Read kumam Oseas 8 Bible Online

Oseas 8 - kumam bible

Oseas 8

¹Q'ajtza'nka aju chun q'i'n tu'na; qe aj q'oj che okel tzoqpaj kyi'j xjal etzan wu'ne ik tza'n nno'k tzoqpaj jun t'iw ti'j tkanb'. Porke ma che ik' tib'aj ju yol kyaj b'ant ti'j wu'ne kyuk'il ex kyk'i' txi kyniman nleye.

²In jaw tq'ajq'ajel kywi' aj Israel: Qman Dios, ojtzqi'na qu'ne, che chi.

³Qe aj Israel ma tz'el kyik'un aju b'a'n, ex kyja'tzun che okel lpe' qe aj q'oj kyi'j tu'n kytzyet.

⁴Minti' tzaj kyma'n weye tej tok kyq'o'n kyrey ex tej tok kyq'o'n nejenel kyxol, ikx minti' chin b'ine ti'j. O tzaj kyi'n saq pwaq ex q'an pwaq at kyuk'il tu'n kyb'ant qe tilb'ilal, ex tu'n jlu kyu'nx kyib' che najel.

⁵Aqeye aj Samaria, nne'l wik'une aju tilb'ilal tal tor in che k'ulune twitz. Nimxix nq'oje ma tzaj kyi'je. ¿Jtoj b'an kysaqixe?

⁶Kyu'nx aj Israel ul kyi'n tilb'ilal tal tor aju at tuj Samaria. Mya Dios te jlu. B'incha'maj tu'n jun xjal b'a'n b'inchan noq alkyex tilb'ilal, kyja'tzun kb'ajel b'uchin.

⁷Ma kyb'incha aju minti' tajb'en, ex tu'n jlu ktzajel nimxix kycastiw; tuj kykojb'il minti' twitz awal k'okel ex mlay tz'el ch'in arin ti'j twitz triw porke minti' tuj, ex qatzun ma tz'el kyu'n, kb'ajel wa'n kyu'n xjal tuj juntl nasyon.

⁸Ma che naj aj Israel kyu'n txqantl nasyon. Ex tuj kywitz txqantl nasyon ik kyten ja'lo ik tza'n jun xar minti' tajb'en.

⁹Porke o che'x aj qanil onb'il kye aj Asiria, ik kyten ik tza'n jun bur te tjaq' k'ul puro kyuw twi'. Xi kyq'o'n aj Efraín oyaj kye txqantl nasyon tu'ntzun kykolin kyi'j.

¹⁰Maske xi kyq'o'n oyaj kye nasyon, ja'lo che okel nchmo'ne tu'n kyyajlanjtz ch'in tjaq' tkawb'il rey ex qe nejenel.

¹¹Porke ma jaw kyb'incha'n aj Efraín nimxix altar tu'n kyb'inchan il ex o'kx kyajb'en qe altar kye tu'n kyb'inchan il.

¹²Maske xi ntz'ib'ane nimku xnaq'tzb'il kye, pero ok kyq'o'n ik tza'n jun ti'xti minti' ojtzqi'n kyu'n.

¹³Nimxix kygan tu'n t-xi kyq'o'n chojb'il ex in b'ant kyu'n, ex in xi kychyo'n kychib'jal alumaj in che'x q'o'n te chojb'il; atzun weye, minti' in chin tzalaje kyi'j. Ktzajel nna'ne aju kyb'inchb'en mya b'a'n in kyb'incha'n, ex kb'el nq'o'ne kycastiw tu'n tlaj kyil, ex che ajel meltz'aj wu'ne tuj Egipto.

¹⁴Ma jaw kyb'incha'n aj Israel kyja rey, ex nnik' tna'l kyu'n aju Poq'sal kye. Ma jaw kyb'incha'n aj Judá nimku tnam tok muro kyi'j, ex k'okel nq'o'ne q'aq' kyi'j ex che b'ajel tz'e'y qe tja rey.