Read kumam Oseas 7 Bible Online

Oseas 7 - kumam bible

Oseas 7

¹O wajb'eye tu'n kyok nq'anine qe aj Israel, aqeju aj Efraín ex qe aj Samaria, pero o knet nimxix kyil wu'ne tuk'ix kyb'inchb'en mya b'a'n, ex kykyaqil b'a'n che nik'an yol, in che okx tuj kyja xjal ik tza'n qe eleq' ex in che ok tzoqpaj kyi'j xjal tuj cay.

²Minti' in che ximan ti'j qa kukx na'n tkyaqil kyil wu'ne. Ja'lo pe'nin kyi'j tu'n kyex kyb'inchb'en ex q'ancha'l tkyaqil jlu nwitze.

³Noq tu'nju mya b'a'n in b'ant kyu'n qe xjal etzan wu'ne ex tu'nju kynik'aj yol, in jaw tzalaj ju rey ex qe nejenel.

⁴Kykyaqil qe jlu b'i'x ma tz'el kypa'n kyib' wi'je; ik kyten ik tza'n jun jorni, noq o'kx ok tjaw k'ant q'aq' tuj minti'tl nno'kx tyukun aju in aq'nan ti'j, akux in b'ant tten tq'otjil pan.

⁵Tuj ninq'ij te rey b'i'x yab't tu'n vin xi kyq'o'n nejenel te. Ex junx ela kyuk'il qeju in che xmayin.

⁶In b'aj kyximan xjal lu nimku mya b'a'n tuj ewaj, ik kyten ik tza'n jun jorni cheb'a in k'ant te qonik'an, atzun prim te juntl q'ij in k'ant-xix wen.

⁷Ax tok, kykyaqil in che k'ant ik tza'n jun jorni ex qeju in che kawin kyib'aj o che kub' kyu'n. Kykyaqil qe kyrey o che kub' kyb'yo'n ex mi a'l jun kyxol ma tzaj qaninte onb'il weye.

⁸Ma b'aj kysmon kyib' aj Efraín kyuk'il txqantl tnam. Ik kyten aj Efraín ik tza'n jun wab'j noq junx pak' in tzq'aj.

⁹Ma tz'el b'aj kyipun kyu'n xjal kyuj txqantl nasyon ex minti' ma tz'el kynik' ti'j. Aju ttzmal kywi' ma saqix tu'n tijin ex minti' nne'l kynik' ti'j.

¹⁰Ax ju kynimb'il kyib' aj Israel ma tz'ok te testiw kyi'jx. Maske ikju, pero minti' ma che ajtz meltz'aj tuk'il Qman aju Kydios, ex minti' ma che jyon ti'j.

¹¹Ik kyten aj Efraín ik tza'n jun paloma otoq tz'e'lel tuj twitz ex minti' tnab'l. In xi kyqanin onb'il kye aj Egipto ex jurat in che'x qanil onb'il kye aj Asiria.

¹²Oktzun kyxi' ma chixin, kxel nxo'ne nxuyb'e kyib'aj, che b'el tz'aq wu'ne ik tza'n qe chyu'j in che lipan twitz kya'j; kb'el kycastiw wu'ne tu'n tlaj kyb'inchb'en mya b'a'n.

¹³Ay b'ek'b'il kywitz tu'nju ma tz'el kypa'n kyib' wi'je. Ktzajel xitb'il kyib'aj tu'nju ma jaw kyi'n kyib' wi'je. Wajb'ile tu'n nkoline kyi'j, atzun kye in che nik'an yol wi'je.

¹⁴Maske in che ayayan ok kykub' ten twitz watb'il, pero minti' in che kub'san nwitze tu'n tkyaqil kyanmi. Ok t-xi kyqanin triw ex vin, in b'aj kyqesin kyximlal ik tza'n qe xjal mya nimal Dios, ex ma jaw kyi'n kyib' wi'je.

¹⁵Aqine in xnaq'tzante kye, ex wu'ne xi nq'o'ne tipun kyq'ab', atzun kye kub' kyximan tu'n kyb'inchante mya b'a'n wi'je.

¹⁶E aj meltz'aj k'ulul kywitz qe tilb'ilal; ik kyten ik tza'n jun xob'l plech ẍo'k ti'j, ok in xi xo't jun plech, txuk nne'x ti'jxi aju otoq txi umlet. Tu'nju kyyol te kynimb'il kyib' che najel qe nejenel kye tu'n spad, ex kykyaqil aj Egipto che okel ten xmayil kyi'j.