Read kumam Oseas 14 Bible Online

Oseas 14 - kumam bible

Oseas 14

¹Aqeye aj Israel, kyajtz meltz'aje juntl maj tuk'il Qman aju Kydiose, porke ma che kub' tz'aqe tu'n tlaj kyile.

²Kyajtz meltz'aje tuk'il Qman, ex kymanxe te tuj kyna'j Diose: Najsama tkyaqil qb'inchb'ene mya b'a'n ex k'monxa tuk'il tzalajb'il aju aq'b'il chjonte in xi qq'o'ne teya.

³Ex mlay qo klete kyu'n aj Asiria ex mlay qo jaxe kyib'aj chej tu'n qel oqe. Mi'n che ok qdiosintle qe tilb'ilal qu'nxe e b'ant, porke o'kx tuk'ila Qman in knet q'aq'b'il k'u'jb'aj kyu'n meb'a xjal, che chikuye.

⁴Chi Qman in tma'n: K'elel wi'ne ttx'u'jil kywi' aj Israel: che okel nk'ujla'ne, maske mya b'a'n qe, porke minti'tl nq'oje kyi'j.

⁵Chin okele te kye aj Israel ik tza'n tq'ab' che'w, atzun kye, ik che okel ik tza'n qe b'ech lirio nim kyxmakal, ex ik tza'n qe tze' wi'ten twi witz Líbano in xi b'et kylok' tuj tx'otx'.

⁶Ik che okel ik tza'n jun wi' tze' ma' ponin b'aj tq'ab', ex tb'anilxix ik tza'n tq'ab' tze' olivo; aju tk'ok'jal ik k'okel ik tza'n kyk'ok'jal qe tze' wi'ten twi witz Líbano.

⁷Che ajetz meltz'aj xjal tu'n kynajan tjaq' t-xlekumal, ex che ch'iyil ik tza'n in ch'iy triw, che okel ik tza'n tqan uva ok nno'k t-xmakal, ex kykyaqil xjal che yolil b'a'n kyi'j, ik tza'n in yolinjtz b'a'n ti'j vin in b'ant tuj Líbano.

⁸Ok kyma' qe aj Efraín kyja': Minti'tl qaje kyi'j qe tilb'ilal ja'lo. Kxel nb'i'ne kyqanb'etz ex che okel nkwentine qe. Ik chin okele te kye ik tza'n jun tzaj cha'x ke'yin ex minti' in tzqij, wuk'ile ta' ju xtalb'il kyib'aj qe xjal etzan wu'ne.

⁹Aju xjal at tnab'l ex at tojtzqib'l, b'a'n tu'n tel tnik' ti'j ju yol lu: Qe tb'e Qman jiqunxix kyi'j ex kukx in che b'et qe xjal tz'aqlxix kyuj; atzun qe xjal b'inchal mya b'a'n, in che jaw tz'aq kyuj.