Read kumam Amós 6 Bible Online

Amós 6 - kumam bible

Amós 6

¹Ay b'ek'b'il kywitze aqeye in che anq'ine tuj achb'il tuj tnam Sión. Ay b'ek'b'il kywitze aqeye q'uql kyk'u'je ti'j tnam Samaria, aqeye nejenel te nasyon mas nim toklen, ex in che ul aj Israel qanil onb'il kyuk'ile.

²Kyxi'ye tuj tnam Calne tu'n kyke'yine ti ma b'aj ti'j; b'ix che ik'e tuj tnam Hamat aju mas ma tij, ex tqanx che ku'xe tuj tnam Gat, aju kytanmi aj Filisteo. ¿Maspetzun b'a'n qeye kywitz qe tnam lu? ¿Maspe nim kytx'otx' qe tnam lu twitz kyeye kytx'otx'?

³Minti' kyaje tu'n kyximane ti'j tq'ijlalil castiw tzul, ex tu'nju kyb'inchb'ene mya b'a'n jurat naj tzul kyi'ne xitb'il kyuwxix kyib'aje.

⁴In che tane kyib'aj tb'anil watb'il tok marfil kyi'j, in xi kych'alin kyib'e kyib'aj tb'anil q'uqb'il ex in che chyo'ne kyi'j ẍne'l ex tal wakẍ ulni kynab'l;

⁵in che b'itzane lepchqe'ke ti'j tq'ajq'ajel twi arpa ex nne'l kykano'ne ti'j David, in b'aj kyb'incha'ne txqantl txkaj chnab';

⁶in che k'ane vin kyuj qe nmaq k'ab'l, tb'anilxix aju perjum in ajb'en kyu'ne, ex minti' in tzaj kyb'ise ti'j xitb'il tzul ti'j kytanmiye.

⁷Aqeye che xel q'i'n tnejel tu'n kyxi'ye tuj juntl tnam najchaq ex atzun kpol b'aj twi nintz wa'n nno'k kyu'ne ex ju kyachb'ile in b'ant.

⁸Ma txi ttziyan Qman jun yol axix tok tu'nx tib': Ate Qman aju Dios Tajaw Tkyaqil in tma'n: Ik'un wu'ne aju kynimb'il kyib' tiyjil Jacob, kyuk'ix qe kyja xjal ma tij, ex kxel nq'o'ne tnam lu tuj kyq'ab' aj q'oj tuk'ix tkyaqilju at tuj, chi Qman.

⁹Qa ma che kyaj ten laj xjal tuj jun ja, kykyaqil che kymel.

¹⁰Ok tjaw ti'n jun xjal t-ximlal qtzan terman tu'n tex ti'n ttxa'n pe'n tu'n tkub' tpatun, kxel tqanin te juntl tuk'il tokx tuja: ¿Atxpe juntl xjal itz'x ma knet tu'na? Minti', chi juntl ktzajel ttzaq'we'n. Atzunju tnejel kxel tma'n: Mi'n q'ajta, porke mya b'a'n tu'n ttzaj qna'n tb'i Qman Dios.

¹¹Porke ktzajel tma'n Qman tu'n ttzaj castiw kyib'aj qe ja nmaq ex kyib'aj qe ja ch'in, ex il ti'j tu'n kyb'aj xitj kykyaqil.

¹²¿Jakupe che jax qe chej twitz pik? ¿Jakupe b'ant kych'okin xjal twitz pik? Ikxtzun kyeye, minti' ma txi kyb'incha'ne kyi'j xjal tuj tumelxix ex nno'k kyq'o'ne ley te minti' tajb'en.

¹³In jaw kyniman kyib'e tu'nju o kub' ti'j tnam Lo-debar kyu'ne, ex in kyma'ne kyja': ¿Myapetzun tu'n qex qipumal kub' ti'j tnam Kornaim qu'n?

¹⁴Aqeye aj Israel, kyq'o'nke kwent ti'j, porke ate Dios aju Tajaw Tkyaqil in tma'n kyja': Ktzajel wi'ne jun nasyon tu'n tq'ojin kyi'je, tu'ntzun kyyajlanjtzxixe tu'n, ex max ktzajel qe' yajb'il ttxa'n kytx'otx'e tuj tnam Hamat tu'n tpon b'aj max tuj juntl pak' ttxa'n kytx'otx'e tuj tq'ab' xaq Arabá.