Read kumam Oseas 12 Bible Online

Oseas 12 - kumam bible

Oseas 12

¹Noq nik'aj yol in chmet kyu'n aj Efraín ex nimku mya b'a'n in kyb'incha'n kyi'j xjal; in b'ant ti'j kyyol kyuk'il aj Asiria ex in xi kysama'n aseyt te oyaj kye aj Egipto tu'n tmoje' kyyol kyuk'il. Ex tkyaqil jlu noqx gan ex minti' tajb'en, chi Qman.

²At tq'oj Qman kyi'j aj Judá. Kb'el kycastiw tiyjil Jacob tu'n ti'j kyb'inchb'en; kxel tq'o'n chojb'il kye ti'j kyb'inchb'en mya b'a'n.

³Tej na'nxtoq titz'j Jacob, kub' ttzyu'n t-xe t-su'ẍil tqan ttzik, ex tej tok tk'u'j o q'ojin tuk'il Dios.

⁴O malin tuk'il jun anjel ex o kub' ti'j tu'n; jaw oq' ex xi tqanin tu'n tkub' ky'iwla'n. Ok noj Dios ti'j Jacob tuj Betel ex o yolin tuk'il ma chixin.

⁵Ate Qman Dios tajaw tkyaqil ex Qman tb'i.

⁶Kyja'tzun, aqeye aj Israel kyajtz meltz'aje tuk'il Dios aju jaw sk'onte kyeye, ten kyk'ujlalile ex kyb'inchame aju tz'aqlxix, ex kukx qe'k kyk'u'je ti'j Dios.

⁷Chi Qman in tma'n: Qe xjal etzan wu'ne ik kyten ik tza'n qe comersyant aj Canaán, in che ajb'en qe malb'il mya tz'aqlxix kyu'n tu'nju at kygan tu'n kysb'un kyi'j xjal.

⁸Qe aj Efraín in kyma'n: Ax tok ma qo oke q'inun, ma knet qq'inumab'le; ex mi jun jaku q'mante qa tuk'il sb'ub'l otoq qkamb'aye, che chi.

⁹Aqine Dios aju Kymane atxix tej ate'ye tuj Egipto, kb'antel wu'ne tu'n kynajane juntl maj kyuj qe ja xb'alun ja, ik tza'n in b'anttoq kyu'ne ojtxi tej kytene tuj tzqij tx'otx'.

¹⁰In yoline kyuk'il qe nsanjele ex xi nyek'une nimxix kye mer ik tza'n tuj witzik', ex in yoline kyuk'il tuj techal tu'n t-xi kyma'n kye xjal.

¹¹Aj il qe aj Galaad ex minti' kyajb'en. Tuj Gilgal in kub' kyb'yo'n qe tor te chojb'il; kyja'tzun che b'ajel xitj ky-altar; ik che okel ik tza'n qe b'yuj ab'j kykub' tuj kojb'il ch'okimaj, chi Qman.

¹²Xi oq Jacob tuj tx'otx' Aram, o tz'aq'nan te pastoril ẍne'l noq tu'n tknet t-xu'jil.

¹³Noq tu'n jun t-sanjel Qman e je'tz q'i'n qe xjal aj Israel tuj Egipto ex e ok kwentin tu'n.

¹⁴Ma tzajxix tq'oj Qman kyu'n aj Efraín. Kyja'tzun kb'el kycastiw tu'n Qman, tu'n tlaj nim xjal ma kub' kyu'n ex kb'el kycastiw tu'nju ma tz'el tch'ixwi Qman kyu'n.