Read kumam Oseas 2 Bible Online

Oseas 2 - kumam bible

Oseas 2

¹Kye kyermaniye xinaq kymanxe kyja': Etzan qeye tu'n Dios, ex kye kyermaniye xu'j kymanxe kyja': Ma tzaj q'aq'an tk'u'j Dios kyi'je.

²Chi Qman in tma'n: Kymanxe te kytxu'ye aju il in b'ant tu'n, kymanxe, porke aju xu'j lu ya mya nxu'jile ex ya mya aqine tchmil. B'a'n tu'n tch'expet tmod, tu'n mi'n tok tq'on tib' te jun xu'j jawni twitz kyuk'il xinaq, ex b'a'n tu'n kykyaj tkolin qe tyaẍ.

³Qatzun mi ma tb'incha ikju, b'i'x kyjel nsqitb'a'ne ti'j: K'okel wu'ne ik tza'n tej tul itz'j, k'okel nq'o'ne ik tza'n jun lugar minti' kynajb'il xjal tuj ex ik tza'n tzqij tx'otx', ex kymel wu'ne tu'n txqetle'n.

⁴Mlay tzaj q'aq'an nk'u'je kyi'j qe tal, porke sik'aj k'wa'l qe.

⁵Aju kytxu' ma yaẍin kyuk'il xinaq, ma tzaj ti'n tch'ixwi porke o tma: Ma chinxe jyol kye qe xinaq at nim kygan wi'je, aqeju in che tzaj q'onte nwaye ex aju a' in ajb'en wu'ne, ex in tzaj kyq'o'n nlane ex nnoq'e lino, tuk'ix nchi'ye aseyt ex nk'a'ye, chi kytxu'.

⁶Kyja'tzun kmaqsetel tb'e wu'ne tu'n ch'i'x, ex kb'ajel nb'incha'ne pe'n ti'j tu'n mi'n tknet b'e tu'n.

⁷K'okel lpe' kyi'j qe xinaq at nim tgan kyi'j, ex mlay pon kanun kyi'j; k'okel ten jyol kye, ex mlay che knet tu'n. Ex oktzun tma': Chin ajel meltz'aje juntl maj tuk'il nej nchmile, ex mas b'a'n in tene tuk'il twitzju in b'aj wi'je ja'lo.

⁸Pero ate xu'j lu minti' el tnik' ti'j qa aqine inx q'onte triw te, tuk'ix ta'l twitz uva, tuk'ix tchi' aseyt, ex minti' el tnik' ti'j qa wu'ne chmet saq pwaq ex q'an pwaq, aqeju e ajb'en tu'n tu'n tb'aj tb'incha'n qe tilb'ilal Baal.

⁹Tu'ntzun jlu k'ajetz wi'ne juntl maj ntriwoye ex ta'l twitz n-uvaye tuj tq'ijlalil ok tjaw tchmo'n twitz tawal, ex k'ajetz wi'ne juntl maj nlane ex nnoq'e lino aju otoq txi nq'o'ne te tu'n kyb'ant t-xb'alun.

¹⁰Kb'el nsqitb'a'ne ti'j kywitz qe xinaq at nim tgan kyi'j ex mi jun kkolpilte te tuj nq'ab'e.

¹¹Kb'ajel ttzalajb'il wu'ne ex qe tninq'ij ex qe ninq'ij ok ttzaj ke'yin ak'aj xjaw ex qe q'ij te ojlab'l ex tkyaqil txqantl ninq'ij.

¹²Kb'ajel naj tqan t-uva ex tqan t-higo wu'ne, aju in tma'n ti'j: Atzun chojb'il weye jlu tzaj kyq'o'n qe xinaq at nim kygan wi'je, chi xu'j. Ex k'okel nq'one jlu tu'n ttzaj ch'iy k'ul tuj, ex che lo'l qe jil te tjaq' k'ul ti'j.

¹³Kb'el nq'o'ne tcastiw tu'nju nim q'ij kub' tpatun storak kywitz qe tilb'ilal, ex tu'nju b'aj tb'inchan tib' tu'n xmulq'ab'aj ex uwj tu'n t-xi lpe' kyi'j qe xinaq at nim tgan kyi'j, ex atzun weye ik' nna'le tu'n. Aqine Dios in chin q'mante ju yol lu.

¹⁴Che okel nxmoxine qe aj Israel tu'n kyxi wi'ne tuj lugar minti' xjal tuj ex tu'n tkyaqil nk'ujlalile chin xel yoline kye.

¹⁵Ktzajel ch'iy juntl maj tqan ky-uva wu'ne, ex aju chq'ajlaj Acor jatum tzaj yajb'il kyi'j, k'okel nq'o'ne te jun oyb'il kye tu'n tqe' kyk'u'j ti'j. Atzun ktzajel kyq'o'n kyyol weye ik tza'n tej q'apojxtoq qe, tuj q'ij tej kyetz tuj Egipto.

¹⁶K'okeltzun kyma'n weye kyja': Aya Qchmile che chilo, ex ya mlay tz'ok kyq'o'n nb'iye Baal (ex qa patrón). Aqine Dios in chin q'mante ju yol lu.

¹⁷Ex mlay txi nq'o'ne amb'il kye tu'n kyyolin mastl kyi'j kydios xjal baal kyb'i.

¹⁸Tuj tq'ijlalil tzul kb'antel ti'j jun nyole kyuk'il qe jil te tjaq' k'ul ex qe chyu'j ex qe lob'aj, tu'n mi'n kyb'inchan mya b'a'n kyi'j aj Israel; che b'el ntoqine qe xob'l plech ex qe spad tuj tnam lu ex b'i'x kweb'el q'oj, tu'ntzun kyten xjal tuj txub'txaj, aqeju etzan wu'ne.

¹⁹Aqeye aj Israel, axix tok che okele te nxu'jile te jumajx ik tza'nx in tma'n ley, porke k'ujla'n qeye wu'ne ex at tq'aq'b'il nk'u'je kyi'je.

²⁰Che okele te nxu'jile ex kjapunel nyole kyuk'ile, oktzun k'elel kynik'e wi'je, qa aqine Kymane.

²¹Aqine Kymane in chin q'mante yol lu: Tuj tq'ijlalil tzul ktzajel ntzaq'we'ne aju kyna'j Dios aj Israel ex ktzajel nq'o'ne jb'al tib'aj tx'otx',

²²tu'n ttzaj tq'o'n triw ex twitz uva ex twitz olivo nne'l aseyt ti'j.

²³Qe xjal etzan wu'ne che kyjel nq'o'ne tuj tx'otx' te jumajx tu'n kyok te weye; ktzajel q'aq'an nk'u'je kyi'j aj Israel. Minti' tzaj q'aq'an nk'u'je kyi'j nej. Nej xi nma'ne kye: Mya etzan qeye wu'ne, atzun ja'lo kxel nma'ne kye: Etzan qeye wu'ne, ex atzun kye ktzajel kyma'n weye: Aya Qdiose.