Read kumam Oseas 3 Bible Online

Oseas 3 - kumam bible

Oseas 3

¹Tzaj tma'n Qman juntl maj weye: Txi'ya ex k'ujlama aju xu'j at tyaẍ ex aj pajil, ik tza'n in che ok nk'ujla'ne qe aj Israel maske in che ok lpe' kyi'j junxitl dios, ex in che lo'n ti'j twitz uva tzqijsa'maj aju in pon kyi'n te oyaj kywitz kydios, chi Dios tzaj tma'n weye.

²Knettzun jun xu'j wu'ne tu'n tok te nxu'jile, ex chjet olaj tajlal saq pwaq twi' ex jun iqtz tuk' mey sebad.

³Xi nma'ne te: Nim tyemp ktele wuk'ile, kyja'tzun mi'n yaẍina ex mi'n txi'ya tuk'il juntl xinaq, ax ikx weye ok nb'incha'ye teya ikju.

⁴Porke nim tyemp che tel aj Israel minti' kyrey ex minti' nejenel kyxol, mlay txi kyq'o'n chojb'il te Dios ex mlay che k'ulun kywitz ab'j xjansamaj, minti' tkapiẍay pal ktel kyuk'il ex minti' tilb'ilal ktel tuj kyja.

⁵Te tib'ajxi jlu che ajetz meltz'aj aj Israel juntl maj, ex che okel ten jyolte Qman aju Kydios ex jyolte David aju kyrey. Tuj mankb'il tq'ijlalil che ul tuk'il Qman ex tuk'il tchiylal che nimal te, ex kxel kyk'mo'n aju t-xtalb'il kxel tq'o'n kye.