Read kumam Oseas 13 Bible Online

Oseas 13 - kumam bible

Oseas 13

¹Tej kyyolin qe aj Efraín tzaj tchi kyi'j xjal, o nimanjtz kyyol kyu'n txqantl k'loj kyiyjil aj Israel, ex e naj qe aj Efraín tu'n kyex kyil tu'nju e k'ulun twitz tilb'ilal Baal.

²Ex kukx kyb'inchan il. Nno'kx kyq'o'n saq pwaq tuj q'aq' tu'n tkub' ulj ex in kub' kyb'incha'n qe tilb'ilal ti'j ik tza'nx kyajb'il; kykyaqil jlu kyb'inchb'en xjal at kynab'l tu'n kyb'inchante. Ex in kyma'n kye xjal: Kyq'onxe qe chojb'il kye ex kytz'ub'an ele kywitz qe tilb'ilal ik che ke'yin ik tza'n jun tal tor.

³Kyja'tzun, ik che okel ik tza'n muj in kub' juke' prim, ik tza'n tq'ab' che'w in kub' twitz tx'otx' te prim, jurat in kub' naj, ik tza'n ch'im in xi tiqan kyq'iq' ex ik tza'n sib' in b'uqin.

⁴Chi Qman: Aqine Kydiose aju Kymane atxix tej kytene tuj Egipto. Mi'n txi kynimane juntl dios, o'kx qine, ex o'kx aqine klol kyeye.

⁵Aqine in kwentin kyeye tuj tzqij tx'otx' jatum at nim ta'w kyaq.

⁶Ex tej tnoj kyk'u'je jaw kyniman kyib'e ex ik' nna'le kyu'ne.

⁷Tu'ntzun jlu ik chin okele te kyeye ik tza'n jun b'alun, ex ik tza'n jun tigr chin k'okel tzoqpaje kyi'je tuj b'e.

⁸Chin okel tzoqpaje kyi'je ik tza'n jun ttxu oso otoq che'x elq'a'n qe tal, ex b'i'x kb'ajel npaẍu'ne kyanmiye. Ex ik tza'n in b'ant tu'n jun b'alun, ax che najel wu'ne ma chixin; che najel wu'ne ik tza'n tu'n jun txkup.

⁹Aqeye aj Israel, che najele wu'ne ex ¿alkye jaku onin kyi'je?

¹⁰¿Jatum ta' kyreye ja'lo tu'n tkolin kyi'je tuj tkyaqil kytanmiye? ¿Jatum ate' qe nejenel kyxole? Ax qeye e tzaj qaninte weye tu'n tok nq'o'ne jun kyreye ex qe nejenel kyxole.

¹¹Tej tok nq'o'ne kyreye tzaj nq'oje kyi'je, ax ikx tzaj nq'oje kyi'je tej tel wi'ne kyreye.

¹²Aju kyb'inchb'en aj Efraín mya b'a'n, k'alo'n tuj potzb'il te ex k'u'n aju kyil.

¹³Ma pon tq'ijlalil tu'n kyok aj Israel ik tza'n jun k'wa'l kyja' tul itz'j, ex aju k'wa'l lu minti' tnab'l, tk'i' tu'n ttzaj pich'e' tu'n tul itz'j.

¹⁴Che kolpetel wu'ne tu'n mi'n kypon tuj kynajb'il kyimni ex che kletel wu'ne te kamik. Aya kamik, ¿jatum ta' tipumala aju in b'aj naj nimku tu'n? Aya kynajb'il kyimni, ¿jatum ta' ju xitb'il tu'na? Mlay tzaj tz'e'y nk'u'je kyi'j qe xjal lu.

¹⁵Maske ik ma che ok aj Israel ik tza'n ajlaj in ch'iy naj, tzul jun kyq'iq' tuj tjawitz q'ij, aju kyq'iq' lu in xumin wen, in tzaj tuj lugar tzqij tx'otx', ex tkyaqil a' ex tkyaqil twi a' k'ajel tzqij ex kb'el b'aj tu'n. K'elel q'i'n kyq'inumab'l tuk'ix tkyaqilju wi'yilxix at kye.

¹⁶Kb'el kycastiw aj Samaria tu'nju ma jaw kyi'n kyib' tu'n kyq'ojin ti'j Kydios. Che b'el b'yo'n tu'n spad, ex che b'el peq'cha'n qe kyk'wa'l twitz tx'otx' ex qe kyxu'jil ch'ix tul kyal kb'ajel jaqo'n kyk'u'j tu'n spad, chi Qman.