, aqine Xjan ex tz'aqlxix.